Qazaqstandyq «FORTE TRIO» memlekettık triosy Europa mädenietınıŋ ortalyǧy Berlin filarmoniiasynda öner körsetıp, şetel körermenderın taŋǧaldyrdy.
Bethovennıŋ skripka, violonchel jäne orkestrmen fortepianoǧa arnalǧan ataqty konsertın otandyq ärtıster Berlin simfoniialyq orkestrımen bırge oryndady. 2200 körermenge arnalǧan ülken zal lyq toly boldy, konsert biletterı nebärı ekı-aq künde satylyp ketken. Būl pandemiia bastalǧaly berı alǧaşqy tolyq anşlag jinaǧan konsert boldy. Konsertte körermennıŋ ataqty orkestrge degen ystyq yqylasy, Bethoven muzykasynyŋ tanymaldyǧy men qazaqstandyq muzykanttardyŋ önerıne degen zor qyzyǧuşylyq keremet üilesım tapty.
«Älemdık qauymdastyq elımızdı qaŋtardaǧy oqiǧalardyŋ saldarynan saiasi kataklizmder arenasy retınde qabyldaǧany belgılı. Bıraq «FORTE TRIO» öz önerlerı arqyly Qazaqstandy mädenietı joǧary deŋgeide damyǧan, özındık muzykalyq dästürlerı qalyptasqan memleket retınde körsete bıldı. Trionyŋ önerın joǧary baǧalaǧan şeteldıkter bızdıŋ ärtısterdı konsertten keiın sahnaǧa taǧy 5 ret şaqyrdy» dedı «Qazaqkonsert» direktorynyŋ orynbasary Laura Ahmetova.
Ötken jyldyŋ jeltoqsan aiynda «FORTE TRIO» Fransiianyŋ 4 ırı qalasynda konsert ötkızıp, osy eldıŋ 2021 jylǧy konserttık mausymyn aiaqtaǧan edı.
Qazaqkonsert qūramynda öner körsetetın «FORTE TRIO» ansamblı Qazaqstannyŋ eŋbek sıŋırgen qairatkerı Timur Urmancheevtıŋ körkemdık jetekşılıgımen öner körsetedı. Ūjymnyŋ maqsaty – qazaqstandyq klassikalyq muzykany älemge tanytu. Qazaqstandyqtar «FORTE TRIO» ūjymynyŋ önerın 2 nauryz künı «Astana opera» teatrynda «Liubite li vy Bramsa?» atty jaŋa konsertte tamaşalai alady.
Baian Asylbekova
