Astana qalasy äkımdıgınıŋ qoldauymen elordanyŋ 25 jyldyq mereitoiyna arnalǧan «Jasai ber, jainai ber, Astana!» respublikalyq müşäira jeŋımpazdary anyqtaldy. Aqyndar alamanyna elımızdıŋ är aimaǧynan belgılı jyr jüirıkterı bastap, jas talapkerler qostap 100-den asa aqyn qatysty.
Müşäiraǧa tüsken şyǧarmalardyŋ ışınde kölemdı dastandar da boldy. Konkurs şartynda poema bolmaǧandyqtan, būl şyǧarmalar qazylar alqasynyŋ talqysyna ūsynylmady. Belgılı qalamgerlerden qūralǧan qazylar alqasy şyǧarmalardy sūryptai kele 12 aqynǧa bäige berdı.
Qazaqstan Jazuşylar odaǧynyŋ hatşysy, osy ūiymnyŋ Astana qalasy filialynyŋ direktory, Qazaqstannyŋ eŋbek sıŋırgen qairatkerı Däuletkerei Käpūly töraǧalyq etken qazylar alqasynyŋ qūramynda Memlekettık syilyqtyŋ laureaty Nesıpbek Aitūly, belgılı aqyn, Mädeniet qairatkerı Sūraǧan Rahmetūly, filologiia ǧylymdarynyŋ doktory Bauyrjan Jaqyp, jazuşy-publisist, Qazaqstannyŋ eŋbek sıŋırgen qairatkerı Janbolat Aupbaev boldy.
Bas bäige «Astananyŋ aspany» atty toptama öleŋderı üşın körnektı aqyn, Abai atyndaǧy Memlekettık syilyqtyŋ laureaty Ǧalym Jailybaiǧa berıldı. Bırınşı oryndy jas aqyn, «Daryn» memlekettık jastar syilyǧynyŋ laureaty Arman Şerizattyŋ «Azattyq mūnarasy» atty öleŋı aldy. Ekınşı ekı orynnyŋ bırı Mūrat Şaimarannyŋ «Topyraq» atty toptama öleŋderıne, ekınşısı «Täuelsızdık köşesınıŋ tūrǧyny» öleŋı üşın belgılı aqyn, respublikalyq «Türkıstan» gazetınıŋ bas redaktory Bauyrjan Babajanūlynyŋ qanjyǧasyna bailandy. Üşınşı üş oryn belgılı aqyndar Düken Mäsımhanūlynyŋ «Astanam – menıŋ aibynym» öleŋder toptamasyna, Elena Äbdıhalyqovanyŋ «Astana. Bastau» öleŋder toptamasyna, Äbdıǧani Bäzılhannyŋ «Bögenbaidyŋ Qaraötkelı» tolǧauyna berıldı.
Bes yntalandyru syilyǧy Şyryn Tolqynova (Almaty oblysy), Ūlarbek Nūrǧalym (Astana), Nazgül Berdıqoja (Qyzylorda), Baqytjan Raisova (Öskemen), Baǧdat Mübärak (Almaty) qatarly aqyndarǧa būiyrdy.
Marapattau saltanaty 27 mausym künı Astana qalasynda ötedı.
