Astana qalalyq mäslihatynyŋ deputattary qala tırşılıgıne, halyqtyŋ äleumettık jaǧdaiyna qatysty köptegen mäselelerdı köterıp jatady. Mäslihattyŋ 19 jäne 20-sessiialarynda sondai bırqatar tüitkılder aityldy. Eskeretın jaǧdai, būl mäselelerdıŋ bärıne jauapty basqarmalardan tiıstı jauaptar berılgen.
Mäslihat deputaty Miras Şekenov biudjet qarjysy bölıngende, qalanyŋ şetkı aimaqtary qaǧa berıs qala beretınıne nazar audardy. Onyŋ pıkırınşe, būl aimaqtarda joldardyŋ qūrylysy men jöndeluıne, aialdamalardyŋ ornatyluyna, mektepter men özge äleumettık nysandarǧa aparatyn joldarǧa jetkılıktı mölşerde qarjy bölınbeidı. Sondai eldı mekenderdıŋ qataryna «Öndırıs», «Kirpichnyi», «Prigorodnyi», «Telman», «Köktal» tūrǧyn alaptary jatady. Sondai-aq, atalǧan eldı mekenderde densaulyq saqtau jäne bılım beru nysandarynyŋ tapşylyǧyn tūrǧyndar da, deputattar da jyldar boiy aityp jatqan körınedı.
Būǧan qosa, deputat BUS LANE jolaǧynyŋ engızıluıne bailanysty qoǧamdyq kölık jürmeitın uaqyttarda būl jolaqtarǧa jeke kölık ielerıne kölıkterın qaŋtaruǧa rūqsat berudı, jol erejelerın būzatyndarmen kürestı küşeitudı ūsyndy. Miras Şekenovke «1000 sauda orny» tūjyrymdamasy da tüsınıksız. Onyŋ sözınşe, būl mäselenı qaita qarap, sauda pavilondarynyŋ teŋ jartysyn qysqartu qajet.
Onyŋ būl pıkırın ärıptesterı Almaz Kim men Ramziia Umerbaeva qoştaidy. Keiıngısı
sauda oryndarynyŋ «Nūrjol» suly-nuly jelekjolynda saŋyrauqūlaqtai qaptaǧanyna, olardyŋ sol maŋaida halyqtyŋ seruendeuıne qolaisyzdyq tudyratynyna nazar audarady.
Būdan bölek, Ramziia Umerbaeva byltyr mektepterdegı medisinalyq kabinetter bılım beru salasynan alynyp, densaulyq saqtauǧa berılgenın söz ete kelıp, ol uaqytta därıgerler mektepte saǧat 8.00-den-19.30-ǧa deiın jūmys ıstegenın, olarǧa tolyq stavka kölemınde jalaqy tölengenın, endı qazır jalaqylary jūmys uaqytyna säikes kelmeitının jetkızdı.
Mäslihat deputaty Altynşaş Tabuldina medisina qyzmetkerlerın daiyndau sapasyna, äsırese, orta medisinalyq qyzmetkerdı daiyndau mäselesın köterdı. Onyŋ sözınşe, medisinalyq ūiym osyndai qyzmetkerdı jūmysqa qabyldaǧanda qaita daiarlauǧa mäjbür. Taǧy bır mäsele, daiarlanǧan kadrlar jalaqysy joǧary jäne jüktemesı azdau respublikalyq emhanalarǧa köptep ketıp jatyr. Sol sebepten qala emhanalarynda kadr tapşylyǧy mäselesı bar.
Onyŋ aituynşa, Astana qalasynyŋ Densaulyq saqtau basqarmasy elordamen şekaralas jatqan Aqmola oblysynyŋ tiıstı basqarmasymen özara bailanys ornatuy kerek. Onyŋ sebebı, Astananyŋ auruhana, emhanalaryna osy oblysqa jatatyn aimaqtardan emdeluşıler köp keledı. Mäselen, byltyr Astananyŋ №5 emhanasynyŋ özıne özge aimaqtardan 10 myŋnan astam emdeluşı kelgen, olardyŋ 7 myŋnan astamyna tiıstı medisinalyq qyzmet körsetılgen. Kelgen emdeluşılerdıŋ köbısınıŋ aurulary asqynǧan. Olardy emdemeske bolmaidy. Būl öz kezegınde qalanyŋ densaulyq saqtau salasyna bölıngen qarjyǧa salmaq tüsırıp, därı-därmek tapşylyǧyna äkelude. Deputattyŋ oiynşa, sondyqtan halyqtyŋ ambulatorlyq emıne biudjetten bölınetın qarjyny qaita qarau kerek.
Amanǧali QALJANOV
