Astanada Qazaqstan-Qytai agrarlyq-investisiialyq forumy öttı. Atalǧan basqosuǧa ekı jaqtyŋ biznes, bılım beru jäne ǧylym salasynyŋ 100-den astam ökılderı qatysty.
Sondai-aq, S.Seifullin atyndaǧy Qazaq agrotehnikalyq universitetınde Qazaqstan-Qytai biologiialyq qauıpsızdık zerthanasynyŋ ırgetasy qalandy. Is-şaraǧa QR Auyl şaruaşylyǧy ministrınıŋ orynbasary G.İsaeva, QHR Auyl şaruaşylyǧy ministrlıgınıŋ Departament direktory Ma Iý Sai, Harbin veterinarlyq zertteu institutynyŋ professory Jigao Bu, «S.Seifullin atyndaǧy Qazaq agrotehnikalyq universitetı» AQ basqarma töraǧasynyŋ mındetın atqaruşy A.Äbdırov qatysty.
Atalǧan joǧary oqu orny Soltüstık-Batys auyl jäne orman şaruaşylyq universitetımen bırlesken agrotehnikalyq park aşuǧa jäne qytailyq kartop ösıruşı XISEN kompaniiasymen kartop ösıruge arnalǧan täjıribelık şaruaşylyq qūruǧa kelısım-şart jasady. Zerthanada S.Seifullin atyndaǧy Qazaq agrotehnikalyq universitetı Harbin veterinariialyq zertteu instituty men Şynjaŋ agrarlyq universitetındegı ärıptesterımen bırge januarlar auruy boiynşa zertteu jūmystaryn jürgızedı. Aitjan Äbdırovtıŋ aituynşa, mūndai zertteuler tört tülık maldy jappai qyryludan saqtaidy.
– Zerthana mamandary januarlar men qūstar auruynyŋ aldyn alyp, azyq-tülık pen mal önımderınıŋ zerthanalyq zertteuın jürgızedı. Ol Qazaqstandaǧy mal aurularyn diagnostikalau men aldyn alu jäne azyq-tülık önımderın synau salasyndaǧy jetekşı mekemelerdıŋ bırı boluǧa tiıstı. Sonda bız Qytai elımen şekaralas aimaqtardyŋ biologiialyq qauıpsızdıgın qamtamasyz etıp, Qytaiǧa şyǧarylatyn et eksportyn retke keltıremız, – dedı ol.
Al Ma Iý Sai ǧylym men maman daiyndau salasyndaǧy tyǧyz yntymaqtastyq üşın S.Seifullin atyndaǧy Qazaq agrotehnikalyq universitetıne alǧys bıldırdı.
Zerthana Qazaqstan Respublikasynyŋ Ükımetı men Qytai Halyq Respublikasynyŋ Ükımetı arasynda bekıtılgen Kelısımdı jäne Qytai Auyl şaruaşylyq ǧylymdar akademiiasy, Şynjaŋ agrarlyq universitetı, Harbin veterinariialyq zertteu instituty men S.Seifullin atyndaǧy Qazaq agrotehnikalyq universitetı arasyndaǧy özara tüsınıstık turaly Memorandumdy ıske asyru maqsatynda qūrylyp otyr.
Serık Joldasbai
