Ataqty däulesker küişı Dina apamyzdy bılmeitın qazaq joq. Bala künınde äigılı Qūrmanǧazy babamyz ızdep kelıp, batasyn bergen küişı qyz jas kezınen batys öŋırındegı Däuletkerei, Müsırälı, Älıkei, Türkeş, Ūzaq, Esjan, Baijūma, Balamaisaŋ sekıldı daŋqty dombyraşylardyŋ şyǧarmalaryn şeber oryndaidy.
Oǧan bır jaǧynan küi atasy Qūrmanǧazynyŋ da yqpaly bolǧan. Ol Dinaǧa toǧyz jasynan bastap qasiettı dombyranyŋ qyr-syryn üiretedı. Būl küişı apamyzǧa būiyrǧan taǧdyrdyŋ erekşe syiy edı. Keiın Qūrmanǧazynyŋ küilerı Nūrpeiısova arqyly bügıngı ūrpaqqa jettı. Özı de ūstazyna tartyp, qoltaŋbasy dara bıraz küilerdı tudyrdy.
Būl kısı jas ülkeiıp qalsa da, dombyradan alystaǧan emes. 1937 jyly, iaǧni 75 jasynda halyq önerpazdarynyŋ respublikalyq baiqauyna qatysyp, top jardy. Al 1944 jyly 83 jasynda Orta Aziianyŋ bes respublikasynyŋ önerpazdary qatysqan Taşkenttegı on kündıkte Dina Nūrpeiısova taǧy da jüldelı orynǧa ie boldy.
Mıne, osyndai aiauly jannyŋ asyl serıgı bolǧan dombyrasy būl künde elordadaǧy Ūlttyq muzeidıŋ «Qazaqstan tarihy» zalynda tūr. Būl turaly bızge atalǧan muzeidıŋ qyzmetkerı Läilä Noǧaibekqyzy baiandap berdı. Onyŋ aituynşa, küişınıŋ qolynyŋ taby qalǧan būl aspapty 1939 jyly şeber Arystan Ermekov qaiyŋ aǧaşynan jasaǧan eken. Jädıgerdı 2003 jyly QR Prezidenttık mädeniet ortalyǧynyŋ materialdyq mädeni-tūrmystyq zattar qoryna belgılı muzyka zertteuşısı, professor Bolat Sarybaev tapsyrǧan. Dina apamyz Ekınşı düniejüzılık soǧys kezınde bıraz uaqyt Sarybaevtar otbasymen körşı tūrǧan. Bolattyŋ muzykalyq qabıletın baiqaǧan ol kısı oǧan özınıŋ dombyrasyn syiǧa tartady. Küişınıŋ «Ömırımdegı eŋ asylym – osy dombyra, közımdei körıp jür» degen sözı Bolat Sarybaevtyŋ köŋılınde jattalyp, bar ǧūmyryn qazaqtyŋ muzykalyq aspaptaryn jinap, än-küi mūrasyn zertteuge türtkı bolǧan eken.
Azamat ESENJOL
