Astana qalasy mäslihatynyŋ 36-şy kezekten tys sessiiasy öttı. Onda qaralǧan negızgı mäselelerdıŋ bırı – elordanyŋ 2018-2020 jyldarǧa arnalǧan biudjetıne qatysty boldy. Atap aitqanda, ötken jyly qabyldanǧan mäslihat şeşımıne özgerıster engızıp, qala biudjetıne tüsken kırıs kölemderın atqaruşy operatorlarǧa bölu turaly taldau jasaldy.
Osy jönınde Astana qalasy Strategiialyq jäne biudjettık josparlau basqarmasynyŋ basşysy Rasul Orazǧūlov baiandama jasady. Ol qala damuynyŋ ekonomikalyq körsetkışterıne toqtala kele, aǧymdaǧy jyldyŋ alty aiynda bas qalanyŋ biudjetıne tüsken kırıs kölemın jariia ettı. Būl 136,2 mlrd teŋgenı qūrap, ötken jyldyŋ osy kezeŋımen salystyrǧanda 2,4 paiyzǧa ösken. Baiandamaşynyŋ esebınen keiın deputattar qarajattyŋ tiımdı jūmsaluyna qatysty pıkırlerın bıldırdı. Qarjyǧa jauapty operatorlardyŋ jauapkerşılıgı, är teŋgenıŋ qalanyŋ qajetıne jūmsalyp, äleumettık-ekonomikalyq damuyna ülesı boluy kerektıgın aitty.
Sessiiada qaralǧan özge mäselelermen bırge qalalyq Qūrylys jäne tūrǧyn üi saiasaty basqarmasynyŋ basşysy Ruslan Ahmetov memlekettık qajettılıkter üşın jer uchaskelerın alyp qoiuǧa bailanysty jyljymaityn mülıktı satyp alu jönındegı şarttardyŋ jobasyn mäslihat qarauyna ūsyndy.
Kürdelı jöndeu: nätije bar
Astana qalasy mäslihatynyŋ köpşılık tyŋdauynda tūrǧyn üi qoryn basqaru, ūsynylatyn qyzmetterdıŋ sapasy jäne tūrǧyn üi-kommunaldyq şaruaşylyq salasynda tūrǧyndardyŋ qūqyqtaryn qorǧau boiynşa atqaru organdarynyŋ qyzmetın jetıldıru mäselelerı qaraldy.
Qalalyq orta sapasy jäne baqylau basqarmasynyŋ basşysy Tölegen Qūlūşev baiandama jasap, osy salada atqarylyp jatqan ısterge jalpy şolu jasady.
Bügıngı künde elordanyŋ tūrǧyn üi qorynda 2562 köp päterlı tūrǧyn üi men 87 apatty üi jäne kürdelı jöndeudı qajet etetın 271 üi tırkelgen.
2013 jyldan bastap 1230 üige tehnikalyq jaǧynan auqymdy tekseruler men 105 üige energoaudit jürgızılgen. Onyŋ qorytyndysy üilerdı basqaruşy kondominiumdar men jergılıktı atqaruşy organdarǧa berılıp, oryn alǧan kemşılıkterdı tüzeuge nazar audarylǧan. Atqarylǧan jöndeu jūmystary negızınde 72 köppäterlı tūrǧyn üi jöndeuden öttı. Üstımızdegı jyly 9 üige kürdelı jöndeu jürgızılude. Üilerdıŋ tozǧan töbe jabyndysyn auystyryp, ışkı injenerlık jüiesı tügeldei auystyrylǧan. Kelesı jyly respublikalyq biudjet esebınen taǧy da 8 köppäterlı tūrǧyn üige, qaitarmaly qarjynyŋ esebınen 7 üide jöndeu jūmystaryn jürgızbek. Qalǧan 256 üidıŋ tūrǧyndarymen aumaqtardy damytudyŋ baǧdarlamasy boiynşa tüsındırme jūmystary jürgızıldı.
