Elordada balalardy balabaqşaǧa kezekke qoiu jäne joldama alu qyzmetterı endı ūialy telefon arqyly jürgızıledı. Būl turaly äkımdıkte ötken brifingte Bılım basqarmasynyŋ basşysy Änuar Janǧozin mälımdedı.
Bas qala boiynşa balabaqşaǧa kezekke tūru jäne joldama alu qyzmetterın atqaratyn www.e.astana.kz elektrondy jüiesı jaŋartylyp, oǧan tolyqtyrular engızıldı. Avtomattandyrylǧan būl jüie arqyly ekı jyl ışınde 70 myŋnan asa ata-anaǧa qyzmet körsetılgen. Onyŋ jaŋartyluyna ata-analar tarapynan kelıp tüsken ūsynystar men syni pıkırler sebep bolypty.
– Būryn jüiege kıru üşın mındettı türde elektrondy sifrly qoltaŋba talap etıletın. Būl ata-analar tarapynan köp narazylyq tudyrdy. Endı jüiege kıru üşın ESQ da, kompiuter de qajet emes, barlyq qyzmetterdı alu tek smartfon jetkılıktı. Ekınşıden, jüiede ärbır balabaqşa boiynşa tolyq aqparat qamtylǧan. Mäselen, mekemenıŋ pasporty, ornalasqan jerı, bos oryndar sany, suretterı jäne basqa da mälımetter. Üşınşı jaŋaşyldyq, är ata-ana özınıŋ tūrǧylyqty mekenjaiyna nemese jūmys ornyna jaqyn balabaqşany taŋdap, ol turaly aqparatty elektrondyq poşta arqyly da ala alady. Iаǧni taŋdaǧan balabaqşada bos oryn paida bolǧan kezde poştaŋyzǧa habarlama keledı. Sondyqtan ata-analarǧa endı täulık boiy kompiuterge köz tıgıp otyrudyŋ qajetı bolmaidy. Habarlama kelgen kezde ǧana jüiege kırseŋız bolady, – dedı Bılım basqarmasynyŋ basşysy Änuar Janǧozin.
Jaŋartylǧan jüie oryn bölu boiynşa aldaǧy 10 mausymynan bastap ıske qosylady. Sol uaqytta 17 myŋ bos oryn engızıledı. Bos oryndardy engızu tärtıbı balanyŋ tuǧan jylyna bailanysty jariialanady. Mäselen, oryndar 10 mausym künı 2016-2017 jylǧy balalarǧa, 14 mausym künı 2015 jylǧy balalarǧa, al 19 mausym künı 2013-2014 jylǧy balalarǧa qarastyrylady.
Aita ketsek, Nūr-Sūltan qalasynda 375 mektepke deiıngı bılım beru mekemesı (94 memlekettık mekeme) jūmys ısteidı. Onda 50 myŋnan asa büldırşın tärbielenude. Jalpy, balabaqşaǧa kezekte tūrǧan 3 pen 6 jas aralyǧyndaǧy balalardyŋ sany 16 myŋnan asady.
Sondai-aq brifingte balabaqşalardaǧy qauıpsızdık mäselesı de söz boldy. Bılım basqarmasy mektepke deiıngı bılım beru bölımınıŋ basşysy Läzzat Razbekovanyŋ aituynşa, qazırgı uaqytta barlyq balabaqşada beinebaqylau qūrylǧylary ornatyluda. Eger büldırşınge zäbır körsetu deregı rastalsa, tiısınşe qataŋ şara qoldanylady. Mūndai jaǧdaida tärbieşı ǧana emes, eŋ aldymen meŋgeruşınıŋ özı jūmystan bosatylatynyn aitady bölım basşysy.
