Qazaqstan Respublikasynyŋ qūrmettı prokurory, ädılet general-maiory, zaŋ ǧylymdarynyŋ kandidaty, professor, bügınde «Maqsūt Närıkbaev universitetı» AQ Direktorlar keŋesınıŋ töraǧasy Bolat Sembinnıŋ esımı tek öz ortasynda ǧana emes, elımızdıŋ aru Altaidan qart Atyrauǧa deiın sozylǧan ūlan-baitaq ölkesıne keŋınen tanymal memleket qairatkerı desem artyq aiqandyq emes. Öitkenı ol – bar sanaly ǧūmyryn elımızdıŋ prokuraturasynyŋ, onyŋ ışınde zaŋ üstemdıgın saqtau jolyna arnaǧan jäne qūqyqtyq jüienıŋ qalyptasuy men damuyna sübelı üles qosqan tūlǧasy biık azamat.
Boz dalasyna bura şökken qasietı men kiesı mol Sarysu topyraǧynda Ūly Otan soǧysynyŋ ardagerı, ūlaǧaty ūzaqqa jaiylǧan ūstaz Donda Sembin men aiauly anasy Kümısai qūrǧan otbasynyŋ tölbasy bolyp dünie esıgın Jambyl oblysynyŋ Jaiylma auylynda aşqan jan.
Qazaq halqy üşın onyŋ qai ölkesı bolmasyn onyŋ qasietı de biık, kiesı de mol jerlerı öte köp! Sonyŋ bırı – qasiettı Äulieata öŋırındegı tabiǧaty qatal, jūrty jomart, elı eŋbekqor Sarysu elı. Al keşegı Qorqyt babadan keiın Ūly dalany qobyz ünımen äueletken Yqylas Dükenūly, qazaq teatr jäne kino önerınıŋ aqtaŋgerı, KSRO Halyq ärtısı, Qazaqstannyŋ Eŋbek Erı Asanälı Äşımov, belgılı qoǧam qairatkerlerı Sanaq Äbeuov, Aldabergen Särsenbaev, Seifulla Qojahanov, ǧalym Köpşıl Äbdımäjitov, Ūlttyq qauıpsızdık komitetınde ūzaq jyldar jauapty qyzmetter atqarǧan Tıleu Myrzanov, qolyndaǧy qamymen el tanyǧan aituly jazuşylar Berık Şahanov, Pernebai Düisenbin, Qali Särsenbai, İtaliianyŋ ataqty La-Skala opera teatrynda tūŋǧyş än salǧan qazaq balasy, Bökeŋ aǧamyzdyŋ nemere ınısı düldül öner iesı Amangeldı Sembin, jeztaŋdai änşıler Säule Janpeiısova, Ardaq İsataeva men Torǧyn Smaiylova syndy darabozdar osy qasterlı topyraqtan şyqqan.
Osyndai şoqtyǧy biık jerlester qatarynyŋ alǧy şebınde tektı ūrpaqtan taraǧan Qazaqstan prokuraturasy salasynyŋ saŋlaǧy, Sarysu öŋırınen şyqqan tūŋǧyş general, biyl 80 jastyŋ seŋgırıne şyǧyp otyrǧan Bolat Sembin aǧamyz da tūr.
Jastaiynan bılımge qūştar, sportqa jaqyn ösken Bolat aǧamyz Jaiylma auylyndaǧy Lenin orta (qazırgı Äiteke bi) mektebın üzdık aiaqtap, mehanizatorlyq eŋbektıŋ alǧaşqy aşy dämın tatyp, äsker tärtıbın körıp, basyn aq qar şalǧan Alatauǧa sän berıp tūratyn äsem Almatydai qalaǧa bılım ızdep kelıp, S.M.Kirov atyndaǧy Qazaq memlekettık universitetınıŋ (qazırgı äl-Farabi atyndaǧy Ūlttyq universitetı) zaŋ fakultetıne student bolyp qabyldanǧan Bolat Sembinnıŋ taudan aqqan özendei ömırı men qyzmet joly osylaişa bastaldy.
Alǧaşqy käsıbi eŋbek joly jer jännaty Jetısu öŋırınıŋ Gvardeiskii audanynda prokurordyŋ kömekşısı qyzmetınen bastaǧan ol Taldyqorǧan oblysy Kirov audanynŋ prokurory, keiınnen jaŋadan aşylǧan Torǧai oblysy prokurorynyŋ orynbasary, oblys prokurory, Qaraǧandy oblysy prokurorynyŋ bırınşı orynbasary, Almaty jäne Taldyqorǧan oblystarynyŋ prokurory, Almaty jäne Qazaq temırjoly prokurory syndy asa jauapty joldardan ülken abyroimen ötıp Qazaqstan Respublikasy Bas prokurorynyŋ orynbasary deŋgeiıne köterılgen ısker ūiymdastyruşy, qylmystyq ıs jürgızudıŋ beren mamany, bılıktı basşy boldy.
