Nūr-Sūltan qalasy mäslihatynyŋ kezekten tys sessiiasynda elordanyŋ ötken jylǧy biudjetınıŋ atqaryluy turaly esep tyŋdalyp, qalanyŋ 2019-2021 jyldarǧa arnalǧan biudjetıne engızılgen özgerıster bekıtıldı. Mūnyŋ aldynda būl mäseleler mäslihattyŋ tūraqty komissiialary men qoǧamdyq keŋes otyrystarynda jan-jaqty talqylanǧan bolatyn.
Byltyrǧy biudjettıŋ qorytyndylarymen Qarjy basqarmasynyŋ basşysy Älıbi Jūmaev tanystyrdy. Onyŋ aituynşa, ötken jyly biudjetke 430 mlrd teŋge tüstı. Jospar 4 mlrd teŋgege asyra oryndaldy. Şyǧystar 99,8 paiyzǧa atqaryldy.
– 2018 jyly äleumettık qorǧau saiasatyn ıske asyru üşın 3,7 mlrd teŋgege äleumettık kömek körsetıldı. Onyŋ ışınde kömekke mūqtaj jekelegen sanattaǧy azamattarǧa 3,1 mlrd teŋge bölındı. Kepıldendırılgen tegın medisinalyq kömek şeŋberınde qarastyrylǧan 3,4 mlrd teŋge 100 paiyz igerıldı. Bılım beru jüiesın damytu şeŋberınde 15 mektep pen 3 balabaqşanyŋ qūrylysy jalǧasty. 23 orta bılım beru men mektepaldy daiarlyq nysanynyŋ jobasy jasaldy. Sonyŋ ışınde 15 nysan boiynşa memlekettık saraptama oŋ şeşım şyǧardy. 9 mekteptıŋ qūrylysy bastaldy. 189 jekemenşık balabaqşaǧa memlekettık tapsyrys aiasynda balalar ornalastyryldy. 81 jalpy bılım beretın mekteptı ūstauǧa 33 mlrd teŋge, 11396 studenttı oqytatyn 11 kolledjge 5,6 mlrd teŋge bölındı. Barlyq qarjy tolyǧymen igerıldı. 4470 jetım jäne ata-ana qamqorlyǧynsyz qalǧan balalarǧa qoǧamdyq kölıkte jeŋıldıkpen jüruge kömek körsetıldı, – dedı basqarma basşysy.
Qalalyq mäslihattyŋ biudjet, ekonomika, önerkäsıp jäne käsıpkerlık mäselelerı jönındegı tūraqty komissiia töraǧasy Miras Şekenov ötken jyldyŋ biudjet qarajatyn tiımdı paidalanu boiynşa naqty jūmystar jürgızılgenın, qarjyny igerude oŋ dinamika baiqalǧanyn atap öttı.
Strategiialyq jäne biudjettık josparlau basqarmasy basşysynyŋ orynbasary Aijan Tügelbaeva köpbalaly jäne tūrmysy tömen otbasylardy qoldaudy küşeitu maqsatynda Nūr-Sūltan qalasynyŋ 2019-2021 jyldarǧa arnalǧan biudjetıne özgerıster engızılgenın aitty.
Onyŋ aituynşa, qalada ötetın mädeni-sauyqtyq şaralarǧa bölıngen qarjy, özge de äkımşılık şyǧyndar, respublikalyq biudjetten keletın maqsatty transfertter qaita qaraldy. Nätijesınde osy jylǧy biudjet onyŋ aldynda bekıtılgen biudjetke qaraǧanda 36 mlrd teŋgege nemese 8,2 paiyzǧa ösıp, jalpy alǧanda 461 mlrd teŋgenı qūrady. Biudjettı naqtylau barysynda äleumettık salaǧa qosymşa 2,5 mlrd teŋge bölu ūiǧaryldy.
