Būqaralyq aqparat qūraldary qyzmetkerlerı künıne orai Nūr-Sūltan qalasynyŋ äkımı Altai Kölgınov «Elorda Aqparat» ūjymymen kezdesıp, jurnalisterdı käsıbi merekesımen qūttyqtady.
Kezdesuge äkımmen qatar Nūr-Sūltan qalasy Işkı saiasat basqarmasynyŋ basşysy Däuren Babamūratov, qalalyq basqarmalardyŋ, audandyq äkımdıkterdıŋ baspasöz hatşylary qatysty.
«Elorda Aqparat» mediaholdingınıŋ qūramyna «Astana aqşamy», «Vecherniaia Astana» gazetterı men «Elorda.info» jelılık basylymy kıredı.
Bas qalanyŋ basty basylymdary – «Astana aqşamy» men «Vecherniaia Astana» gazetterı 1990 jyldan bastap şyǧady. «Astana aqşamy» gazetı būdan būryn Memleket basşysynyŋ Alǧys haty men «Nūr-Sūŋqar» syilyǧyn ielengen bolatyn.
Altai Kölgınov Memleket basşysynyŋ, äkımdıktıŋ jūmysyn, qaladaǧy qoǧamdyq-saiasi jäne äleumettık-ekonomikalyq salalarda türlı bastamalardyŋ jüzege asyru barysyn aqparattyq qoldauda mediaholdingtıŋ rölı maŋyzdy ekenın basa aitty.
«Bas şahardyŋ tynysyna ainalyp ülgergen ūjym qyzmetkerlerıne jükteletın mındet qaşan da jauapty ärı kürdelı.
Barşaŋyzdy bügıngı merekemen şyn jürekten qūttyqtaimyn. Sızder bas qaladaǧy jaŋalyqtyŋ jarşysyna ainaldyŋyzdar. Künı keşe Memleket basşysynyŋ Alǧys haty «Vecherniaia Astana» qoǧamdyq-saiasi gazetınıŋ şyǧarmaşylyq ūjymyna tabystalǧan bolatyn. Būl – sızderdıŋ eŋbekterıŋızdıŋ jemısı. Prezident Qasym-
Jomart Toqaev aitqandai, qazırgı aqparat aidynynda jalǧan aqparattardy taratuşylar köbeiıp kettı. Osyndai kürdelı jaǧdaida jaŋalyqtardy obektivtı türde berude käsıbilık maŋyzdy. Aqparat aǧynyna ılesu öte ülken eŋbektı talap etedı. Bızdıŋ atqaryp jatqan jūmystarymyz elordalyqtarǧa sızder arqyly jetedı. Būl ūjym qala tūrǧyndary men äkımdıktıŋ arasyn jalǧap tūrǧan altyn köpırge ainaldy» dedı şahar basşysy.
Qala basşysy Altai Seidırūly ärqaisysy apta saiyn 15 myŋ danamen oqyrmanǧa jetıp jatqan basylymdardyŋ şejıresımen, tynys-tırşılıgımen, sondai-aq saittyŋ jūmysymen jıtı tanysyp şyqty.
– Redaksiia jūmysymen tanysu barysynda Elorda.info saityna jyl basynan berı kıruşıler sany 1,16 mln adamǧa jetkenın baiqadym. Tıptı, sait jaŋalyqtary respublikalyq telearnalardan da berıledı. Būl – jaqsy körsetkış. Eŋbekterıŋız jana bersın. Şyǧarmaşylyq şabyt, tolaǧai tabys tıleimın, – dedı qala äkımı.
Merekelık jiyn barysynda elorda äkımı Altai Kölgınov mediaholding qyzmetkerlerıne jäne äkımdıktıŋ, qala basqarmasynyŋ, audan äkımdıkterınıŋ baspasöz hatşylaryna qūttyqtau hat tabystady.
Sonymen qatar kezdesude äkım ūjym qyzmetkerlerımen äŋgımelesıp, olardyŋ kökeiınde jürgen sūraqtarǧa jauap berdı. Olardyŋ problemalaryn, onyŋ ışınde ūjym qyzmetkerlerınıŋ jalaqysyn köteru mäselesın şeşuge uäde ettı.
«Tılşıler kündelıktı jedel ärı senımdı aqparat taratyp, türlı taqyryptaǧy mäselelerdı qozǧaidy. Ūjym qyzmetkerlerı pandemiiamen küres, qaŋtar oqiǧasy, referendum kezınde de qala tūrǧyndaryn senımdı jäne özektı aqparattan habardar etıp, aldyŋǧy şepte qyzmet ettı» dedı şahar basşysy.
Mediaholding basşysy Erlan Qarabalaev ta ärıptesterıne öz qūttyqtauyn arnap, jiyn soŋynda «Vecherniaia Astana» gazetı bas redaktorynyŋ orynbasary Şolpan Aqbalaeva men «Astana aqşamy» basylymynyŋ şoluşysy Amanǧali Qaljanovqa «Aqparat salasynyŋ üzdıgı» tösbelgısın tabystady.
Gülbarşyn
Ökeşqyzy
