Ainala tıgılgen qyzyldy-jasyldy şatyrlardan aiaq alyp jürgısız. Olardyŋ 80 şatyryna syrttan kelgen bardtar ornalassa, 40 şatyrǧa elordalyqtar jaiǧasty. Al, qaladan konsert tamaşalauǧa aǧylǧan halyq sanynda şekteu bolmady.
Qazaqstannyŋ barlyq aimaqtarynan atyşuly festivalge taily-tūiaǧy qalmai bardtar aǧyldy. Tek bızdıŋ elımızden kelgen qonaqtar ǧana emes, jalpy avtorlyq änderdı janyna jaqyn balaǧan änsüier qauym osy şatyrly auyldan tabyldy.
Festival ūiymdastyruşylary – Astana qalasynyŋ äkımdıgı men «Dominanta» avtorlyq änder qory. Jyl saiyn ötkızılıp, ataǧy aspandap ketken festival jyldan jylǧa keregesın keŋeitıp keledı.
Bard änşılerdıŋ süiıktı basqosuyna ainalyp, onyŋ män-maŋyzynyŋ artuynyŋ aiǧaǧy bola bastady. Jalpy, sonau 1979 jyldan berı bastau alyp kele jatqan än merekesı 1999 jyldan berı halyqaralyq märtebege ie. Būǧan deiın de festivalge tanymal bard änşıler leg-legımen kelıp jatatyn. Olardyŋ arasynda TMD aumaǧyna etene tanys avtor-qonaqtar az bolǧan joq. Mysaly, bard änşıler pır tūtatyn Aleksandr Dulov, Aleksandr Suhanov, Viktor Luferov, Mihail Kochetkov, İrina men Mihail Stoliarlar, Andrei Şiriaev, Raisa Nurmuhametova (Mäskeu), Iýrii Kunin jäne Evgenii Kliachkin (Sankt-Peterbor), Andrei Kozlovskii (Vologda), Gennadii Perevalov (Ekaterinbor), Şuhrat Husainov (Samara), Olga Kachanova, Vadim Kozlov (Almaty), Nikolai Starchenkov (Tümen), Leonid Marakov (Krasnoturinsk), Jenis İskakov (Omby), Sergei Aksenov (İvanovo), Mereke İskakov (Krasnoiarsk) syndy tanymal bardtar astanalyq dumandy jylda jıbermeidı.
Osy jyly bardtardyŋ festivalıne sonau Mäskeuden at aryltyp jetken Aleksandr Viniskii, Tobyldyŋ tumasy Vera Votinseva syndy maitalmandar qatysyp, Arqanyŋ dalasynda än üş kün äueledı.
Oǧan künnıŋ közın şarby būlttar tūmşalaǧany da, nöserdıŋ qūiǧany da kedergı keltıre almady. Qaita aspannan tökken jauyndy nūrǧa balap, quanǧan, şabyt şaqyrǧan şyǧarmaşyl jandar bır jasap, mäz bolysty.
«18-dıŋ jasy» dep atalatyn bölımde tek jas bardtardyŋ oryndau mänerı synaldy. Közge tüsken jas talanttardyŋ köbeiuın qazylar alqasy joǧary baǧalap jatty. Är qalanyŋ atynan ortaǧa şyqqandar da ūtymdy söz tauyp, ūtqyrlyqtaryn paş ettı. Balalar şyǧarmaşylyǧyna da zor män beretın festival, «Altyn kılt» atalymynda jasöspırımder men jetkınşekterdıŋ jauqazyn jyrlaryn tyŋdady. Keşke taman alau maŋyna toptasqan änşıler än- jyrdy kemerınen asyryp, tögılttı.
Avtorlyq änder soŋǧy jyldary örısın keŋeitıp, örge basyp keledı. Köpşılık arasynda mūndai änderdıŋ tez taralatyny da belgılı. Onyŋ tüp negızı orys bardtarynyŋ köptıgınen bolsa, ekınşıden, osynau halyqaralyq festivalderdıŋ köptep ūiymdastyryluy da sebepşı.
Sonymen, qazylar alqasyn Veronika Votniskaia (Tümen), Roman Lankin (Tom), Lidiia Chebok- sarova men Evgenii Bykovtyŋ otbasylyq duetı, Sergei Truha- nov, Aleksandr Viniskii, Aleksandr Rodovskii, Jeŋıs İskakov (Mäskeu) jäne qazaqstandyq Aleksandr Gubert pen Evgenii Zininder qūrady. Olardyŋ baǧalauymen jetı diplomant ırıkteldı. Jeŋımpazdar mynalar boldy: kompozitor Boris Gordienko (Astana), avtorlar Qairat Keŋesov (Almaty) pen Myrzamūrat Qaşarbaev (Şymkent).
Al, ansamblder arasynan suyrylyp şyqqandar Ombydan kelgen «Kazansevter» ansamblı boldy. Olardyŋ soŋyn ala jerlesterı «Kamerton» ansamblı joǧary marapatqa ie boldy. Petropavlovskıden kelgen «Nadejda» ansamblı de diplomant atandy. Qaraǧandylyq änşıler Natalia Cheparskaia men İrina Juravleva da top jaryp şyǧyp, diplomant märtebesın qanjyǧaǧa bailady.
Barlyǧy 50-den asa jeke änşı jäne 7 top qatysqan festivaldıŋ körıgı keşkı alau kezınde erekşe qyzdy. Aua-raiy da keşqūrym qarailasyp tūrdy. Eŋ bastysy, būl basqosu än men dostyq saltanat qūrǧan meiramǧa ūlasty.
Bır ättegen-aiy, mūndai mereke halyqaralyq bolǧannan keiın änder köbıne orysşa aitylady. Būl orys intelligensiiasynyŋ qalybyna salynyp bara ma degen kümändar aityla bastady. Tabyldyŋ ızın basqan, qazaqşa sairaǧan qaraköz bard änşıler qatarynan tabylyp, töbe körsete almai keledı.
Şynar ÄBILDA
