Nūr-Sūltan qalasynyŋ biudjetıne osy jyldyŋ qaŋtar-şılde ailarynda jeke kırıster tüsımderı ötken jyldyŋ säikes kezeŋımen salystyrǧanda 7,6 paiyzǧa ösıp, 146,4 mlrd teŋgenı qūrady. Salyqtyq tüsımder 6,7 paiyzǧa artyp, 134,4 mlrd teŋgege jettı. Qalalyq qoǧamdyq keŋes otyrysynda osyndai sifrlardy keltırgen Strategiialyq jäne biudjettık josparlau basqarmasynyŋ basşysy Qaisar Maŋqaraev 2019-2021 jyldarǧa arnalǧan elorda biudjetıne engızılgen özgerıster turaly baiandady.
Ärtürlı maŋyzdy jūmystarǧa bölıngen qosymşa qarjy kölemınen habar bergen baiandamaşy Jūmyspen qamtu jäne äleumettık qorǧau basqarmasyna 1 mlrd 51 mln teŋge qarastyrylǧanyn jetkızdı. Sonyŋ ışınde az qamtylǧan köpbalaly otbasylarǧa atauly äleumettık kömek tölemıne 641 mln teŋge bölındı. Būǧan qosa, halyqty jūmyspen qamtuǧa, mūqtaj azamattardyŋ jekelegen sanattaryna, zeinetkerlerge, mügedekterge järdem beruge tiıstı qarjy baǧyttalǧan.
Basqarma basşysynyŋ esebın tyŋdap bolǧan soŋ qoǧamdyq keŋes müşelerınde bıraz sūraqtar tuyndap, olardyŋ tarapynan bırqatar ūsynystar aityldy.
– Keŋestıŋ 17 şıldede ötken otyrysynda keŋes töraǧasy Sansyzbai Seiıtjanūly biudjettı bölgende komissiia qūramyna qoǧamdyq keŋes ökılın engızu turaly bastama köterdı. Bız būl ūsynysty qoldaimyz. Sebebı tüsınıksız jaittar bar. Ötken köktemde ǧana jolauşylardy tasymaldaudy subsidiialauǧa 1 mlrd teŋge böludı maqūldadyq. Būl soma būdan būryn bölıngen 2,5 mlrd teŋgenıŋ üstıne qosyldy. Endı qosymşa taǧy 2 mlrd teŋge bölınıp otyr. Jolauşylardy tasymaldauǧa bır ǧana ūsynysty – subsidiialauǧa 8 avtobus parkın ǧana qostyq. Bıraq tiıstı esepteulerdı körmei otyrmyz. Qarjy bölu jönınde şeşım şyqqanda biudjettık ūsynymdy, belgılı bır basqarmaǧa qajet qarjynyŋ kölemın, Strategiialyq jäne biudjettık josparlau basqarmasynyŋ qorytyndy şeşımın köruımız kerek. Al sızderdıŋ bızge ūsynǧan tüsınık hatyŋyzda bärı ekı-aq söilemmen berılgen, – dedı keŋes müşesı Janat Nūrǧaliev.
Osy sūraqqa jauap bergen Q.Maŋqaraev qoǧamdyq keŋes öz otyrystarynyŋ bırıne Kölık jäne jol-kölık infraqūrylymyn damytu basqarmasy, «Astana LRT» JŞS basşylyǧyn şaqyryp, būl mäsele boiynşa olardyŋ esepterın tyŋdauǧa qūqyly dep esepteitının jetkızdı. «Bız basqarmalardyŋ biudjettık ūsynymdarmen jūmys ısteimız. Ärine, tiıstı esepteulerdı jürgızemız. Esepteuler bolmasa, mäselenı biudjettık komissiia qarauyna şyǧarmas edık» dedı ol.
Qoǧamdyq keŋes müşesı Mūhtar Erketaev qalany gazdandyruǧa bölıngen qarjy jaiyn sūrady. «1 mlrd 692 mln teŋge bölınıp otyr eken. Būl qarjy ışkı jelılık jūmystarǧa bölıne me? Qalanyŋ şetkı aumaqtaryna būl jūmystardyŋ qatysy bar ma?» dedı ol.
Basqarma basşysynyŋ aituynşa, şetkı aimaqtardy gazdandyru baǧdarlamasy aiasynda respublikalyq biudjetten 1 mlrd 692 mln teŋge bölınıp otyr. Jalpy tört qala men bır oblysqa üş jyl boiy är jyl saiyn 7,5 mlrd teŋgeden bölu qarastyrylǧan. Būl qarjy Nūr-Sūltan, Almaty, Şymkent, Kökşetau jäne Aqmola oblystaryna tiesılı.
Qoǧamdyq keŋes müşesı Marat Mūstafin qalanyŋ tazalyǧyn saqtau mäselesın köterdı. «Atatürık» saiabaǧy būryn jainap tūruşy edı. Qazır onda ne jaryq joq, gülzardyŋ özınen tük qalmaǧan. Būl saiabaq Baiqoŋyr audanyna qaraidy. Atalmyş audandaǧy 16 aulaǧa «aqyldy» tehnologiia engızu josparlanǧan bolatyn. Qazır būl da qaldy. Tūrǧyndar sonyŋ jaiyn sūrap jatyr. Bügınderı qarjy bar bolǧany ekı aulaǧa ǧana bölıngen. Jalpy, Baiqoŋyrǧa bölıngen 200 mln teŋge qandai jūmystarǧa jetedı? Saiabaqty abattandyruǧa ma, äbden eskırgen jataqhanalardy jöndeuge me?» degen ol Jastar saraiyn jöndeuge bölıngen qarjynyŋ ne üşın qaitarylǧanyn sūrady.
«Jastar saraiyna qatysty jauapty basqarmadan bızge bölıngen qarjyny jyldyŋ aiaǧyna deiın igere almaimyz degen hat kelıp tüstı. Sondyqtan aqşany qysqarttyq. Al saiabaqqa bailanysty audan äkımdıgınen älı eşqandai ötınışter tüspedı» dedı Strategiialyq jäne biudjettık josparlau basqarmasynyŋ basşysy.
Qoǧamdyq keŋes müşesı Äsima Bimendina şetkı aimaqtar problemasy köp ekenın aita kele, audan äkımdıkterınen tūrǧyn alaptar mäselelerı boiynşa 2019-2021 jyldar biudjetıne sūranystar qanaǧattandyryla ma dep sūrap, orta mektepter jaiyn qozǧady.
23 tamyzda qoǧamdyq keŋeste şetkı aimaqtar problemalaryna qatysty otyrys ötedı. Q.Maŋqaraev tiıstı jauapty sol jerde beruge uäde ettı.
