Qazaqstannyŋ velosiped sporty federasiiasy men Astana qalasynyŋ äkımdıgı jäne sporttyq-būqaralyq ıs-şaralardy ötkızu direksiiasynyŋ ūiymdastyruymen velojarys öttı. Atalǧan şaranyŋ basty maqsaty – salauatty ömır saltyn nasihattap, tūrǧyndardy būqaralyq sport türlerıne köptep tartu.
Jyl saiyn dästürlı türde ūiymdastyrylyp kele jatqan igılıktı şara biyl da jalǧasyn tauyp, oǧan 1500-ge juyq adam qatysty. Jarysqa qatysqan köpşılık Qabanbai batyr daŋǧyly boiymen Qorǧaljyn tas joly, Tūran daŋǧylynan ötıp, «Astana Arena» stadiony janynda märege jettı. Jarysqa qatysuşylar «eŋ jas qatysuşy» jäne «eŋ jasy ülken qatysuşy» nominasiialary boiynşa ırıkteldı. Astana qalasy äkımdıgınıŋ sporttyq-būqaralyq ıs-şaralardy ötkızu direksiiasy jetekşısınıŋ orynbasary Azamat İmaşevtyŋ aituynşa, jarysqa qatysuşylar jalpy ūzyndyǧy 10 şaqyrym 500 metr qaşyqtyqty baǧyndyrǧan. Sondai-aq, ol sporttyq şara «EXPO-2017» halyqaralyq mamandandyrylǧan körmesı aiasynda ötkızılıp otyrǧanyn atap öttı.
– Bügıngı şaranyŋ maqsaty – salauatty ömır saltyn nasihattau, tūrǧyndardy būqaralyq sport türlerıne köptep tartu. Memleket basşysy Nūrsūltan Nazarbaev būqara halyqtyŋ sportpen ainalysyp, belsendı boluyn jiı aityp keledı. Öitkenı densaulyǧy myqty ūlt kez kelgen kedergını jeŋıp, biık belesterdı baǧyndyra alady. Onyŋ üstıne, halqymyz «Bırınşı bailyq – densaulyq» dep tekten-tek aitpaǧan. Al densaulyǧymyz myqty boluy üşın mındettı türde sportpen şūǧyldanuymyz kerek. Osy sebeptı bügıngı jarys jyl saiyn dästürlı türde ötkızılıp keledı, – dedı ol.
Velojarysqa qatysuǧa kelgen 1500 sportşynyŋ bırı – Änuar Saparūly. Ol jarysqa qatysu üşın taŋerteŋ kelıp, velosipedtı jalǧa alǧanyn aitady.
– Jarysqa qatysudaǧy negızgı maqsatym – jeŋıske jetıp, bırınşı oryn alu emes, elımızde endı qalyptasyp kele jatqan būqaralyq sporttyŋ damuyna atsalysu. Şyny kerek, maǧan özge sport türlerınen qaraǧanda velosiped teuıp, qalanyŋ äsem jerlerınde seruendegen qatty ūnaidy. Onyŋ üstıne, būl jarysqa özımmen qūrdas köptegen qyz-jıgıtter qatysyp jatyr. Sondyqtan da men üşın bügıngı şara – jarys qana emes, sonymen qatar, qūrby-qūrdastarymmen jaqynyraq tanysudyŋ bırden-bır joly. Äleumettık jelıde otyra bergenşe, bır sät osyndai jarystarǧa qatysyp tūrǧanǧa ne jetsın?! – deidı ol.
Sondai-aq, Astanalyq saiabaǧynda «Şuaqty älem» qoǧamdyq bırlestıgı QR velosport federasiiasynyŋ qoldauymen Daun sindromy bar balalardyŋ arasynda «Solnsekross» velosiped jarysyn ötkızdı. İgı şaranyŋ ötuıne qalalyq Dene şynyqtyru jäne sport basqarmasy jäne Astana qalasy äkımdıgınıŋ būqaralyq ıs-şaralardy ötkızu direksiiasy, «Ski Club Astana» jäne «Taŋǧajaiyp elı» merekelerdı ūiymdastyru agenttıgı mūryndyq boldy. Jarysqa 1 jastan 6 jasqa deiıngı eŋ kışkentai 90 qatysuşy niet bıldırdı. Olar 500 metrlık qaşyqtyqty samokatpen jürıp öttı. Al 6 jastan 12 jasqa deiıngı qatysuşylar samokatpen 1 şaqyrym joldy baǧyndyrdy. Barlyq balalarǧa baǧaly syilyqtar retınde samokattar, şlem jäne velosipedter syiǧa tartyldy. Sondai-aq, ülkender ekı qaşyqtyq boiynşa özara baq synady. Mäselen, äielder – 5 şaqyrym, al erler 10 şaqyrym aralyqta synǧa tüstı.
Jalpy, Astanada Daun sindromy bar üş jüzden astam bala tūrady. Erekşe taǧdyr ielerınıŋ tolyq damuy üşın oŋaltu şaralary üzdıksız jürgızıluı qajet. Osy oraida 2016 jyldyŋ qaraşasynda «Asyl bala» qauymdastyǧynyŋ qoldauymen Daun sindromy bar balalarǧa arnalǧan oŋaltu ortalyǧy aşylǧan bolatyn. Al qaiyrymdylyq jarysynda jinalǧan qarjy osyndai sanattaǧy balalardyŋ damuy men emıne igerıletının jetkızdı ūiymdastyruşylar.
Serık JOLDASBAI
