Astanada «Smile Astana» jobasyn jüzege asyru aiasynda eŋ üzdık fotosuret nemese eskiz-ideialardyŋ «Baqytty beine, kümıs külkı» aşyq baiqauy jariialandy. Meiırımdı, aqjarqyn, köŋılderı köterıŋkı, jüzı jyly, sypaiy adamdardyŋ beinesın qalyptastyru jäne qaiyrymdylyq şaralaryn ūiymdastyruǧa baǧyttalǧan baiqau 30 mamyrǧa deiın jalǧasady.
Baiqau äkımşısı – Astana qalasynyŋ Işkı saiasat basqarmasy. Ūiymdastyruşylar būl joba arqyly Astana tūrǧyndary men qonaqtarynyŋ mädenietın damytu, «EKSPO-2017» mamandandyrylǧan halyqaralyq körmesı qarsaŋynda jaŋa mädeni trend qalyptastyrudy közdeitınderın aitady. Bır kezeŋnen tūratyn baiqau internet-resurstar men äleumettık jelılerde ötkızıledı.
Fotosurette nemese eskiz-ideialarda meiırımdı, aqjarqyn, jüzı jyly, sypaiy adamdar beinesın körsetu kerek jäne fotosuret mındettı türde Astanada tüsırıluı qajet. Al eskiz-ideiada elorda körınısı, basty ǧimarattar körsetıluı tiıs.
Fotosuret nemese eskiz-ideia #aqjarqynastana nemese #smileastana heştegterımen äleumettık jelıge qoiyluy şart. Būǧan qosa Astana tūrǧyndary men qonaqtaryn joǧary mädeniet qalyptastyrudy qoldauǧa şaqyratyn özektı nemese avtorlyq sitatalar jazuǧa bolady. Alaida mūny oryndau mındet emes.
Jeŋımpazdyŋ eskiz-ideiasy nemese fotosuretı Astanadaǧy jarnamalarda, LED-ekrandarda, qalalyq äkımdıktıŋ resmi saitynda jäne äleumettık jelılerde ornalastyrylady. Sonymen qatar merekelık şaralardy bezendıru jäne ötkızu barysynda brendbuktarda qoldanylady.
Amanǧali QALJANOV
