Qazaqstanda 1 qaŋtardan bastap memlekettık qoldau şaralaryn proaktivtı taǧaiyndau üşın jūmys rejimınde Otbasynyŋ sifrlyq kartasy (OSK) qoldanysqa engızıldı. Sifrlyq kartada elımızdıŋ 19,5 mln azamaty nemese 6,3 mln otbasy turaly aqparat jinaqtalǧan. Ol «Smart Data Ukimet» analitikalyq jüiesımen integrasiialanǧan, būl jüiede memlekettık organdardyŋ barlyq derekqory jinaqtalǧan. Onda tūrǧyndardyŋ tabys deŋgeiı, jyljymaly jäne jyljymaityn mülıktıŋ boluy, otbasy qūramy, nesienıŋ boluy jäne taǧy basqa ärtürlı aqparat qamtylǧan.
Qolda bar derekter negızınde ekonomikalyq, äleumettık, tūrǧyn üi jaǧdailary, densaulyq pen bılım boiynşa otbasynyŋ äl-auqat deŋgeiın baǧalauǧa jäne qadaǧalauǧa mümkındık beretın taldaular jürgızıledı, al äleumettık täuekel tuyndaǧan jaǧdaida Otbasynyŋ sifrlyq kartasy järdemaqy nemese äleumettık tölemdı proaktivtı türde aluǧa mümkındık beredı. Ol üşın OSK arqyly äleuettı järdemaqy aluşyǧa SMS-habarlama jıberıledı jäne oŋ jauap bolǧan jaǧdaida oǧan tiıstı tölem taǧaiyndalyp, tiıstı qarajat banktık şotyna audarylady.
Qazırgı taŋda OSK-da järdemaqylar men äleumettık tölemderdıŋ 9 türı boiynşa qyzmetter alu mümkındıgı berılgen: jüktılıkke jäne bosanuǧa bailanysty tabysynan aiyrylǧan jaǧdaida äleumettık tölemder; bala kütımıne bailanysty tabysynan aiyrylǧan jaǧdaida äleumettık tölemder; jūmysynan aiyrylǧan jaǧdaidaǧy äleumettık tölemder; asyrauşysynan aiyrylǧan jaǧdaidaǧy äleumettık tölemder; mügedektıgı bar bala tärbielep otyrǧan ata-anaǧa (qamqorşyǧa) berıletın järdemaqylar, mügedektıgı boiynşa järdemaqylar; köpbalaly otbasylarǧa berıletın järdemaqylar; «Kümıs alqa» nemese «Altyn alqa» alqalarymen marapattalǧan köpbalaly analarǧa berıletın järdemaqylar; atauly äleumettık kömek. Sondai-aq azamattarǧa OSK arqyly zeinetaqy tölemderın alu mümkındıgı turaly avtomatty habarlama jıberıledı.
2023 jyly äleumettık qorǧau salasyndaǧy qyzmetter tızbesı keŋeitıledı. 2024 jylǧy 1 qaŋtardan bastap densaulyq saqtau jäne bılım beru salalaryndaǧy memlekettık kepıldıkter engızıledı. 2025 jyldan bastap joǧaryda atalǧan üş salada memlekettık kepıldıkterdıŋ barlyq türlerı qamtylmaq. Alaiaqtyq täuekelın boldyrmau maqsatynda 1414 bıryŋǧai bailanys ortalyǧynan kelıp tüsken SMS-ke jauap beru qajet.
