Nūr-Sūltan qalasy mäslihatynyŋ aldaǧy otyrystarynyŋ bırınde «Deputat künı» aiasynda elordanyŋ densaulyq saqtau salasynyŋ jaǧdaiy qaralady. Tabaldyryǧymyzdan attaǧaly tūrǧan jyldyŋ basynan elımızde Mındettı äleumettık medisinalyq saqtandyru jüiesı engızıletının eskersek, būl asa maŋyzdy ıs bolyp otyr. Osyǧan orai mäslihat deputattary qaladaǧy bırqatar medisina nysandaryn aralap, solardyŋ jūmysymen tanysyp şyqty.
Deputattar barǧan alǧaşqy nysan qalalyq ftiziopulmonologiia ortalyǧy boldy. Būl nysan stasionarynyŋ jalpy quaty – 320 tösek oryn. Auysymyna mūnda 209 kelu tırkeledı. Ortalyq zamanǧa sai qondyrǧylarmen jabdyqtalǧan. Atap aitqanda, kompiuterlık tomografiia, rentgen ornatylǧan. Kompiuterlık ota bölmesındegı beinekamera onlain türde otandyq jäne şeteldık medisina mamandarmen keŋesuge, konsilium ötkızuge mümkındık beredı.
Mūndaǧy basty mäsele därıgerlerdı baspanamen qamtuǧa tırelıp otyr. Sol sebepten kadrdyŋ tūraqtamauy, mamandardyŋ tapşylyǧy oryn aldy. Osyndai tüitkıl №2 qalalyq balalar auruhanasynda da bar.
«Bızdegı därıger mamandardyŋ 40 paiyzynyŋ basynda baspana joq. Arasynda 15-20 jyldan berı baspana kezegınde tūrǧan sanitarlar, meiırbikeler bar. Al reanimatolog, hirurg, neirohirurg sekıldı qalaǧa naǧyz kerek mamandarǧa baspana berıler bolsa, olardy bız jūmysqa şaqyrar edık. Qazır keibır qyzmetterdı autsorsingke berdık. Sondyqtan bes-alty şaruaşylyq bölmemız bosap otyr. Būl bölmelerdı adamdar tūratyndai etıp yŋǧailauǧa bolady. Solarǧa baspanadan qinalyp jürgen mamandardy uaqytşa kırgızer edık. Bıraq ol üşın äkımdıktıŋ qaulysy şyǧuy kerek. Būl qūjat osyndai bölmelerdı tūrǧyn üi qoryna tırkeu üşın qajet» deidı №2 qalalyq balalar auruhanasynyŋ direktory Bırjan Dosmaiylov.
Qalalyq Qoǧamdyq densaulyq saqtau basqarmasy basşysynyŋ orynbasary Äliia Rüstemova mäselenı şeşu üşın därıgerlerge arnalǧan otbasylyq jataqhana salu mäselesın kötergenderın aitty.
«Qalalyq Bılım basqarmasynda jataqhana bar. Olar jas mamandarymyzǧa 16 oryn berdı. Bıraq būl tym az bolyp tūr. Özımızge jataqhana salu kerek. Bız tiıstı jer telımın sūradyq. Bastapqyda Qaraǧandyǧa şyǧatyn tasjoldyŋ boiynan jer telımı berıledı degen jauap alǧan edık. Alaida keiınnen būl berılmeitın boldy» dedı ol.
№2 qalalyq balalar auruhanasynda medisinalyq qondyrǧylardan da tapşylyq bar. Ekı rentgen apparat jūmys ısteidı. Täulıgıne mūnda 300-400 adam tekserıledı. «Būl bır emhananyŋ ailyq normasy. Qazır rentgenge tüsıru körsetkışı jaǧynan elımızde bırınşı orynda kele jatyrmyz. Bızge älı kompiuter tomografy, MRT apparaty kerek. Nauqastardy qabyldau bölmesınıŋ logistikasyn da ıstesek, tamaşa bolar edı» dedı auruhana direktory.
«Öndırıs» tūrǧyn alabyndaǧy emhana mäselesı köpten berı tüitkıl tudyrǧan edı. Būl mäsele qazır şeşılıp kele jatyr. Mäslihat deputattary sondaǧy «Janūia» otbasylyq densaulyq ortalyǧyna da bardy.
«Būryn №3 qalalyq emhana ielıgınde bolǧan jer telımın aldyq. Mūndaǧy emhananyŋ özı tūrǧyn üidıŋ bırınşı qabatynda ornalasqan bolatyn. Bız jaŋa medisinalyq ortalyqty özımız saldyq. Qazır memlekettık tapsyrys aiasynda 13 myŋ adamǧa qyzmet körsetemız. Auysymyna bızge 50 adam keledı. Jaqynda jedel järdem qyzmetın engızemız» dedı ortalyq direktory Gülmira Beketova nysandy aralatyp.
Deputattar därı-därmekpen qamtamasyz etu, nauqastarǧa qyzmet körsetu, emdeu jaǧdailarymen tanysty. Mäslihattyŋ aldaǧy otyrysynda anyqtalǧan mäseleler qaralatyn bolady.
