Keşe Astanada «Dostyq – bırlık nyşany» atty jastar arasynda etnosaralyq kelısımdı nyǧaituǧa baǧyttalǧan festival öttı. Şarany Astana qalasy Qazaqstan halqy Assambleiasy hatşylyǧynyŋ qoldauymen qalalyq jastar saiasaty mäselelerı basqarmasy ūiymdastyrdy.
– Qazaqstanda qanşama etnostar bır şaŋyraqtyŋ astynda bır üidıŋ balasyndai tatu-tättı ömır sürıp otyr. Būl bır ǧanibet emes pe?! Halqymyzdyŋ osy bırlıgı men tūraqtylyǧyn saqtauymyz kerek. Elbasy qazır aldymyzǧa damyǧan otyz eldıŋ qataryna kıru maqsatyn qoiyp otyr. Sol üşın jastar künı-tünı damyl tappauy qajet. Sebebı jastarymyz qandai bolsa, bolaşaǧymyz da sondai bolatyny aidan anyq. Bügınderı kereksız, jaǧymsyz ädetterdı tastap, boiymyzǧa qajet mınezdı sıŋıruımız kerek. Äsırese, mädeni mūramyzdy saqtap qana qoimai, ony ary qarai damytuǧa tiıstımız. Mäselen, Abai atamyzdyŋ aqyly, Mūhtar Äuezovtıŋ naqyly, Jambyl Jabaevtyŋ jyry, Qūrmanǧazynyŋ küilerı keremet mūra ǧoi! Bolaşaǧymyzǧa baǧdar beretın osyndai tūlǧalar, – dedı QR Parlamentı Mäjılısınıŋ deputaty Gennadii Şipovskih.
Festivalge etnomädeni bırlestıkterdıŋ jastar qanatynyŋ ökılderı, qala jastary, mektep oquşylary men studenttık ūiymdar qatysyp, än salyp, bi bilep, öleŋ oqydy. Şaranyŋ soŋynda qatysuşylarǧa alǧys hattar men baǧaly syilyqtar tapsyryldy.
Amanǧali QALJANOV
