Astana äkımdıgı janynan Qalalyq damu akseleratory qūryluda. Būl – qalalyq iKomek monitoring jäne jedel äreket etu ortalyǧynyŋ bazasynda qūrylatyn jaŋa jūmys toby.
Elorda tūrǧyndary «109» jedel jelısıne qaladaǧy türlı mäsele boiynşa öz ötınışterı men ūsynystaryn, şaǧymdaryn täulık boiy joldap, atalmyş servistı belsendı türde paidalanuda. iKomek ortalyǧy arqyly astanalyqtar biylǧy 11 ai ışınde 793 myŋnan asa ötınış-tılekterın aityp, mäsele köterse, onyŋ 99 paiyzy oŋ şeşımın tapqan.
Qalalyq damu akseleratorynyŋ qūramyna äkımdık qyzmetkerlerı men qoǧamdyq bırlestık ökılderı, sarapşylar, ǧalymdar, käsıpkerler, belsendı tūrǧyndar kırıp, jūmys tobyna şahar basşysy men onyŋ orynbasarlary jetekşılık etedı. Būl jūmys tobyn qūrudaǧy maqsat – az uaqyt ışınde, iaǧni ūzaǧany 100 künde qaladaǧy köptegen tüitkıldıŋ tüiının şeşu. Jalpy, damu akseleratorynyŋ mındetı – mäselenı şeşumen qatar, damudyŋ strategiialyq körsetkışterıne de qol jetkızu.
Mūndai damu akseleratory osyǧan deiın Dubai qalasynda memlekettık deŋgeide jūmys jürgızıp, qysqa merzım ışınde joǧary jetıstıkterge qol jetkızıptı. Atap aitqanda, 60 kün ışınde eŋ qauıptı bes jolǧa özgerıs engızılıp, nätijesınde 24 adamnyŋ ömırı qūtqarylyp, memlekettık biudjettıŋ 63 paiyzynyŋ ünemdeluıne äser etken. Sonymen qatar 100 kün ışınde qarjy sektorynda myŋnan asa jūmys orny aşylyp, Emirates Global Aluminium zauytynyŋ şyǧyndary 16 paiyzǧa kemıgen desedı. Būl täjıribe endı Astanada jüzege asyrylmaq.
