Keşe Astana qalasynyŋ äkımı Jeŋıs Qasymbektıŋ qatysuymen qalalyq mäslihattyŋ kezekten tys sessiiasy öttı. Jiyn barysynda elordanyŋ 2024-2026 jyldarǧa arnalǧan biudjetı naqtylanyp, deputattar bırqatar maŋyzdy jūmystarǧa qosymşa qarjy böludı bırauyzdan qoldady.
Biudjet boiynşa qalalyq Ekonomika jäne biudjettık josparlau basqarmasynyŋ basşysy Qaisar Maŋqaraev baiandama jasady.
– Memleket basşysynyŋ biudjettı tiımdı basqaru jönındegı tapsyrmasyn oryndau şeŋberınde bız biudjettıŋ barlyq negızgı şyǧystaryn qaita qaradyq jäne oŋtailandyruǧa 7,7 milliard teŋge ūsynylyp otyr. Osylaişa biudjettıŋ osy naqtylanuy aiasynda böluge 116 milliard teŋge ūsynylady. Memlekettıŋ äleumettık mındettemelerın oryndaudyŋ basymdylyǧyn negızge ala otyryp, äleumettık salany qarjylandyru mäselelerı erekşe tärtıppen qaralady, – dedı Qaisar Maŋqaraev.
Qosymşa qarjy mümkındıgı şekteulı azamattardy oŋaltuǧa jäne äleumettık qyzmetter körsetuge bölındı. Sondai-aq tūrǧyn üi kömegın körsetudıŋ mölşerı men tärtıbın qoldau tapty. Mäselen, ötken jyly 672, al biylǧy qaŋtardan bastap 445 otbasy tūrǧyn üi kömegımen qamtyldy.
«Astana qalasynda aqparattyq-baǧdarlamalyq fotobeinetırkeu jäne beinetaldau keşenın qūru jäne paidalanu» jobasynyŋ jūmysy 6 aiǧa ūzartyldy. Qalalyq avtobustar baǧdarlarynda jolauşylar men bagajdy avtomobilmen tūraqty tasymaldauǧa äkımdık belgıleitın 110 teŋge mölşerındegı bıryŋǧai tarif kelısıldı. Būǧan qosa, mäslihat deputattary qoǧamdyq keŋıstıkterdı, köppäterlı tūrǧyn üi keşenderın jäne basqa da nysandar salynatyn jer telımderın memleket menşıgıne alu turaly kelısımşartty qoldady.
