Bır kem dünie
Beisenbı künı Qazaq elı Şeraǧaŋdai ardaqtysyn aqtyq saparǧa şyǧaryp saldy. Särsenbı künı İmanbai Jūbai aǧamyz Feisbuktegı paraqşasynda: «Erteŋ, 11 qazan künı, saǧat 10.00-de Astana qalasy Qazmedia ortalyǧy kinokonsert zalynda ūly tūlǧa, memleket jäne qoǧam qairatkerı Şerhan Mūrtaza aǧamyzdyŋ qaitys boluyna bailanysty qaraly miting ötkızıledı» degen aqparat taratty. Şeraǧaŋ turaly estelıkter tyŋdaiyq, «qoştasudan qalmaiyq» dep ekı ökpemızdı qolymyzǧa alyp Qazmediaǧa jettık. Masqara-ai! Otyrardyŋ qamalyndai bolǧan ǧimaratqa jarty saǧat boiy kıre almadyq.
Küzetşıler kırgızbedı. Keiın estıgenımızdei, qaraly jiynǧa şaqyrylǧandardyŋ arnaiy tızımı jasalypty. Tızımde joqtar Alaştyŋ aibarly ūlymen qoştasa almady. Ärıptesım Azamat Esenjol ekeumız «Qazaqstan» ūlttyq arnasynyŋ qabyldau bölmesıne telefon soqtyq. Ortalyq esıkke ekı ret, büiırdegı esıkke ekı ret bardyq. Eş qairan bolmady. Küzetşıler mız baqpady. Resepşnde otyrǧan türı qazaq, tılı orys jıgıt eşteŋe bılmeidı eken. Bızben bırge kelgen bır ülken apai şiraqtyq tanytyp, äzer kırdı. Būl bızdıŋ biurokratiianyŋ batpaǧyna äbden batqanymyzdy körsetedı.
Kıre almai, pūşaiman bolyp tūrǧanymyzda Aqparat jäne kommunikasiialar ministrı Däuren Abaevty, Myrzatai Joldasbekovtı Qazmedianyŋ basşylary şyǧaryp saldy. Sonda deimız-au, ministr kıretın jiynǧa qarapaiym adam kıre almasa, nesıne dabyra jasap, mitingı ötkızedı? Aqjaǧaly şeneunıkter men aqsaqaldardy ǧana şaqyrsyn… «Şeraǧaŋmen qoştasu mitingısı ötedı» dep radiodan habarlap, äleumettık jelılerden aqparat taratpasyn… Sonda «Qazaqstan» ūlttyq arnasy būl mitingını ministr üşın ötkızgen be? Erte kelsın, säl keşıgıp kelsın, jūrtty alalamai, Qazmedianyŋ büiırındegı esıktı aşyp qoisyn. Qazmedianyŋ qamal-küzetı baryn bıletın ūiymdastyruşylar osyny nege oilamaǧan? Şeraǧaŋnyŋ özı jazǧandai, «Keibır bastar ışınde dänegı joq jaŋǧaqqa ūqsaidy. Ondailar köp qoi. Bır kem dünie».
Şerhan Mūrtaza – Alaştyŋ baqyty men täuelsızdıgı üşın küresken bırtuar ūlt perzentı. Qaraly mitingını Qazmediada emes, «Barys Arena», Täuelsızdık saraiy siiaqty halyq köp syiatyn ǧimaratta ötkızu kerek edı. Şeraǧaŋmen qoştasudy jastar taǧylym alarlyqtai mändı mäjılıs etıp ötkızuge bolar edı ǧoi. Ūlt bolyp ūiysudyŋ ornyna biurokratiia, közboiauşylyq, dabyraşyldyqtan arylmai, keudemızdı qaǧamyz. Jas ūrpaq būl ädetımızden qandai ülgı alady?