Bırer kün būryn Sybailas jemqorlyqqa qarsy küres jönındegı Ūlttyq biuro Qazaqstannyŋ Özbekstandaǧy elşısı Erık Ötembaevtyŋ asa ırı kölemde biudjet aqşasyn ūrlady degen küdıkke ılıngenın habarlady. Qūzyrly mekemenıŋ resmi ökılı Janna Bastarova E.Ötembaevtyŋ Özbekstandaǧy elşılıgımızdıŋ äkımşılık ǧimaratynyŋ qūrylysy boiynşa jalǧan aktılerge qol qoiǧanyn rastady. Zaŋsyz ıs-qimyldyŋ saldarynan elımızge 140 million teŋgeden asa ziian kelgen. Säl keiınırek Syrtqy ıster ministrlıgınıŋ baspasöz qyzmetınıŋ jetekşısı Aibek Smadiiarov «Ötembaevtyŋ ısı» asa ırı kölemde para aldy dep aiyptalǧan Syrtqy ıster ministrlıgınıŋ būrynǧy jauapty hatşysy Anarbek Qaraşevtıŋ tūtqyndaluymen bailanysty ekenın mälımdedı.
Syrtqy ıster ministrı Qairat Äbdırahmanov jemqorlyqqa qatysty janjaldyŋ elımızdıŋ halyqaralyq bedelıne eşqandai nūqsan keltırmedı dep sanaidy. «Nūqsan keledı dep oilamaimyn. Bızdıŋ özımız būl ıstıŋ aşyq, ädıl tergeluıne jäne keleşekte mūndai oqiǧalardyŋ qaitalanbauyna müddelımız» dedı ministr jurnalisterge bergen jauabynda. Al juyrda Qazaqstan Prezidentınıŋ Jarlyǧymen Erık Ötembaevtyŋ atqarǧan qyzmetınen şettetılgenı mälım.
«Ötembaevtyŋ ısıne» orai, bız qazaqstandyq diplomattardyŋ qatysuymen oryn alǧan būrynǧy janjaldardy eske tüsırudı jön kördık. Edıreŋdegen elşılıktegıler janjaldardan rekord jasaǧan jyly – 2011. Nauryz aiynda Ūlybritaniiadaǧy Qazaqstan elşılıgınıŋ üşınşı hatşysy Rahat Tūrlyhanovty elge qaitardy. Ol Londonda bırneşe märte jol jüru, avtokölıktı tūraqqa qoiu erejelerın būzyp, aiyppūl töledı. Sol aida Qazaqstannyŋ Berlindegı elşılıgınıŋ attaşesı Daniiar Atanov taksişımen töbelestı. Ol jürgızuşı qymbat sūrady dep jol aqysyn töleuden bas tartqan. Qataŋ sögıs alǧan diplomatty elge şaqyrtty. Säuır aiynda Qazaqstannyŋ IýNESKO janyndaǧy ökılınıŋ keŋesşısı Valerii Tolmachev Parijden Rimge ūşaqqa mınıp, äue kemesın Liviia astanasyna qondyrudy talap ettı. Stiuardessanyŋ tamaǧyn kışkene pyşaqpen tılgen otandasymyzdy italian polisiiasy tūtqyndady. 2013 jyly Germaniiada bas konsulymyz Ahat Alpysbaev pen onyŋ kömekşısı Qairat Adyrov tūtqyndaldy. Salyq salynbaityn temekını tasymaldaǧan diplomattar 2 jyl 8 aiǧa sottaldy. 2014 jyly Norvegiiadaǧy Qazaqstannyŋ konsuly Quanyş Aǧaidarovqa alkogol önımderı men qyzmettık qūjattardy ūrlady degen aiyp taǧyldy. Köp ūzamai ol Oslodan elge qaitty. 2016 jyly Qazaqstannyŋ Ündıstandaǧy eks-konsuly Räşid Rahymbekov 1 jyl 6 aiǧa bas bostandyǧynan airylyp, 26 million teŋge aiyppūl töledı. Söitse, ol batpanqūiryq qyzmetın paidalanyp, Ündıstan azamattaryna zaŋsyz jolmen 1700 ıskerlık viza berıptı. Bızdıŋ elşıler men diplomattardyŋ basy daudan arylmaityny nesı eken?..