Sonymen qatar, zaŋ salasynyŋ ǧalymy retınde elımızde prokuratura jäne qūqyq qorǧau jüielerınıŋ jūmystary boiynşa qabyldanǧan köptegen zaŋdardyŋ jobalaryn daiyndauǧa atsalysqandyǧy taǧy bar. Qūqyq salasyna qatysty qoldanysta jürgen köptegen monografiialardyŋ avtory. Sonymen qatar, basşylyq qyzmet joldarynda bırqatar audandar men oblys tūrǧyndarynyŋ senımıne ie bolyp, halyq qalaulysy atanyp, jergılıktı Keŋesterge deputat bolyp sailansa, ekı märte Qazaqstan Respublikasy Parlamentı Mäjılısıne «Aq jol» jäne «Ädılet» saiasi partiialardyŋ partiialyq tızımderı boiynşa deputattyqqa kandidat bolyp tırkelgenın de ülken märtebe sanaimyn.
Zeinetkerlıkke şyqqannan keiın Täuelsız qazaq elıne asa qajettı käsıbi bılıktılıgı joǧary mamandar daiarlau ısıne bel şeşe kırısken ol elımızdegı
saiasi-qūqyqtyq reformalardyŋ tabysty ıske asyryluyna belsendı yqpal etken käsıbi zaŋger ǧalym, öresı biık zertteuşı qatarynan körıne bıldı.
Atam qazaq ūrpaǧyna arnap artynda qaldyrǧan «Jaqsynyŋ janynda jür, saparlasyŋa senımdı serık bol!» degen bataly sözın özıne mūrat tūtqan ol ömır jolynda talai ırı tūlǧaly atpal azamattarmen qatar jürıp, ainymas syilastyqqa ie bolyp, saparlas bolǧan jaǧdailaryn özı de ülken qūrmetpen esıne alyp otyrady.
Asa jauapty qyzmetterde şar bolattai şyŋdalǧan, aǧynan tūryp, adalynan jaralǧan Bolat Ajaqaiūly – ataq pen daŋqqa, keude toltyrar marapat üşın eş uaqytta qyzmet jasamaǧan jan. Al ataq pen daŋqtyŋ, abyroi men märtebenıŋ, qūrmet pen syidyŋ oǧan öz eŋbegı men aq peiılıne berılgenın, adaldyǧy men tazalyǧy arqasynda kelgenın ony qorşaǧan qabyrǧaly qoǧam öte jaqsy bıledı. Ol kısınıŋ aldyn körıp, tärbiesın alǧan köptegen azamattar bügınde Täuelsız Qazaqstanda töl Konstitusiiamyz talaptarynyŋ saqtaluy men zaŋ üstemdıgınıŋ berık ornyǧuy jolynda aianbai eŋbek etıp jür.
Bar qazaq qūrmet tūtqan kemeŋger Dimaş Qonaev «Adamdyq qalypty biık ūstau – kımge de bolsa ülken syn!» dep artyna adamdyqty alǧa jeteler ataly söz qaldyrǧan eken. Al men qazaqy keipın joǧaltpaǧan, ızgılıgımen öz boiyna sän bergen Bolat Ajaqaiūlyn sol adamdyq qalypty ömır boiy saqtaǧan, oǧan köleŋke tüsırmei «baptaǧan» bırden-bır tabandy dür azamat der edım.
Sondyqtan da, onyŋ eren esımı Qazaqstan Respublikasy prokuratura salasynyŋ Altyn kıtaby men tarihyna jazylǧany osy zaŋ üstemdıgın saqtaudaǧy tökken maŋdai terı, kün men tündı bölmei etken eŋbegınıŋ jemısı jäne jeŋısı dep tanimyn! Öitkenı basşylary qoldaǧan, ärıptesterı moiyndaǧan, şäkırtterı ülgı tūtqan, artynan beisuat söz ılestırmegen general Bolat Sembinnıŋ ömırlık jäne qyzmettık filosofiiasynyŋ berık temırqazyǧy – onyŋ özı ısıne degen kırşıksız adaldyǧymen baǧalanyp, ölşenetını sözsız.
Dünie däurennıŋ şapqan attai ömır körkın tozdyrmaǧan Bolat Ajaqaiūlynyŋ boiyndaǧy keiıngı buyn jastarǧa önege bolar asyl qasietterdıŋ bıregeiı, onyŋ tereŋ ensiklopediialyq bılımı, ötkendı este saqtau qabıletı, ädebiet pen ükılı önerge jaqyndyǧy jäne bar jaŋalyq pen taǧylym-tärbienıŋ ordasy merzımdı baspasözdı üzbei oqu daǧdysy der edım.
