Keşe elorda äkımdıgınde «Qazaqstan halqyna» qoǧamdyq äleumettık qorynyŋ töraǧasy Bolat Jämışev pen Nūr-Sūltan qalasynyŋ äkımı Altai Kölgınovtıŋ qatysuymen döŋgelek üstel mäjılısı ötıp, qos tarap özara yntymaqtastyq turaly memorandumǧa qol qoidy. Alqaly jiynǧa azamattyq sektor jäne ükımettık emes ūiymdary, biznes qauymdastyǧy, jastar ūiymdary ökılderı, qala ardagerlerı, memlekettık organdar qyzmetkerlerı, qalalyq mäslihat jäne qalalyq qoǧamdyq keŋes müşelerı qatysyp, ötınış-tılekterı men ūsynystaryn jetkızdı.
Döŋgelek üstel mäjılısın aşyp, jürgızıp otyrǧan qala äkımı Altai Kölgınov «Qazaqstan halqyna» qory Memleket basşysy Qasym-Jomart Toqaevtyŋ tapsyrmasymen densaulyq saqtau, bılım beru jäne äleumettık qoldau salalaryndaǧy mäselelerdı şeşu üşın qūrylǧanyn eske salyp, jiynnyŋ maqsat-mındetterın atap öttı.
Odan keiın söz alǧan Bolat Jämışev «Qazaqstan halqyna» qory qyzmetınıŋ baǧyttaryn, jobalaryn tanystyrdy. Osy uaqytqa deiın atqarylǧan jūmystaryna jäne aldaǧy josparlaryna toqtaldy. Aldaǧy qyrküiek aiynyŋ ortasynda konferensiia ūiymdastyrylyp, onda qordyŋ jaŋa tūjyrymdamasy, baǧdarlamalary men jobalary bekıtıletının jetkızdı.
– «Qazaqstan halqyna» qory qūrylǧanyna jarty jyl boldy. Osy uaqyt ışınde el tūrǧyndaryna 10 milliard teŋgeden asatyn somaǧa kömek körsetıldı. Būl kömektı qyryq myŋnan astam qazaqstandyq aldy. Būl emdelu, bılım granttary jäne aimaqtarda balalar sportyn damytuǧa jaǧdai jasau kömekterı, – degen Bolat Jämışev densaulyq saqtau, bılım, äleumettık qoldau salalarynda berılgen kömekke jeke-jeke toqtaldy.
Sonyŋ ışınde qordyŋ bır maqsaty – auyldyq jerlerde bılım deŋgeiın köteru.
– Ökınışke qarai, salalyq ministrlıktıŋ resmi reitingterı soŋǧy jyldary auyl mektepterındegı bılım deŋgeiı köterılgennıŋ ornyna tömendep bara jatqanyn körsettı. Būl – öte alaŋdatarlyq jaǧdai. Sol üşın qazır jedel şaralar qabyldau kerek. Bızderge auyldardaǧy mektepterdıŋ barlyǧynda internet bolmaǧandyqtan, bılım deŋgeiın köteru mümkın emes degen aqparat tüstı. Ras, solai. «250+» degen baǧdarlama bar. Iаǧni, 250 tūrǧynnan asatyn auyldar internetpen qamtylady. Bıraq eldegı auyldardyŋ 26,7 paiyzynda tūrǧyndar sany odan az. Būl auyldarǧa internet barmaidy. Bızdıŋ qor osyǧan müddelı, osyndai auyldarǧa internettı tartyp bergımız keledı, – dedı Bolat Jämışev.
Mektepterdı jabdyqtau, erekşe qajettılıkterı bar balalardy oŋaltu mäselelerıne toqtaldy. Qor säbilerde kezdesetın aurulardy erte bastan anyqtau üşın eldegı barlyq perinataldyq ortalyqtardy kerek qondyrǧylarmen qamtamasyz etudı josparlaǧanyn aitty. Densaulyq saqtau salasynda qordyŋ atqarǧan jūmystaryn aldaǧy josparlaryn jetkızdı.
Nūr-Sūltan qalasy Ardagerler keŋesınıŋ töraǧasy Sansyzbai Esılov elordada 160 myŋ zeinetker tūratynyn, olardyŋ köpşılıgı medisinalyq kömektı qajet etetının, zeinetkerler internettı meŋgermegendıkten, emhanalarǧa barǧanda kezekterın ūzaq kütetınderın aitty.
– Qalanyŋ barlyq emhanasynda MRT joq. №1 qalalyq emhanaǧa jöndeu jürgızıp, qajet qondyrǧylardy alyp beru kerek. Sodan keiın Saryarqa jäne Baiqoŋyr audandarynda tūratyn zeinetkerlerdı osy emhanaǧa tırkeu kerek, – dedı Sansyzbai Esılov.
Nūr-Sūltan qalasy onkologiia ortalyǧyna da qajet qondyrǧylardyŋ jetpei jatqany, «Qazaqstan halqyna» qory tarapynan sol jaǧynan kömek kerektıgı turaly da aityldy. Onyŋ mänısın elorda äkımı Altai Kölgınov tüsındırdı.
– Onkologiia ortalyǧy qala äkımdıgıne qaraidy. Bıraq oǧan qala tūrǧyndary ǧana emes, bükıl öŋırlerden nauqastar keledı. Olardyŋ betın qalai qaitarasyŋ? Sondyqtan bölıngen qarjy jetpeidı. Tıptı, ortalyqtyŋ kırısınen şyǧyny asyp ketedı. Qarjyny olai da, bylai da tartqanda qajet qondyrǧylardy aluǧa mümkındık bolmaidy. Sol sebepten «Qazaqstan halqyna» qorynyŋ osyǧan septesuın sūraimyn, – dedı Altai Kölgınov.
Nūr-Sūltan qalasy Qoǧamdyq keŋesınıŋ müşesı, respublikalyq «Küi anasy» qoǧamdyq qorynyŋ töraǧasy Tölegen Quanyşev «Qazaqstan halqyna» qory ruhaniiat salasyna da köŋıl bölse degen tılegın jetkızdı. Sonyŋ ışınde dombyra jasau öndırısın aşuǧa kömek beruın ötındı.
Onyŋ aituynşa, elımızde sapaly dombyra jasaityn öndırıs orny mülde joq. Jeke şeberler bar, bıraq olardyŋ jasaǧan aspaby öte qymbatqa tüsedı nemese sapaǧa jauap bermeidı.
Nūr-Sūltan qalasy Belsendı ömır süru ortalyǧynyŋ direktory Mūhtar Erketaev bırneşe joba ūsyndy. Sonyŋ ışınde mümkındıgı şekteulı jandardy eldıŋ Balqaş, Alaköl, t.b. demalys oryndaryn aralatuǧa baǧyttalǧan «İnvataksi» qyzmetı jobasyn qolǧa alu kerektıgın aitty.
Jiyndy tüiındegen elorda äkımı Altai Kölgınov «Qazaqstan halqyna» qory töraǧasyna memorandum aiasynda bırneşe jobany bırlesıp jüzege asyrudy ūsyndy. Sonyŋ ışınde erekşe qajettılıkterı bar balalardy qoldau, inkliuzivtı mektepterdı aşu, perinataldy ortalyqtardy jabdyqtau, t.b. maŋyzdy jūmystar bar.
