Beibıt künnıŋ bärı jeŋıs
Keŋes Odaǧynyŋ batyry, nömırı bırınşı Halyq Qaharmany, qazaqtan şyqqan tūŋǧyş armiia generaly, täuelsız Qazaqstannyŋ eŋ alǧaşqy Qorǧanys ministrı.Ol turaly köp jazyldy.Ol turaly köp aityldy. Sanada jattalsa da, bahadürdıŋ otty jyldaryn taǧy bır şolyp ötelık.
Saǧittyŋ suyq habary
Saǧadat Nūrmaǧambetov – ırgedegı Aqmola öŋırınıŋ tumasy. 1924 jyly tuǧan. Äkesı Qojahmettıŋ şekesı torsyqtai ūlyn köre almai ketkenı ökınıştı… Jartykeş jetım alty jasynda-aq tūl jetımge ainaldy. Qos qaraşyǧyn Qūdaiǧa tabystap, anasy Aisa da baqilyq boldy. Alaida, bala Saǧadat aiauly ana beinesın köz aldynan, äŋgımelerın sanasynan öşırıp pe?..
Tuys atasy Äljan aqsaqaldan estıgen batyrlar jyrlary bau-lydy Saǧadatty. Qobylandy, Alpamys sekıldı oǧlandardyŋ jaularyn ylǧi küirete jeŋetını onyŋ jıgerın janyp, erte eseittı. Rasynda, erte eseitken taǧdyr talaiy-au. Jetımdıkpen ötken balalyq şaq, soǧys jyldaryna döp kelgen bozbalalyq şaq. Jalǧyz tıregı, süienışı Saǧit aǧasy maidanǧa attanǧan. Köp ūzaǧan joq, qara qaǧaz keldı. «…Pskov tübınde ız-tüzsız joǧalypty. Saǧit qarapaiym eŋbekker boldy, şahtada, odan keiın kolhozda jūmys ıstedı, – dep eske aldy general. – Soǧys bastalysymen, artyna jary men ekı balasyn qaldyryp, maidanǧa attandy. Jolda ketıp bara jatyp ekı hat joldap ülgerdı. Bırınşı hatynda tün qata Mäskeuden ötkenın jazsa, ekınşısınde – Pskov maŋynda alǧaşqy ūrysqa kırıskenderın, kün qaqap tūrǧanyn aitqan… Būl 1941 jyldyŋ soŋy bolatyn. Onan keiın habarsyz kettı».
İä, jalǧyz aǧadan kelgen suyq habar Saǧadattyŋ keude tūsynyŋ astan-kesteŋın şyǧarǧan. Sol tündı köz ılmei atyrǧan ol meselın qaita-qaita qaitarǧan äskeri ko-missariatqa taǧy jol saldy. Būl joly kökıregın aşu-yza, kek kernei keldı. Aǧasy üşın eşteŋeden taiynar emes…
Qosymnan Berlinge deiın
Ädette, maidanǧa jazylu üşın kelgen tübıtmūrt bozbalalarǧa äskeri komissarlar: «Aldymen mūryndaryŋdy sürtıp alyŋdar!» dep külkı etetın. Būl joly közı otty, zerek Saǧadatty bırden baiqady olar. Saiasi aǧartu qyzmetkerlerı kursyna jıberdı, kelesı jyly äskeri uchilişege böldı. Därıgerlık komissiiadan ötpei qalǧan jerlesterı maidanǧa attandy. Dostarymen qimai qoştasty. Jeŋıspen oralyp, auylda kezdesuge uaǧdalasty…Köp ūzamai Qosymnan şyqqan keşegı bala da batysqa bet tüzedı. Ä degennen pulemetşıler vzvodymen Soltüstık Kavkazdaǧy Kurka özenındegı nemıs qorǧanysyn talqandady. Qaitpas jürektılık pen qyraǧylyq, aǧasynyŋ ölımı üşın kek alu sezımı men ärbır jauyngerdıŋ ömırın saqtap qaluǧa degen qamqorlyq, ülken jauapkerşılık pen balalyq qyzbalyq onyŋ boiynda aralasyp, özgelerdı tyŋdatuǧa mäjbürledı.
