Ūlttyq akademiialyq kıtaphanada qazaqstandyq fotojurnalistika negızın qalauşylardyŋ bırı, belgılı fototılşı Sailau Pernebaevtyŋ 85 jyldyǧyna arnalǧan «Aq pen qara» atty kıtap-albomnyŋ tanystyrylymy ötıp, fotokörmesı aşyldy. Atalmyş şarany Qazaqstan Jazuşylar odaǧy, «Fotoöner» qoǧamdyq bırlestıgı jäne fototılşınıŋ otbasy ūiymdastyrdy.
Jiyndy jürgızgen Qazaqstan Jazuşylar odaǧy basqarmasy töraǧasynyŋ bırınşı orynbasary Nūrjan Quantaiūly Sailau Pernebaev sanaly ǧūmyrynyŋ qyryq jyldan astamyn fotojurnalistikaǧa arnap, ötken ǧasyrdyŋ alpysynşy-seksenınşı jyldary qazaq jurnalistikasynyŋ, qazaq ädebietınıŋ fotoşejıresın jasaǧanyn atap öttı.
Sailau Pernebaev «Qazaqstan mūǧalimi», «Sosialistik Qazaqstan» (qazirgi «Egemen Qazaqstan») respublikalyq basylymdarynda, 1981 jyldan zeinetkerlikke şyqqanǧa deiin «Qazaq ädebieti» gazetinde fototılşı qyzmetın atqardy. Onyŋ fotosuretterı Odaqtyq gazet-jurnaldar baiqaularynda 16 ret bas jüldeni jeŋip aldy. Äraluan taqyryptardy qamtyǧan köptegen fotosuretteri är jyldary «Pravda», «İzvestiia», «Komsomolskaia pravda», «Trud», «Literaturnaia gazeta» gazetterinde jiı jariialanyp tūrdy. Sondai-aq Fransiianyŋ, Kubanyŋ, Germaniianyŋ gazet-jurnaldarynda bırneşe ret jaryq kördı. Sailau Pernebaev Qazaqstan Jurnalister odaǧynyŋ jäne Respublikalyq Käsipodaqtar komitetiniŋ syilyǧymen bırneşe märte marapattaldy.
Nūrjan Quantaiūlynyŋ aituynşa, Sailau Pernebaevtyŋ fotoarhivı 18 jäşıktı qūraidy. Otbasy būl bai fotomūrany «Fotoöner» qoǧamdyq bırlestıgınıŋ töraǧasy Asylhan Äbdıraiymūlyna tapsyrdy. Jiynda söz söilegen atalǧan qoǧamdyq bırlestık basşysy tanystyrylymy ötken «Aq pen qara» atty kıtap-albomdy bırneşe seriia etıp şyǧaru josparlanǧanyn, bırınşı kıtapqa suretterdıŋ 25-30 paiyzy ǧana engenın, sondyqtan ekınşı kıtap-albom daiyndalyp jatqanyn jetkızdı.
