Belgılı ǧalym, abaitanuşy, filologiia ǧylymynyŋ kandidaty, dosent, Nūr-Sūltan qalalyq sotynyŋ sudiasy Qydyrbek Qorǧanbekūly Älqojaev mezgılsız dünieden ozdy.
«Sender – ǧapylsyŋdar» deidı Qūranda. Rasynda da, jaqsynyŋ qadırın dünieden ötken kezınde ǧana bılıp jatatynymyz ras qoi. Qasymyzda jürgen Qydyrbek bır-aq sätte jalǧan-dünienı tastap jüre beredı dep kım oilaǧan?..
1971 jyly Qyzylorda oblysy Jaŋaqorǧan audany Qojakent auylynda düniege kelgen Qydyrbek Älqojaev mektepte jürgende-aq Mels Qosymbaev, Jäken Omarov sekıldı arqaly aqyndarmen söz talastyryp, el auzyna ılıkken edı.
1995 jyly Äl Farabi atyndaǧy Qazaq Memlekettık universitetınıŋ filologiia fakultetıne oquǧa tüskende bırauyzdan top starostasy bolyp sailanǧan bolatyn. Ol sol kezde-aq köşbasşylyq qabıletımen közge tüstı. Fakultettıŋ käsıpodaq ūiymynyŋ töraǧasy boldy. Universitettıŋ mädeni ömırıne de belsene aralasty. Ükılı Ybyraidyŋ «Qaldyrǧan» änın şyrqaǧanda baǧzynyŋ sal-serılerı tırılıp kelgendei äser qaldyratyn.
1995 jyly universitettı tämamdaǧasyn alǧaşqy eŋbek jolyn Qazaq memlekettık zaŋ universitetınde oqytuşy bolyp bastady.
1998-2002 jyldary QazMU-dyŋ filologiia fakultetınde eŋbek ettı.
1999 jyly QR ŪǦA akademigı Zäki Ahmetovtıŋ jetekşılıgımen «Abaidyŋ estetikalyq mūrasy jäne islam qūndylyqtary» atty taqyrypta kandidattyq dissertasiiasyn qorǧady.
2001 jyly Qazaq memlekettık zaŋ universitetın tämamdady. Sol kezden bastap bırjola osy salaǧa bet būrdy.
2002-2003 jyldary Ūlttyq qauıpsızdık komitetınıŋ Äskeri institutynda «Qazaq tılı» kafedrasynyŋ meŋgeruşısı boldy.
2003-2014 jyldary Qazaqstan Respublikasy Joǧarǧy sotynda bas konsultant, «Memlekettık tıldı damytu jäne redaksiialyq-baspa jūmystary» bölımınıŋ sektor meŋgeruşısı, bölım meŋgeruşısınıŋ orynbasary qyzmetterın atqardy.
2014-2017 jyldary Astana qalasy Almaty audany №2 audandyq sotynyŋ sudiasy;
2017-2020 jyldary Astana qalasynyŋ kämeletke tolmaǧandar ısterı boiynşa audanaralyq arnauly sotynyŋ töraǧasy;
2020 jyldyŋ 8 şıldesınen bastap Nūr-Sūltan qalasy qylmystyq ıster boiynşa audanaralyq arnauly sotynyŋ sudiasy qyzmetın atqardy.
Onyŋ eŋbegı laiyqty baǧalanyp, memlekettık marapattar ielendı.
Babasy bi bolǧan, atasy auyldyq keŋestıŋ töraǧasy, äkesı pedagog bolyp eŋbek etken Qydyrbektıŋ ön boiynan tektılık, degdarlyq aŋǧarylyp tūratyn. Ol qai qyzmettı qolǧa alsa da, tiianaqty atqaratyn. Zaŋ salasyn qazaqtyŋ baiyrǧy dästürıne sai jürgızu jönındegı ūsynystary da köpşılıktıŋ köŋılınen şyqqan edı. Äsırese, BAQ arqyly otbasy institutynyŋ berık boluy, şaŋyraqtaǧy äkenıŋ bedelın arttyru, kämeletke tolmaǧan balalardyŋ qūqyǧyn qorǧau mäselelerın jiı köteretın. Jaqynda ǧana öte bır auyr ıstıŋ nüktesın qoiyp, ädıldıkten mülde küder üzgen bır otbasynyŋ özıne alǧys aitqanyn mereilene aityp edı.
Qydyrbek ülgılı otbasynyŋ egesı edı. Zaiyby – tamaşa ǧalym, filologiia ǧylymdarynyŋ doktory, professor Elmira Nūrlanqyzy Orazalina ekeuı altyn asyqtai üş perzent tärbielep ösırdı.
Ädıldıktı tu ǧyp kötergen, ömırdı ölerdei süigen jürek bır sätte kenetten toqtady. Önegelı ömır sürıp, özı jiı aitatyn «Qaldyrǧan» änındegıdei artyna jyly estelıkter qaldyryp kete bardy.
Alla aldyŋnan jarylqaǧai, Qydyrbek dos! Bız senı eşqaşan ūmytpaimyz!
QazMU-da bırge oqyǧan kurstastary