– Eŋbek jäne halyqty äleumettık qorǧau ministrlıgı atauly äleumettık kömek kölemın ösırdı. Aǧymdaǧy transfertterden osy maqsatqa 942,6 mln teŋge böldık. Ailyǧy tömen biudjet salasy qyzmetkerlerınıŋ jalaqysyn 30 paiyzǧa köteruge 4,4 mlrd teŋge, äleumettık osal toptarǧa jatatyn azamattarǧa 50 şarşy metrden kem emes 616 päterdı alyp beruge 5,1 mlrd teŋge, memleket mūqtajdyǧy üşın jer telımderın satyp aluǧa 3,8 mlrd teŋge bölındı, – dedı A.Tügelbaeva.
Būǧan qosa, derbes biudjettık baǧdarlamalarǧa bölıngen qarjy qaita qaralyp, 10 mlrd 956 mln teŋge jedel şeşıluı tiıs mäselelerge bölınetın boldy. Az qamtylǧan azamattarǧa üzbei qoldau körsetıp otyruǧa jäne jūmys oryndaryn qūruǧa biudjetke 1,5 mlrd teŋge salyndy. Jyldyŋ basynan berı oǧan qosymşa 460,7 mln teŋge qarastyryldy. Sonyŋ arqasynda būl kömekpen jyldyŋ aiaǧyna deiın 4 myŋ adamdy qamtu josparlanyp otyr.
– Äleumettık osal toptarǧa, sonyŋ ışınde tūrmysy tömen otbasylarǧa 30-dan astam äleumettık kömek türlerı körsetıledı. Osynyŋ barlyǧyna 14 mlrd 011 mln teŋge jūmsalady. Qala basşylyǧynyŋ köpbalaly jäne tūrmysy tömen otbasylarmen kezdesulerınıŋ nätijesınde jaŋa äleumettık bastamalardyŋ qorjyny daiyndaldy. Olardy oryndauǧa 2019 jyly 2,5 mlrd teŋge bölınedı. Jūmysşy mamandyqtardy aluǧa jäne odan keiın jūmysqa tūrǧyzuǧa barlyq jaǧdailar jasaldy. Būl baǧyt boiynşa qarjylandyru 6 mlrd teŋgeden 8 mlrd teŋgege ūlǧaidy. Qaita oqytu jäne bılıktılıktı arttyru baǧdarlamasyna qosymşa 110,4 mln teŋge qaraldy. Atalmyş baǧdarlama 700 adamdy qamtidy, – dedı A.Tügelbaeva.
Qatty otyndy alatyn otbasylardyŋ tızımıne myŋnan astam otbasyny qosu josparlanuda. Būl kömek türı 8 AEK-ten16 AEK-ke ösıp, 40 myŋ teŋge şamasyndaǧy qarjyny qūraidy. 750-ge juyq adam sanasiia jäne tıs protezdeu qyzmetterıne tegın qol jetkıze alady. Oqu granttary 130-dan 180-ge köbeidı. Köpbalaly otbasylardan şyqqan joǧary oqu oryndary studentterı qoǧamdyq kölıkte jeŋıldıkpen jüru qūqyǧyna ie boldy.
– Bügınde elorda mektepterındegı 1-4-synyptardyŋ barlyq oquşylary ystyq tamaqpen qamtylady. Äleumettık osal toptarǧa jatatyn otbasylardan şyqqan 5-11-synyp oquşylary da būl tızımge qosyldy. Qosymşa kömek retınde osy toptaǧy otbasylardyŋ 2 myŋnan astam balasyna balabaqşalarda tegın tamaq berıletın bolady. Mektep formasy men oqu qūraldaryna qosymşa 200 mln teŋge bölınbek. Ekı myŋnan astam balany kanikul uaqytynda sauyqtyruǧa 100 myŋ teŋge qarastyryldy, – dedı baiandamaşy.
Eldı mekenderdı abattandyru men kögaldandyru üşın audandardyŋ äkımdıkterıne qosymşa 1299,4 mln teŋge, respublikalyq biudjetten transfertter esebınen qosymşa qarjylandyru men investisiialyq jobalardy aiaqtauǧa 3 mlrd teŋge kölemınde bölu qarastyryldy.
