Mıne, bala bıtkennıŋ bazaryna ainalǧan jaz da kelıp jettı. Endı toǧyz ai boiy bılım närımen susyndaǧan oquşy qauym köpten kütken kanikuldaryn qalai jäne qaida ötkıze alady? Ötken seisenbı küngı Ükımet otyrysynda osy mäsele kün tärtıbıne qoiyldy.
QR Premer-ministrı Asqar Mamin köterılgen mäsele jönınde aita kelıp:
– Balalardyŋ kanikuldy qyzyqty ötkızuı – ärbır otbasy üşın erekşe maŋyzdy. Sondyqtan būl ıstı tyŋǧylyqty ūiymdastyru qajet, ärı oǧan mesenattardy da köptep jūmyldyrǧan abzal. Öŋırlık jerlerde ondai mysaldar da az emes,– dep qūzyrly organdarǧa bırqatar tapsyrmalar jüktedı.
Elımızde ışkı turizmdı damytu maqsatynda «KIDS GO FREE» qaǧidaty boiynşa balalardyŋ tegın aviamarşruttaryn subsidiialau oilastyrylyp jatyr. Al 2020 jyldan bastap barlyq öŋırlerde tegın «Balalar turistık poiyzyn» ıske qosu josparlanuda.
Endı astanalyq balalar men jasöspırımder kanikuldaryn qaida ötkızedı degen saualǧa auyssaq. Bırden aita keteiık, Arbat alaŋynda ötken balalardyŋ biylǧy jazǧy demalys oryndarynyŋ dästürlı järmeŋkesınde taŋdau köp boldy.
«Tūlpar» men «Batyr»
Biylǧy jazda Balalar jäne jasöspırımder turizm ortalyǧy alǧaş ret ūlttyq mazmūnda «Tūlpar» etnikalyq lagerın ūiymdastyryp otyr. Lager Ereimentaudyŋ ırgesındegı «Būiratau» ūlttyq tabiǧi saiabaǧynda ornalasqan. Orman-tauy, aqqainar būlaǧy bar, auasy saf äsem tabiǧat aiasynda qanat jaiǧan aq şaŋqan 10 kiız üiden tūratyn demalys orny öz keluşılerın 15 mausymnan bastap qarsy aluǧa daiyn. Demalys baǧdarlamasy halqymyzdyŋ salt-dästürlerı negızınde äzırlengen.
Osy saiabaqta kezektı jazǧy mausymyn «Batyr» şatyrly lagerı de aşyp otyr. Jaz boiy ekı lagerde 1500 bala demalady dep topşylanǧan. «Tūlpar» men «Batyr» keluşılerdı kezek-kezegımen qabyldaityn bolady. Atalǧan lagerlerge berıletın joldamanyŋ baǧasy 7 künge 25 myŋ teŋgenı qūrady. Sondai-aq jergılıktı kadet synyptaryna demalys oryndaryn bölu mäselesı şeşılıp jatyr.
Türkıstanǧa saiahat
Balalar jäne jasöspırımder turizm ortalyǧynyŋ oŋtüstık qazaqstandyq ärıptesterımen memorandumǧa qol qoiuynyŋ arqasynda astanalyq oquşylar kanikul kezınde Türkıstan qalasyna saiahat jasap baru mümkındıgıne ie boldy. Būǧan deiın de Nauryz merekesı qarsaŋynda äleumettık tūrǧydan naşar qorǧalǧan jäne köp sandy otbasylardan şyqqan 66 bala ejelgı qalanyŋ tarihi mūralaryn tamaşalap kelgen bolatyn. Endı, kelesı ekspedisiia 26 mamyr künı kezektı saparǧa şyǧuǧa daiyndalyp jatyr.
Aita keteiık, Şymkent pen Türkıstanǧa üş qondyryp, tarihi oryndar men mädeni mūralardy aralatyp äkeludıŋ baǧasy – 28 myŋ teŋge. Būl esepke jol şyǧyny kırmeidı.
«Arman» lagerı
Qalalyq bılım beru basqarmasynyŋ vedomstvolyq «Arman» lagerı biyl da ädettegışe oquşylardy quana-quana qarsy aluǧa daiyn otyr. Lagerde alǧaşqy mausymdarda bırneşe auysymdar boiynşa köpbalaly jäne äleumettık jaǧynan az qamtylǧan otbasylardyŋ balalary qabyldanatyn bolady. Olarǧa joldama tegın ärı qala mektepterı boiynşa taratylady.
«Arman» Aqköl audanynyŋ orman-toǧaily öŋırınde ornalasqan. Mūnda 10 küngı demalys 42 myŋ teŋge tūrady. Joldama baǧasynyŋ ışıne balalardy bes mezgıl tamaqtandyru men qyzyqty taqyryptyq baǧdarlamalar kıredı. Är mausymnyŋ baǧdarlamasy özgertılıp otyrady. Keluşılerdı qabyldau 10 mausymnan bastalady.
Zerendı kölı
Möp-möldır, aspandai kökpeŋbek kölı bar, orman-toǧaily, tauly-tasty asqan bır sūlu Zerendı öŋırınde qonys tepken «Jelken» lagerı biylǧy mausymǧa erekşe daiyndyqpen äzırlenıptı. Lagerde 3 qabatty jaŋa korpustar, ashana men tynyǧu orny salynǧan, būrynǧy ǧimarattary jaŋartylǧan. Bes rettık tamaqtanudy qosa eseptegendegı 10 künge belgılengen auysym baǧasy būl ortalyqta 50 myŋ teŋgege baǧalanǧan.
Būl jerge kelıp, demalamyn deuşılerdı Kökşetaudan, Burabaidan arnaiy avtobustar kütıp alady.
Skauttar kiız üiı
Nomads Camp kiız üilı lagerı elordadan 120 km jerde Aqköl audanynda şoq toǧaidyŋ arasynda ornalasqan. Alaŋqaida 12 kiız üi tıgılgen. Olardyŋ ärqaisynda 6-8 baladan qonystanatyn bolady. Būl jerde ärqaisysy 6 künnen 8 mausym ötkızu josparlanǧan.
Tört mezgıl tamaqtandyruy bar är mausymnyŋ baǧasy – 45 myŋ teŋge.
Sıletı özenı boiynda
«Jūldyz» lagerı Ereimennıŋ ūsaq şoqyly tabiǧat qorǧalatyn aimaǧyn kesıp ötetın Sıletı özenınıŋ boiynda ornalasqan. Joldama qūny bır auysymda bes mezgıl tamaǧymen qosa eseptegende 25 myŋ teŋge. Eger balaŋyzdy astanadan alyp ketu kerek bolsa, taǧy 10 myŋ teŋge töleisız. Demalys 3 mausymnan bastalady da, 10 künge sozylady.
Qatarköl aimaǧy
Şuche-Burabai kurort aimaǧynda «Zvezdnyi» sauyqtyru ortalyǧy ornalasqan. Lager 10 künnen 5 auysymmen, 5 ret tamaqtandyru rejimımen jūmys ısteidı. Joldama qūny – 45 myŋ teŋge. Balalardyŋ tynyǧuyna qosa qosymşa 10 myŋ teŋgege şipajailyq em berıledı. Demalys kezeŋı 7 mausymnan bastalady.
Kurort aumaǧynda odan basqa Discovery, «Mirotvores» lagerlerı ornalasqan. Olarda da demalys merzımı 10 künnen. Bıraq auysym kezeŋderıne bailanysty joldama qūny 55 myŋnan 85 myŋ teŋge aralyǧynda belgılengen.
Kadetter üşın
Äskeri-sporttyq baǧyttaǧy SSGO lagerınde balalar kazarmalyq jaǧdaida ömır süredı. Olar mūnda atys önerımen jäne dene şynyqtyru daiarlyǧymen ainalysady, ormanda tırı qalu täsılderın üirenedı, alpinizm men straikbol negızderın meŋgeredı. Auysym soŋynda simvolikalyq äskeri bilet pen şen berıledı.
Lager Aqköl audanynda, bas şahardan 140 şaqyrym qaşyqtyqta ornalasqan. Mūnda 8-17 jas aralyǧyndaǧy balalar men jasöspırımder qabyldanady. Būl jerde ötkızgen 14 kündık daiyndyq 90 myŋ teŋge tūrady.
Qaladaǧy kanikul
Kanikuldy qalada ötkızetın balalar da qyzyqtan qūr qalmaityn boldy. Astanalyq ekı oquşylar saraiy olar üşın jazǧy erekşe baǧdarlama daiyndap otyr.
M.Ötemısov atyndaǧy oquşylar saraiynyŋ jazǧy şyǧarmaşylyq mektebı 6-12 jas aralyǧyndaǧy balalardy kündelıktı saǧat 9.00-den 13.00-ge deiın qabyldaidy. Mektepte ekı ret tamaqtandyru äzırlengen. Eŋ bastysy, oquşylar demalys uaqyttaryn qyzyqty ötkızuı üşın akterlık şeberlıkke şyŋdau, horeografiiaǧa, vokalǧa jäne suret saluǧa, şahmat oinauǧa üiretu, jüzuge baulu, t.b baǧdarlamalar qamtylǧan.
Jazǧy demalys akademiiasy B.Momyşūly daŋǧyly boiynda ornalasqan Oquşylar saraiyna jaiǧasady. Būǧan keluşıler de ekı ret tamaqtandyrylady. Al baǧdarlamaǧa lingvistikalyq därıster, jüzu, mūz üstınde syrǧanau, beineleu önerınıŋ sabaqtary, teatr studiiasy men qyş-qūmyra şeberlıgı, t.b engızılgen. Atalǧan ekeuınde de joldama baǧasy – 20 myŋ teŋge.
Däulet ASAUOV
