Qalalyq Äleumettık qyzmet körsetu ortalyǧy 2016 jyldyŋ säuırınde qūrylǧan. Ortalyq mümkındıgı şekteulı jandarǧa, sonymen qatar jalǧyzbasty qariialarǧa arnaiy qyzmet körsetedı. Halyqaralyq Balalar künı merekesı qarsaŋynda ortalyq mamandarynyŋ mūryndyq boluymen «Parasat» meiramhanasynda «Balalar külkısı – älemnıŋ nūry» atty mümkındıgı şekteulı balalarǧa arnalǧan qaiyrymdylyq şarasy öttı.
Şara barysynda «Samūryq-Qazyna» äl-auqat qory, «Qasiettı jol» oŋaltu ortalyǧy jäne «Kraunddent» tıs emhanasynyŋ qyzmetkerlerı balalardy töl meiramdarymen qūttyqtady. Balalar men ata-analarǧa arnaiy dastarhan jaiylyp, oiyn-sauyq baǧdarlamasyna qūrylǧan erteŋgılıkte qazaq estradasynyŋ jūldyzdary öner körsetıp, jiylǧan qauymdy şattyqqa böledı.
Konserttık baǧdarlamadan özge keş barysynda Astana qalasy Jūmyspen qamtu, eŋbek jäne äleumettık qorǧau basqarmalary atynan ortalyq ūiymdastyrǧan barşa ıs-şaralarǧa jäne balalarynyŋ ömırıne bei-jai qaramai ärdaiym belsendılık tanytqan ata-analar alǧys hattarmen marapattaldy. Būdan özge qalalyq Densaulyq saqtau basqarmasy käsıpodaǧynyŋ filialy ortalyqty EDŞ bölmesıne eŋbekteuge arnalǧan «Tasbaqa» qūrylǧysy üşın aqşalai sertifikat tabystady. «Taza niet-Astana» qoǧamdyq qory ortalyqqa syilyq retınde «Tepe-teŋdık taqtasy» oŋaltu jabdyǧynyŋ ekı danasyn satyp alu mümkındıgın beretın aqşalai sertifikat ūsyndy. «Mūndai qaiyrymdylyq şaralarynyŋ jiı ötuı mümkındıgı şekteulı balalardyŋ köŋılıne ümıt otyn jaǧyp, erteŋge degen senımderın nyǧaitary haq. Ortalyǧymyz aşylǧaly mūndai igı şaralar öte jiı ötedı. Meiırımdı, qaiyrymdy azamattarymyz aramyzda öte köp. Bar jaqsylyqty balalarǧa qalai jasasaq ta jarasady» dedı ortalyq basşysy Rysty Baimaǧambetova.
Sabina Sailaubai
