Keşe Ortalyq kommunikasiialar qyzmetınıŋ alaŋynda Nūr-Sūltan qalasy äkımınıŋ orynbasary Erlan Kanalimov baspasöz mäslihatyn ötkızdı.
– Arystaǧy apatty oqiǧa barşa qazaqstandyqtardyŋ jüregıne auyr tidı. Osy oqiǧaǧa bailanysty soŋǧy ekı-üş künde respublika tūrǧyndarynyŋ bırlıgı, tūtastyǧy, meiırımdılıgı, qaiyrymdylyǧy körındı, – dep bastady jurnalistermen kezdesuın elorda basşysynyŋ orynbasary.
Erlan Kanalimov Arys qalasynda oryn alǧan jaǧdaiǧa orai Nūr-Sūltan qalasy äkımdıgı tarapynan, sondai-aq elordanyŋ qarapaiym tūrǧyndary bastamasymen atqarylyp jatqan şaralardy baiandap berdı. Bırınşıden, qala äkımınıŋ orynbasary Nūrlan Nūrkenov bastap barǧan astanalyq qūrylysşylar Arys qalasyndaǧy qiraǧan, zaqymdalǧan nysandardy jöndeuge kırısıp ketken. Qazır mūnda 15 brigada jūmys jürgızude, olar 9-ynşy sektorda belgılengen mektep, balabaqşa jäne tūrǧyn üilerdı qalpyna keltırıp jatyr. Sonymen qatar elordadaǧy memlekettık mekemeler men käsıporyndar ūjymdary bır kündık jalaqylarynan 200 million teŋge jinap, Arys tūrǧyndaryna kömek retınde jıberıp, qaiyrymdylyq tanytqan. «Arys. Bız bırgemız!» jalpyrespublikalyq aksiiasyna da astanalyqtar belsendı qatysyp jatyr. Qazır qalada kömek körsetuge arnalǧan 5 nükte ıske qosylǧan. Qarapaiym tūrǧyndar men käsıpkerlerdıŋ kömegımen 160 tonnaǧa juyq azyq-tülık, kiım-keşek, basqa da tūrmysqa qajettı zattar 8 kölıkke tielıp, Arysqa jıberıldı.
– Qaiyrymdylyq ıske qosylǧan, meiırımdılık tanytqan barşa elordalyqtarǧa qala äkımınıŋ, ärıptesterımnıŋ atynan ülken rizaşylyǧymdy bıldıremın, – dedı E.Kanalimov.
Arys oqiǧasy, äsırese, balalar üşın öte auyr tigenı sözsız. Sondyqtan Nūr-Sūltan qalasynyŋ äkımdıgı 500 arystyq balany bügınnen bastap elordada qabyldap, olarǧa ruhani jäne psihologiialyq tūrǧyda demeu körsetpek. Atap aitqanda, balalar üşın ekskursiialar ūiymdastyrylady, qonsertterge barady. Elorda künıne arnalǧan merekelık şaralardy da tamaşalaityn bolady.
Baspasöz mäslihaty barysynda Erlan Kanalimov Nūr-Sūltan qalasy äkımdıgı tarapynan halyqty äleumettık tūrǧydan qorǧau boiynşa atqarylyp jatqan jūmystar jönınde de egjei-tegjei
baiandap öttı. Sondai-aq jaqyndap qalǧan elorda künı merekesı turaly da mälımet berdı. Biylǧy merekelık şaralar yqşamdalyp ötkızıletının, Qazaqstan jäne Resei jūldyzdarynyŋ qatysuymen ötetın auqymdy ıs-şaralardyŋ qysqartylǧanyn jetkızdı. Mereke, negızınen, aspan aiasynda, saiabaqtar men alaŋqailarda ūiymdastyrylatyn bolady. Köptegen sporttyq jarystar men öner baiqaulary ötedı.
– Elorda künı bır qalanyŋ ǧana merekesı emes, būl – bükıl respublikamyzdyŋ merekesı, būrynnan aityp jürgenımızdei, elorda toiy – eldıŋ toiy. Jalpy, 100-ge juyq ıs-şara belgılenıp otyrsa, sonyŋ 73-ıne tegın baruǧa bolady. Sondyqtan dästürlı merekemız jalǧasatyn bolady, – dep atap öttı
E.Kanalimov jurnalister sūraǧyna bergen jauabynda.