Soǧysta sūrapyl künderdı Saǧadat az keşken joq. Vzvodtan keiın pulemetşıler rotasyn basqardy. Odaqtyq kömır basseinı atanǧan Donbasty azat etuge qatysty. Makeevka qalasyn jaudan azat etu qandai qiynǧa soqty, qalanyŋ är üiın, alaŋyn, köşesın jaudan tazartu oŋai bolǧan joq. Jaumen betpe-bet aiqasuǧa tura keldı. Jaudy tyqsyryp, qaladan şegınuge mäjbürledı. Bıraq şyǧynsyz bolmady. Jauyngerler adam tüsıne kırmeitın erlık körsettı. Dneprden ötu kezınde de äskerler asqan tözımdılık pen tapqyrlyq tanytty.
Ūstaz bolsam dep edım…
Jazmyştan ozmyş joq. Äitpese, Saǧadat armiia generaly boludy emes, geografiia jäne tarih pänınıŋ mūǧalımı boludy armandapty. Būl pänderge degen yqylasy erekşe bolǧan. Jūmuly közben ol älem kartasynan kez kelgen jerdı körsetıp bere alady. Sol kezde kartany körsetkış taiaqşamen emes, Europany jaudan azat ete otyryp, barlyq qala men dalany özı jürıp ötetının, keiınnen jas memleket ükımetınıŋ müşesı retınde bükıl älemdı şarlaitynyn bıldı me?..
Qyryq bırınşı jylǧy soǧys onyŋ mūǧalım bolsam degen armanyna tosqauyl qoidy. Saǧittyŋ kegı, Alaş azamattarynyŋ qany balaŋ keudenıŋ namysyn oiatyp, qolyna qaru ūstatqan. Osy soǧys Saǧadattyŋ küllı ǧūmyryn, armanyn bır päste özgertıp, äskeri ıstıŋ adamyna ainaldyrdy.
Berlinge basa-köktep kırdı
Tarih derekterıne köz salsaq, Saǧadattyŋ erlıkterın aiqyndaityn qūjattar köptep kezdesedı. Batyrdyŋ 1945 jylǧy säuırde ekınşı märte «Altyn jūldyz» medalımen marapattalǧany aian. Onda 1052-atqyştar diviziiasynyŋ komandirı, Keŋes Odaǧynyŋ batyry A.Peşkov pen ekınşı därejelı Suvorov ordendı 301-atqyştar diviziiasynyŋ komandirı V.Antonovtyŋ qoldary bar. Ūsynystaǧy däleldemege jazylǧan joldardy oqiyq: «Maior Nūrmaǧambetovtıŋ qolbasşylyǧyndaǧy batalon 1945 jyldyŋ 14 säuirinde jaudyŋ küşti nyǧyzdalǧan qorǧanystaryn būzyp, az uaqytta nemisterdiŋ batystaǧy bas qorǧanysyn üzip jäne transtardyŋ bes syzyǧyn aldy, söitıp, tankter men özge batalondardyŋ iske qosyluyna mümkindik berdi. Üş saǧatta qalanyŋ şetımen soltüstık-şyǧysqa bettei ärı qaraiǧy jetistikti damytty… Batalon ekı jüz gitlerşıldı, on segız oq atu nüktesın, segiz tırek punktın joiyp, alpys toǧyz jauynger men jau ofiserin tūtqyndady. Maior Nūrmaǧambetovtıŋ atqyştar batalony 23 säuır künı batys jaǧada bekıngen Treptov qalasy maŋyndaǧy Şprede özenın bırınşı bolyp keşıp öttı… 24 säuırde Berlin qalasynda jaudyŋ tabandy kedergisin syndyryp, basa-köktep kirdi. Mūnda asqan şeberlık tanytqan maior Nūrmaǧambetovtıŋ batalony 450-den astam gitlerşıldı joiyp, 1 560-yn tūtqynǧa alyp jäne toǧyz tirek punktın qūrtty. Maior Nūrmaǧambetov būl şaiqasta jaralanǧan».