Jalpy, Bolat aǧa – şyn mänınde öner qonǧan tektı äulettıŋ perzentı. Onyŋ atalas äkelerınıŋ bırı keşegı şertpe küidıŋ şeberı atanǧan Sügırmen zamandas däulesker küişı Naqyp qariia bolǧanyn, al nemere aǧalary Qabyl men Dabyldyŋ da qolynan qazaqtyŋ qara dombyrasynyŋ tüspegenın jäne osy üş äigılı esımnıŋ Qazaq küi antologiiasy jinaǧyna kırgenınen-aq aiqyn aŋǧaruǧa bolady.
Bügınde tūtas bır äulettıŋ biık Bäiteregındei bolyp otyrǧan Bolat aǧa özınıŋ artynan ergen bauyrlaryna örelı ısterımen önege, jürek köŋılımen qamqor bola bılgenın bız öte jaqsy bılemız. Qinalǧanda qasynan tabylatyn, quanǧanda jürek tūsynda jüretın qos qarlyǧaş qaryndastary Nūrbibı men Nūrbala, ızın basyp kele jatqan Qanat pen Mūrat, tılın alyp, sözın jerge tastamaityn Talǧat pen Qairattar onyŋ köŋıl maqtanyşy, artynda tūrǧan tırekterı. Bärı de – joǧary bılım alyp, basşylyq qyzmette bolǧan azamattar. Bolat aǧamyz – tuǧan topyraǧy kielı Äulieata öŋırınıŋ, qasiettı Sarysu jūrtynyŋ şyn tıleuqory, naǧyz janaşyry. Ol – tuǧan jerınen eşqaşan qol üzbegen bauyrmal jan. Onyŋ üstıne ol – kem degende jylyna bır ret özı tülep ūşqan otanyna baryp qaitady. Bügınde el aǧasy bolyp otyrǧan, Sarysu audandyq mäslihatynyŋ hatşysy qyzmetın abyroimen atqarǧan, audannyŋ qūrmettı azamaty Qanat ınısı men Küläi kelınnıŋ ystyq yqylastarymen Donda äkemız jaqqan otbasynyŋ otyn söndırmei, jaryǧyn öşırmei otyrǧan qaraşaŋyraqqa täu etu dästürınen bır sätte jaŋylmaǧan azamat. Ūzaq joly bar keruen köşterdı bastaǧan keşegı ūly babalardyŋ taŋdaiynan şyqqan «Bırge tuǧannyŋ berık qorǧany bar!» degen ūlaǧatty sözı de osyndai süiegı sūltan, tatulyǧy men yntymaǧy ozǧan, äleuetı jarasqan äuletterge arnalǧan şyǧar?!
Ökınıştısı, bügınde at jalyn tartyp azamat bolǧan Asqardai ūly men Aijandai aiauly qyzynyŋ asyl anasy, mäŋgılık serttesken serıgı, otyz jyl otasqan jan jary Mänsiia dauasyz dertten aiyqpai bıraz jyldar būryn köz jūmǧany aǧanyŋ jüregıne öte auyr tidı. Sol bır auyr künderı asyl azamattyŋ qaiǧysyn bölısıp, qoltyǧynan demegen qazaqtyŋ körnektı memleket jäne qoǧam qairatkerı, marqūm Maqsūt Närıkbaev bastaǧan aituly azamattar syilastyqtyŋ öşpes ülgısın körsettı.
Kısı syrtynan ǧaibat aitudan aulaq, ötırıktıŋ «auylyn» syrt ainalatyn, peiıl-köŋılınıŋ terezesı imandylyq pen meiırım şuaǧyn tögıp tūrar Bolat aǧa – bügınde nemerelerı men şöberelerınıŋ süiıktı atasy. Baqytty ǧūmyrlaryn Alla ūzaǧynan süiındırsın!
Mıne, el jailaǧan ortalyqtan alystau jatqan alaqandai Jaiylma auylynan şyqqan bozbala Bolat Sembin bügınde märtebelı general, abyroily professor, biık azamat deŋgeiınde elıne belgılı el aǧalarynyŋ biıgıne şyǧyp otyr.
Dana halqymyzda «Azamatyn körıp, elın tany!» degen qanatty söz bar. Qazaq elınde ırgelı ısterı önege men atqarǧan adal qyzmetterı ülgı bolar osyndai ūltjandy, otanşyl, memleketşıl, eŋ bastysy, halqyn süietın, jaisaŋ azamattarymyz köp bolsyn deimız!
Ümıtımızdı ükılep solai bolaryna seneiık!
Qyrǧyzälı TILEUOV,
Memlekettık qyzmet ardagerı
Astana qalasy
