Ol «äkesın körıp, oq jondy». Ol özınen ülken däulerdı alyp-jyqty. Ol – «Qazaqstan barysy» atandy.
Mūhit Tūrsynov. Ekı közımızdı tört etıp, taǧatymyzdy tauysqan «Qazaqstan barysynyŋ» törtınşı mausymynda top jarǧan jıgıt. Mūhittyŋ äkesı Şyŋǧysbek – baluannyŋ jeke bapkerı. Osylaişa şyǧys qazaqstandyq äkelı-balaly ekeudıŋ tökken terı eş ketpei, biylǧy turnirdı baǧyndyru baqytyna ie bolǧan jaiy bar.
Astana künı qarsaŋynda ötken jarys basynda «Aldaspan», «Alaş ūly» syndy öner ūjymdary muzykalyq şaşumen «bolǧanynan boladysy qyzyq» toidyŋ körıgın odan ärı qyzdyra tüskendei jaqsy äser qaldyrdy. Al, jer-jerden şyqqan aiqai men soǧylǧan şapalaqtan qūlaq tūnady. Mıne, biylǧy turnir osylai bastalǧan edı.
«Jalyn» degen bürkenşık atpen öner körsetken jeŋımpaz finalda qaraǧandylyq «Jas sūŋqar» – Asyl Bärmenovten ailasyn asyrdy. Negızgı uaqytta bırın-bırı jeŋe almaǧan qos baluan kezdesu soŋyndaǧy qoian-qoltyq beldesu arqyly ǧana kım myqtyny anyqtaǧan bolatyn.
Turnir qorytyndysynda, 2014 jylǧy «Qazaqstan Barysy» Mūhit Tūrsynov 150 myŋ AQŞ dollaryn qanjyǧasyna bailasa, onyŋ bapkerıne, iaǧni äkesı Şyŋǧys Tūrsynovqa 20 myŋ AQŞ dollary tabystaldy. Al, ekınşı oryn ielengen Asyl Bärmenov 30 myŋ dollar kölemınde syiaqy alsa, onyŋ bapkerıne 10 myŋ AQŞ dollary ūsynyldy.
Üzdık üştıkke talasqan kezdesude Qyzylordadan kelgen «Syr barysy» Ruslan Äbdırazaqov jambyldyq «Talas arlany» – Däulethan Jaqypovtyŋ jauyrynyn jer iısketıp, tartysty kezdesudıŋ negızgı uaqyty tämamdalmai jatyp-aq qola belbeudı belıne taqty. Sondai-aq, ol 10 000 AQŞ dollaryna tatityn chekke ie boldy. Jeke bapkerı de marapattan qūr qalmai, 3 000 AQŞ dollary kölemındegı syiaqyny qaltasyna basty. Al, körermenderdıŋ közaiymyna ainalǧan Däulethan Jaqypov ūiymdastyruşylar tarapynan arnaiy syilyq – «Hyundai Elantra» kölıgıne otyrdy.
Sonymen qatar, boz kılemge «Qazaqstan barysynyŋ» byltyrǧy jeŋımpazy, Şyǧys Qazaqstan oblysynyŋ ükılegen ümıtı Aibek Nūǧymarov şirek finaldyŋ aldynda qola jüldeger qyzylordalyq Ruslan Äbdırazaqovqa eşkım kütpegen jerden ūtylyp qaldy. Osylaişa 95 kelıdegı «Syr barysy» özınen 20 kelı auyr ärı atynan at ürketın qarsylasynan eş qaimyqpai, taza jeŋıspen kelesı kezeŋge öttı.
Mūhittyŋ būl jeŋısın zaŋdylyq dep aityp jatqandar da bar. Öitkenı, ol 2012 jyly «Qazaqstan barysy» atanǧan ärı «Euraziia barysy» Beibıt Ystybaevtan ailasyn asyryp kettı. Al, Beibıt biylǧy turnirdıŋ negızgı favoritterınıŋ bırı sanalatyn.
Şara soŋyndaǧy jeŋımpazdardy marapttau räsımınde eldıŋ beldı azamattary sözderın aityp, jeŋgen baluandardy qūttyqtasa, jeŋılgenderdı moiymauǧa şaqyrdy. Solardyŋ ışınde qala äkımı İmanǧali Tasmaǧambetov, «Nūr Otan» partiiasy töraǧasynyŋ bırınşı orynbasary Bauyrjan Baibek, QR Sport jäne dene şynyqtyru ısterı agenttıgınıŋ töraǧasy Tastanbek Esentaev jäne daŋqty paluan Jaqsylyq Üşkempırov siiaqty tūlǧalar boldy. Sondai-aq, körermender arasynda ūtys biletterı oinatylyp, joly bolǧan adamǧa kölık berıldı.
Biylǧy turnirge qatysuşylardyŋ sany 33 emes, 28 bolǧanyn aitqanbyz. Olardyŋ negızgı sebebı – doping qoldanǧandarynda. Iаǧni, memlekettık «Dopingke qarsy ūlttyq ortalyq» mekemesınıŋ 2014 jylǧy 20 mamyrdaǧy dopingtık synama qorytyndysyna säikes, qanynyŋ qūramynda dopingtık zat anyqtalǧan Batys Qazaqstan oblysynyŋ baluany Damir Qalaqov, Qostanai oblysynyŋ baluany Mihail Tverdohlebov, Astana qalasynyŋ baluany Nūrǧali Baitaraqov jäne Maŋǧystau oblysynyŋ baluany Manas İmanqūlov finaldyq bäsekeden şettetılgen edı.
Nūrislam Qūspanǧali
