«DALA DAUYSY» ÜZDIKTERDI TAŊDADY
Jaqynda elordada «Dala dauysy» radiofestivalınıŋ gala konsertı öttı. Mūnda muzyka arqyly qazaq tılı düniejüzıne nasihattaldy.
Festivalda şet eldık ümıtkerge qazaq änın oryndau nemese öz halqynyŋ änın qazaq tılınde oryndau talaby qoiylǧan. Ondaǧy oi – qazaq änın şeteldıkterge oryndatu arqyly ūlttyq muzykalyq jäne poetikalyq tıldıŋ örısın keŋeitu. «Dala dauysy» – tek qana radiofestival emes, bedeldı muzykalyq şeru. Qazaq radiosynyŋ milliondaǧan tyŋdarmandary internet arqyly süiıktı änderıne dauys berıp, jeŋımpazdar anyqtaldy.
2012 jylǧy bırınşı «Dala dauysyna» ekı myŋdai adam sait arqyly dauys berse, 2013 jyly elu tört memleketten millionǧa juyq tyŋdarman dauys bergen. Ötken ekı jylda halyqaralyq «Dala dauysy» radiofestivalıne Qazaqstan, Türkiia, Qytai, Moŋǧoliia, Resei, Qyrǧyzstannan ekı jüzden asa änşı qatysyp, lauret atandy.
Biylǧy «Dala dauysyna» qatysuǧa niet bıldırgen oryndauşylardyŋ qatarynda Resei, Qytai, Armeniia, Latviia, Belarus, Qyrǧyzstan memleketterımen qatar, otandyq tanymal änşıler Marjan Arapbaeva, Qairat Baekenov, Qūrmaş Mahanov, Şahirizat Seidahmet, Äli Oqapov, Nūrǧali Tūrlybekov, Gülmars Amanbaeva, Ardaq İsataeva jäne «Format» pen «Zaman» toptary syndy ümıtkerler jäne bırqatar jaŋa esımder boldy.
Jobaǧa qatysuǧa niet bıldırgen jüz oryndauşydan jiyrma änşı «Dala dauysy» III halyqaralyq radiofestivalınıŋ laureaty atandy.
Radiofestival jeŋımpazdary «Dästürlı än» jäne «Akademiialyq oryndauşy», «Estradalyq än jäne etnoestradalyq än», «Jaŋa esım» atalymdary boiynşa marapattalyp, olarǧa «Dala dauysynyŋ» arnauly statuetkasy men diplomyn elımızdıŋ öner jäne mädeniet, qoǧam qairatkerlerı tabystady.
Jūma ǦAZİEV