Ötken aptada Mäjılıste «Halyq kommunisterı» fraksiiasynyŋ deputattary Ükımet nazaryn mamandandyrylǧan mektepterde nemese mügedek balalarǧa arnalǧan synyptarda sabaq beretın mūǧalımder mäselesıne audartqysy keldı. Būl mäselenıŋ halyq qalaulylarynyŋ nazaryna ılıkkenı bızdı quantty, ärine. Degenmen bırneşe deputattyŋ atynan joldanǧan saualdyŋ qūrǧaq derektermen, syldyr sözben örnektelgenıne qarap özımız de oilanyp qaldyq.
«Negızgı mäsele atalǧan bılım beru oryndarynda oqytu prosesıne arnalǧan qajettı oqu qūraldarynyŋ, sondai-aq, sport jäne eŋbek qūral-saimandarynyŋ, sport sabaqtaryna arnalǧan aşyq alaŋdardyŋ jäne sport zaldarynyŋ joqtyǧy bolyp tabylady. Balalarǧa asa qajettı mūǧalımder, logopedter, defektologtar, psihologtar men basqa da mamandar jetıspeidı. Sonymen qatar, mügedek balalardyŋ üiıne baryp oqytatyn mūǧalımder jol şyǧyndaryn öz qaltasynan töleuge mäjbür. Joǧaryda baiandalǧannyŋ negızınde deputattyq saualymyzdy qarap, belgılengen zaŋnamalyq merzımde hat türınde jauap berulerıŋızdı sūraimyz» deidı Magerram Magerramov bastaǧan deputattar Ükımet basşysy Baqytjan Saǧyntaevqa joldaǧan saualynda. Ädette är sözderın sanmen örıp, naqty däiektermen däleldep baryp köteretın deputattardyŋ tarapynan mūndai saualdy kütpegenımız ras. Özderı köterıp otyrǧan mäselenı qūrǧaq, jadaǧai sözben aita salmai, mäselenıŋ mänısın zerttep, baiybyna baryp jetkızuge bolmas pa edı? Deputattardyŋ bılım basqarmasynan būǧan qatysty aqparatty tolyq aluǧa mümkındıgı mol ekenın eskersek, özderınıŋ ızdenuge, jaǧdaiǧa şyn jany aşuǧa qūlyqty bolmai otyrǧanyn ǧana aŋǧaramyz. Deputattar Parlament törınde osylai degesın, būl mäselesın qala boiynşa barysy qalai ekenın bılmek bolyp qalalyq Bılım basqarmasyna habarlastyq.
«Bügıngı taŋda qalamyzda – 6 tiflopedagog, 4 surdopedagog, 57 defektolog jäne 100-ge juyq psiholog jūmys jasaidy. Bılım mekemelerıne 7 psiholog (6 qazaq tılınde 1 orys tılınde), 10 defektolog (2 qazaq tılınde, 8 orys tılınde), 11 logoped (4 qazaq tılınde 7 orys tılınde) jäne qazaq tılınde oqyta alatyn bır surdopedagog pen bır orys tılınde beretın tiflopedagog jetıspeidı» dedı Bılım basqarmasynyŋ baspasöz hatşysy Jazira Asanova.
Sondai deimız-au, deputattar eŋ bolmasa, osyndai aqparattardy ala otyryp, jüielı söz, däleldı uäj aituǧa erındı me eken? Joq, älde būl äiteuır «auyz jybyrlatudyŋ» amaly ma?
Güljan RAHMAN
