Astana qalasynyŋ äkımı blokchein tehnologiiasynyŋ jyljymaityn mülık tızımıne engızıluı notarius qyzmetıne degen qajettılıktı joiatynyn aitty. Jalpy sifrlandyru aiasynda elımızde köptegen jūmystardyŋ tärtıbı men talaby özgeretını anyq.
«Mäselen, blokchein tehnologiiasyn mülık tızımıne engızu, satyp alu-satu şarttaryn räsımdeude notarius qyzmetterınıŋ qajettılıgın tolyǧymen joiady. Öitkenı sifrlandyru esebınen būl rettegı amaldar qaita qarastyrylady. Zaŋ talaptaryna säikes kelmeitın tūrǧyn üidıŋ satylymyna jol berılmeidı.
Sonymen qatar, «qara» jäne «aq» rieltorlar joiylady. Mūn-daǧy barlyq aqparat elektron-dy formatta redaksiialau mümkındıgınsız saqtalady» dei kele, Äset İsekeşev sifrlandyru baǧdarlamasynyŋ tiımdı tūstaryn tarqatyp aityp berdı. Onyŋ aituynşa, sifrly tehnologiialar uaqyt öte kele köptegen salalarda keŋınen qoldanylady. Nätijesınde bırqatar mamandyqtar joǧalsa, kerısınşe, türlenetınderı de bolady. «Odan qorqudyŋ qajetı joq. Bızdıŋ aldymyzda kez kelgen adam öz äleuetın jüzege asyra alatyndai jūmys naryǧynyŋ nätijelıgımen qamtamasyz etu mındetı tūr. Būl baǧytta bıraz jūmystar atqarudamyz» dedı Äset İsekeşev. Ol qandai jūmystar?
Bırınşıden, qala äkımdıgınde şaǧyn jäne orta biznes salasyndaǧy ösımdı, jūmys oryndaryn qūrudy, Astanada qūrylǧan halyqaralyq qarjy ortalyǧyn negızge ala otyryp, investisiialardy qanşalyqty tarta alatyny saralanǧan. Ärine, bas qalada bazalyq önerkäsıptı damytu mümkın emes, öitkenı onyŋ qala ekologiiasyna kerı äserı bar. «Dubai, Mäskeu, Beijıŋ, Singapur siiaqty ırı megapolisterdıŋ täjıribesın zerttedık. Dünie jüzındegı ırı megapolister zamanaui öndırıs jäne önımdı qyzmetterdı qūru esebınen auyr önerkäsıptı damytudan bas tartady. Mysaly, Amerikanyŋ būrynǧy bolat qūiu ortalyǧy bolǧan Pittsburg qalasy bügın densaulyq saqtau jäne bılım ortalyǧyna ainalyp otyr» dep tüsındırdı Äset İsekeşev.
Gülmira AIMAǦANBET
