Elordada halyqaralyq äielder künı qarsaŋynda «Kümıs hanymdar» baiqauy öttı.
Qarttardyŋ qoǧamdyq ıs-şaralarǧa qatysu belsendılıgın arttyryp, otbasylyq qazaqy dästür jalǧastyǧy men ūrpaqtar sabaqtastyǧyn nyǧaitu maqsatynda ötken audanaralyq baiqaudy Astana qalasy äkımdıgınıŋ «Belsendı ūzaq ömır süru ortalyǧy» ūiymdastyryp ötkızdı.
Baiqauǧa qaladaǧy är audannan ekı ümıtker qatysty. Olardyŋ arasyndaǧy eŋ egdesı 78 jasta bolsa, eŋ jasy – 58 jasta. Olar bırneşe kezeŋ boiynşa (özın tanystyru, öner körsetu, dämdı as daiyndau) synǧa tüstı. Baiqau soŋynda üzdıkter anyqtalyp, bas jülde Almaty audanynyŋ äjelerıne būiyrdy. Bırınşı orynǧa – Baiqoŋyr audany, ekınşı orynǧa – Nūra audany, üşınşı orynǧa Saryarqa audany ie boldy. «Körermen közaiymy» nominasiiasymen Esıl audanynyŋ äjelerı marapattaldy. Olarǧa demeuşıler kömegımen arnaiy syilyqtar berıldı.
Is-şaranyŋ ūrpaqtarǧa halqymyzdyŋ salt-dästürın därıpteu tūrǧysynan män-maŋyzy aiyryqşa ekenın atap aitqan jön. Sebebı baiqauǧa qatysqan äjeler bır jaǧynan, halqymyzdyŋ ūlttyq kiım-keşek, qolöner būiymdar mädenietımızdı därıptese, ekınşı jaqtan, «äieldıŋ bır önerı – as pısıru» degendei, qazaqtyŋ taǧam mädenietın de körsetıp, qazır ūmyt bolyp bara jatqan «Ülperşek», «Qarynbürme», «Maisök» siiaqty taǧamdardy äzırlep äkelıp, olardy daiyndau ädısterın tüsındırdı. Osy tūrǧydan alǧanda, būl tek öner baiqauy ǧana emes, ūlttyq dästürdı därıptegen maŋyzdy ıs-şara bolady.
– Qūrylǧanyna ekı jyl uaqyt bolǧan ortalyǧymyz qaladaǧy qarttarymyzdyŋ tänıne quat, janyna şuaq syilady dep aitsaq qatelespeimız. Öitkenı būl ortalyq zeinetke şyqqannan keiıngı ömırdı de mändı, maǧynaly ötkızuge jaŋaşa mümkındık syilady. Bügıngı baiqau – sonyŋ jandy aiǧaǧy. Ūlttyq dästürımızdıŋ, ūlttyq qūndylyqtarymyzdyŋ baiqaudyŋ basty arqauy bolǧany da «qarty bar üidıŋ salty bar» degen sözdıŋ däiektı dälelı boldy, – dedı «Belsendı ūzaq ömır süru ortalyǧy» KMM direktory Mūhtar Erketaev.
