Erkeǧali Rahmadiev atyndaǧy Memlekettık akademiialyq filarmoniianyŋ qazaq orkestrı kompozitorlar Aitqali Jaiymov pen Arman Jaiymnyŋ ekı aktılı «Beibarys» operasynyŋ premerasyn ūsyndy. Qypşaq dalasynda tūtqynǧa alynyp, jat jerde erekşe erlıgımen, asqan talantymen qūldyqtan qairatkerlıkke deiın köterılgen daŋqty Beibarys sūltan turaly jazylǧan dünieler, muzykalyq şyǧarmalar köp. Astanada ötken premera – sonyŋ bıregeiı.
Qazaq dalasynyŋ ūly perzentı, 1260-1277 jyldary Mysyr men Siriiany bilegen ataqty qolbasşy, körnektı memleket qairatkerı Sūltan Beibarys turaly operanyŋ konserttık premerasyn elordanyŋ mädeni ömırındegı jarqyn oqiǧa dep atauǧa bolady. Opera jasau ideiasyn 2003 jyly kompozitor Aitqali Jaiymov ūsyndy. Sol kezde konservatoriiany bıtırgen Arman Jaiym qatysqan alǧaşqy nūsqasy 2007 jyly şyqty. Material
boiynşa jūmys keiıngı jyldary da jalǧasty. 2013 jyly Qazaq filarmoniiasy orkestrınıŋ oryndauyndaǧy konserttık nūsqasy şyqty. Ötken jyly avtorlar būl taqyrypqa qaita oralyp, būrynǧy jasaǧanyn qaita öŋdep, qazaq orkestrıne arnaiy jazylǧan şyǧarma E.Rahmadiev atyndaǧy Memlekettık akademiialyq filarmoniianyŋ sahnasynda bas dirijer, Qazaqstannyŋ eŋbek sıŋırgen qairatkerı, professor Aitqali Jaiymovtyŋ körkemdık jetekşılıgımen körermen nazaryna ūsynyldy.
Libretto avtorlary – körnektı aqyn, Memlekettık syilyqtyŋ laureaty Ūlyqbek Esdäulet pen Qazaqstannyŋ eŋbek sıŋırgen qairatkerı Aitqali Jaiymov.
Operanyŋ konserttık nūsqasyn şyǧaruǧa kameralyq hor (körkemdık jetekşısı jäne bas dirijerı – Qazaqstan Respublikasynyŋ eŋbek sıŋırgen qairatkerı, professor Gülmira Qūttybadamova), «Şalqyma» halyq bi ansamblı (körkemdık jetekşısı – Qazaqstannyŋ eŋbek sıŋırgen qairatkerı Äbdırasul Esekeev), Ūlttyq ūlan än-bi ansamblınıŋ bi toby (körkemdık jetekşısı – Elmira Baqqali) men Qorǧanys ministrlıgı ūlttyq äskeri-patriottyq ortalyǧynyŋ bi toby (körkemdık jetekşısı – kışı serjant Älışer Mūhataev), klassikalyq vokal bölımı (körkemdık jetekşısı – mädeniet salasynyŋ üzdıgı Roza Şotqalieva) qatysty.
Opera partiialaryn filarmoniianyŋ klassikalyq vokal bölımınıŋ solisterı oryndady, Beibarysty – Altynbek Äbılda, Liudoviktı – Nūrsat Almas, Aidanany – Şahrizada Tynyştyq, Qalauyndy Altynbek Arystanbek somdasa, Kündık rölınde Talǧat Allabirinov oinady.
