Bökeihannan «Bäiterekke» deiın…
Qalalyq mäslihattyŋ sessiiasynda köptegen maŋyzdy şeşımder qabyldandy
Astanada ötken küzde qalalyq mäslihattyŋ şeşımımen bırneşe köşege ataular berılıp, keibıreulerı qaita ataldy. Sonyŋ ışınde №36 köşe men Eŋbekşıler köşesı bırıktırılıp, Älihan Bökeihan köşesı atauyn aldy. Astana qalasy Tılderdı damytu basqarmasynyŋ basşysy Tıleuǧali Qyşqaşbaevtyŋ aituynşa, būl mäsele tehnikalyq jaǧdailarǧa bailanysty kıbırtıktep qaldy. Keşe qalalyq mäslihattyŋ kezekten tys sessiiasynda atalmyş mäsele men №31 köşenı İordaniia korolı Husein ben Talaldyŋ atymen atau mäselesı tolyǧymen şeşıldı. Sonymen, būryn oŋ jaǧalaudaǧy 400 metr bolǧan Älihan Bökeihan köşesı bügınde sol jaǧalauǧa auysyp, 4823 metrge sozylyp jatyr.
Būǧan qosa, qala äkımınıŋ orynbasarlary Andrei Lukin men Qosman Aitmūhambetov qatysqan sessiiada Astana qalasynyŋ 2017-2019 jyldarǧa arnalǧan biudjetı men memlekettık jekemenşık ärıptestık jobalarynyŋ tızbesıne özgerıster engızu, Astanada balabaqşalar saluǧa jäne paidalanuǧa memlekettık-jekemenşık ärıptestık jobasy boiynşa memlekettık mındettemelerdı qabyldau qaraldy. Tiıstı mäselelerge qatysty baiandamalardy qalalyq Qarjy basqarmasy basşysynyŋ orynbasary Baqyt Süleimenova, qalalyq Ekonomika jäne biudjettık josparlau basqarmasynyŋ basşysy Älıbi Jūmaev, qalalyq Bılım basqarmasy basşysynyŋ mındetın atqaruşy Änuar Janǧozin baiandama jasady.
Sondai-aq, «Astana qalasy mäslihatynyŋ tūraqty komissiialaryn sailau turaly» şeşımıne özgerıster engızılıp, Astana qalasy boiynşa Tekseru komissiiasynyŋ töraǧasy men müşelerın taǧaiyndau, olardyŋ lauazymdyq nūsqaulyǧy men osy komissiianyŋ «B» korpusynyŋ memlekettık äkımşılık lauazymdaryna qoiylatyn bılıktılık talaptaryn bekıtu qaraldy.
Astana äkımınıŋ orynbasary Andrei Lukin Astana qalasynyŋ 2017-2019 jyldarǧa arnalǧan biudjetıne özgerıster engızu boiynşa bırqatar ūsynystardy engızdı. Onyŋ aituynşa, qala qazır «EKSPO-2017» körmesıne tolyqtai daiyn boldy. Biylǧy qaŋtar-säuır aralyǧynda qala biudjetıne 76 mlrd 763 mln teŋge kırıs kırdı. Ötken jyldyŋ säikes merzımımen salystyrǧanda kırıs 10 mlrd teŋgege juyq somaǧa ūlǧaiǧan.
Andrei Lukin Astana äkımı apparaty audan äkımdıkterı men bırqatar basqarmaǧa biudjetten qosymşa qarjy böludı ūsyndy. Sonyŋ ışınde äkımdıkterge sanitarlyq tazalyqty qamtamasyz etuge, qalany abattandyruǧa aqşa bölu jönınde aitty. Būǧan qosa, Astana qalasy Işkı ıster departamentınıŋ qyzmetkerlerı «EKSPO-2017» qalaşyǧynyŋ aumaǧynda kündız-tünı kezekşılık atqaru üşın de kerek qosymşa qarjy kölemı turaly aityldy.
Sondai-aq, kommunaldyq şaruaşylyqty damytuǧa, kölık infraqūrylymyn ılgerıletuge, joldardy jöndeuge, sumen jabdyqtau jüiesıne, äsırese, «Taldyköl» su jinaǧyşyndaǧy topyraqty qalpyna keltıruge, Kışı Taldyköldegı sudy retteuge de biudjetten qosymşa qarjy qarastyryldy.
Bılım beru men densaulyq saqtau nysandarynyŋ qūrylysyna, sonyŋ ışınde tört balabaqşa jobasyn daiyndap, olardy salu jūmysyna da qanşa qarjy kerektıgı anyqtaldy. Sirek kezdesetın aurulardy emdeuge därı-därmek satyp aluǧa da qarjy bölu josparlandy.
Sporttyq qūraldardy jaŋartuǧa, mümkındıgı şekteulı adamdardy qoldauǧa da qosymşa qarjy qarastyrylady.
«Aǧymdaǧy jyldyŋ qyrküiek pen jeltoqsan aralyǧynda mügedekterdı sanatorlyq emdeuge jıberuge 97,5 mln teŋge böludı ūsynamyn. Mūnymen bız Astanadaǧy barlyq mümkındıgı şekteulı balalardy, I, II toptaǧy eresek mügedekter men zeinetkerlerdı 100 paiyzǧa beiımdeu şaralaryna ılıktıremız. Qazırgı taŋda arbany qajet etıp tūrǧan mügedekter sany 630 adamǧa köbeidı. Olarǧa 100 paiyzǧa jaǧdai jasau üşın 112 mln teŋge kerek. Protez-ortopediialyq qūraldarmen qamtamasyz etu üşın, naqtyraq aitsam, 1062 qūral alu üşın 80 mln qajet. Būǧan qosa, üide kömek körsetuge qarjy kerek» dedı qala äkımınıŋ orynbasary.
«Astana-Bäiterek» monumentınıŋ jöndeuın aiaqtauǧa da qarjy qarastyryldy. Astana äkımı orynbasarynyŋ aituynşa, qūrylysşylar atalmyş jūmysty aldaǧy mausym aiynyŋ basynda aiaqtap, jaŋarǧan monument qonaqtarǧa esıgın aiqara aşady.
Amanǧali QALJANOV