Soǧystan jetken ekınşı suyq habar
«Tura bide tuǧan joq» demei me?.. Otan aldyndaǧy boryşyna asqan adaldyqpen qaraǧan Saǧadat Orta Aziia äskeri okrugınıŋ eŋ bedeldı basşylarynyŋ bırı bola tūryp, özınıŋ aǧaiyn nemeresın Auǧanstanǧa soǧysqa jıberdı… Al būl şaqta özınen şenı tömen ofiserler ötırık-şyny aralas syltaumen jaqyndaryn äsker qatarynan alyp qalyp jatqan. Ökınışke qarai, qatardaǧy jauynger Keŋes Nūrmaǧambetov dūşpandardyŋ oǧynan qaza bolyp, otbasyna şaiqas alaŋynan ekınşı ret qaraly habar keldı.
Qorǧanys ministrlıgınıŋ qorǧany
Ömırınıŋ eŋ ülken kezeŋı – 1942 jyl men 1996 jyl aralyǧyn ol äskeri kareraǧa arnady. Jas täuelsız memlekettıŋ Qorǧanys ministrlıgın qūrǧan tūŋǧyş jan boldy. Ärine, taqyr jerden emes, armiia ömır sürdı, bıraq… generaldyŋ özı aitqandai, qazaqtar arasynda polk komandirı bolatyn bırde-bır jan joq edı. «Basqaruǧa, būiryq şyǧaruǧa beiımı bar degenderdı özım Türkiia, Reseige oquǧa jıbergen kezım boldy. Qazır solardyŋ köpşılıgı – general. General degennen şyǧady, osy ömırıme deiın bızdıŋ şaqşa basymyz ne körmedı? Jetımdıktı de, aşarşylyqty da, ūjymdastyrudy da, otyz jetınıŋ zūlmatyn da, milliondardy jalmaǧan sūm soǧysty da kördık. Soǧystan keiıngı elu tört jyl ǧūmyrymdy osy äskeri salaǧa sarp ettım. Ömırdıŋ mūz qaryǧan suyǧyn da, ot janyǧan ystyǧyn da ötkerdık» deidı Saǧadat.
«Jerın kör de, qazaqty kör!»
Osynşa şarualardy tyndyrǧan batyr talai eldıŋ däm-tūzyn tatqanyn aittyq. Sonda barǧan memleketterınıŋ ataq-şenderı dardai şeneunıkterı: «A gde Kazahstan?» dep sūraityn körınedı. Odan berı az jyl ötse de talai zaman özgerıp ülgerdı emes pe? Rasynda da, bılmes, tanymas. Sondyqtan bolar, Sahaŋnyŋ janyndaǧy özımızdıŋ jıgıtter bır uys bolyp, ündemei qalady eken. Alaida, tosylyp qalatyn Saǧadat pa? Tıkbaqai mınezıne basyp: «Aldymen ana döŋgelegıŋdı (globus) süzıp şyq. Sonda Euraziianyŋ kındık tūsynda ekı myŋ jetı jüz şaqyrymǧa sozylyp jatqan jerdı köresıŋ. Jerın kör de, osynşama ūlan-baitaq alqapty tūmsyqtyǧa şoqtyrmai, qanattyǧa qaqtyrmai saqtap qalǧan qazaqty kör» deidı ǧoi. Mıne, qazaqtyŋ generaly, qazaqtyŋ qaharmany! Onyŋ «Däl bızdei qoinauy qazynaǧa bögıp jatqan el joq şyǧar» dep masattana söilegenın estıgender de köp.
P.S. Bügınde Astana qalasynda general Saǧadat Nūrmaǧambetov atyndaǧy «Jas ūlan» respublikalyq mektebı bar. Al, ondaǧy bolaşaq sarbazdar bahadür atalarynyŋ ömırı men erlıgın ülgı tūtady.
Ashat RAIQŪL