«Önerde şekara joq» deimız. Būl sözdıŋ bekerden-beker aitylmaitynyn bızben qoştasqaly tūrǧan jyl taǧy däleldedı. Keşegı Edıl patşa (Attila) babamyz Europany qarumen jaulasa, bügıngı onyŋ ūrpaqtary önermen baǧyndyryp, London, Kann, Mäskeu, Minsk siiaqty älem qalalaryna mädeni joryqpen bardy.
Daryndy ūlymyz Dimaş Qūdaibergen byltyr I am a singer baiqauyna qatysqan uaqyttan jahan jūrtşylyǧynyŋ nazaryn özıne audardy. Sol baiqauda ekınşı oryndy jeŋıp alǧan ol biyl Londonnan bır-aq şyqty. Angliia astanasynda Dimaştyŋ jeke konsertı ötken konsert zaly körermenge lyq toldy. Älemnıŋ 45 memleketınen jinalǧan halyq qazaq balasynyŋ önerıne qol soqty. Dimaş otyzǧa tarta än şyrqasa, sonyŋ ışınde «Daididau», «Saǧyndym», «Qazaqstan, alǧa!» syndy qazaqtyŋ änderı boldy. Ekı saǧatqa sozylǧan konsert ǧajaiyp şouǧa ainaldy.
Būl keştıŋ bır erekşelıgı – tüsken qarjynyŋ bärı elımızdıŋ jas daryndaryn qoldauǧa baǧyttalady. Osylaişa Dimaş örelı önerımen özınen keiın şyǧatyn talanttarǧa şapaǧatyn tigızıp otyr. Būl jaǧdai «Sūŋqar jemın şaşyp jeidı» degen sözdı eske tüsıredı. Jaqynda änşı «Älem aruy-2018» baiqauyna baryp, än äuelettı. Onda da ol bosqa barǧan joq, Qazaqstan atynan būl synǧa tüsken arudy demeu üşın bardy.
Ötken köktemnen berı jūrttyŋ auzynda qazaqtyŋ qarşadai qyzy jür. Kann kinofestivalıne ūsynylǧan «Aika» filmınde basty röldı somdaǧan Samal Esliamova «Üzdık aktrisa» atanyp, älem nazaryn Qazaqstanǧa qaratty. Atalmyş kinofestival kino älemındegı eŋ bedeldı baiqaulardyŋ bırı ekenın aita ketu kerek. Endı «Oskardan» da dämelımız. «Aika» filmı Qazaqstannyŋ atynan «Şeteldık üzdık film» atalymy boiynşa «Oskar» jüldesınıŋ şort-paraǧyna kırdı. Aldaǧy jyldyŋ basynda endı mūhittyŋ arǧy jaǧynan süiınşı sūraityn jaŋalyqty kütemız.
Osydan üş jyl būryn «Aialaǧan Astana» balalardyŋ muzyka baiqauynda Daneliia Töleşova degen esım jarq ettı. Elordada ötken būl baiqaudan keiın daryndy qyzymyz biıkterge samǧady. Byltyr Ukrainada «Dauys. Balalar», Reseide «Europa ümıtterı» baiqaularynda bas jüldenı ielendı. Al biyl «Halyqtyŋ süiıktısı» jäne «BraVo» premiialaryn aldy. «Junior Evrovision-2018» baiqauynyŋ ırıkteu kezeŋınde oǧan teŋ keler jas änşı bolmady. Alaida «baq şaba ma, bap şaba ma» demekşı, aqtyq kezeŋge kelgende altynşy orynnan körındı. Bar bolǧany 12 jastaǧy ǧana Daneliianyŋ ülken jeŋısterı älı alda dep senemız.
Matematika men muzykany ūştastyrