Astana qalasynyŋ äkımı Äset İsekeşev elordanyŋ eŋ daryndy oquşylarymen jüzdesıp, olardyŋ üzdık dep tanylǧan innovasiialyq jobalarymen tanysty.
Elorda basşysymen kezdesuge öz qatarynyŋ ǧana emes, respublikalyq jäne şet elde ötken bılım bäigelerınde joǧary jetıstıkke jetken jüirıkter jinaldy.
– Sızderdı alda kele jatqan Täuelsızdıktıŋ mereilı merekesımen qūttyqtaimyn, – dep söz bastaǧan Astana basşysy bas qaladaǧy bılım beru salasynyŋ jetıstıkterı jaiynda äŋgımeledı.
– Bügıngı taŋda elorda mektepterınde 129 myŋ bala bılım alady. Sonyŋ ışınde 67 myŋ oquşy türlı şaralarǧa qatysyp, özderınıŋ bılım deŋgeilerı men qabıletterın jaqsy jetıstıktermen körsetıp jür.
Ärine, būl – quanarlyq jaǧdai. Öitkenı balalardyŋ denı – öz bılımderın jetıldıruge jūmys ısteidı degen söz. Bızdıŋ oquşylar 10 jyl qatarynan respublikalyq olimpiadalarda «Üzdık komanda» ataǧyn bermei keledı. Būl – öte jaqsy körsetkış, – dedı Äset İsekeşev.
Jalpy, elordadaǧy bılım beru salasynda ıske asyp jatqan köptegen igı şaralardy auyz toltyryp aituǧa bolady.
Biyl qalalyq 324 oquşy halyqaralyq olimpiada men baiqaularǧa, ǧylymi jobalarǧa qatysyp, 267 medalmen marapattalǧan. Ötken jyly elordadaǧy №3 jäne №15 mektepterde «smart-mektep» jobasy ıske asyryldy. Aldaǧy jyly «elektrondyq kündelık» jobasy jüzege aspaq. Ol mektep oquşylaryn auyr sömke köteruden aryltyp, ata-analardyŋ oqu üderısıne qatysuyna mümkındık beredı. Qala äkımı egemendık alǧannan berı elımızdegı bılım beru salasynda köptegen jaqsy baǧdarlamalar qabyldanǧanyn aitty. Bügınde oqimyn degen jastarǧa jol aşyq, şetelde, ziiatkerlık mektepterde bılım aluǧa, ǧylymmen ainalysuǧa barlyq jaǧdai jasalǧan. Sondyqtan jas qūraqtai jelkıldep ösıp kele jatqan jaŋa ūrpaq alǧyr, bılımdı, olardyŋ bolaşaǧynan köp ümıt kütuge bolady degen ızgı lebızın bıldırdı.
Erkın pıkırtalas formatynda ötken kezdesude jetkınşekter de öz oilaryn ortaǧa salyp, aldaǧy josparlarymen bölıstı. «Nūr Orda» mektebınıŋ oquşylary robototehnika salasyndaǧy jetıstıkterın körsettı. 8-synyp oquşylary tüs gammalaryn sūryptaityn robottardy jäne ekı minutta kubik jinaityn robot jasap şyǧarǧan. №75 mektep-gimnaziianyŋ 9-synyp oquşysy Samat Kämıljannyŋ jobasy da erekşe, ol qoqys öŋdeitın şaǧyn zauyt jasaǧan. Toǧyz jasynda älemnıŋ 52 elınen 12 myŋ adam qatysqan Niu-Delidegı mentaldı arifmetikadan ötken jarysta jeŋımpaz atanǧan, bügınde onǧa tolǧan «Kalkuliator bala» Iliias Toqtarhannyŋ talanty elorda basşysyn taŋqaldyrdy. Ol Äset Örentaiūlynyŋ qoiǧan esep sūraqtaryna däl jauap berıp, dän riza ettı.
Osyndai daryndy oquşylardyŋ önerın tyŋdap bolǧannan keiın Astana äkımı sözın odan ärı jalǧady.
– Jaŋa körmede robototehnika boiynşa qyzyqty jūmystardy körıp,
riza boldym. Bızdıŋ oquşylar ideialardyŋ erekşelıgı jönınen studentterdıŋ kelesı buynyn basyp ozdy.
Maǧan üzdık intellektualdyq jobalardy yntalandyru kerek degen oi keldı. Äkımdık innovasiialar salasyndaǧy üzdık jūmystarǧa grant türınde 10 mln teŋge böletın bolady, – dedı ol.
Odan keiın elorda basşysy aldaǧy jyly bılım beru salasynda ıske asatyn jobalar turaly aitty. «Bız kelesı jyly 10 innovasiialyq mektep aşudy josparlap otyrmyz. Käsıpkerlermen, ūlttyq kompaniialarmen bırlesıp, būl mektepterde belgılı bır mamandyqtardy qoldaityn bolamyz. Mysaly, ol robotty tehnika nemese aqparattyq tehnologiia, ne himiia boluy mümkın» dedı Äset İsekeşev.
Äkımnıŋ aituynşa, elordalyq ekı mektep «Qazatomönerkäsıp» AQ-men osyndai uaǧdalastyqqa qol jetkızgen. Sonymen bırge, Astana oquşylarynyŋ ǧylymi, önertapqyştyq qabıletterın odan ärı damytu maqsatynda Nazarbaev universitetı men basqa da joǧary oqu oryndary arasynda kelısım jasalǧan.
Azamat ESENJOL
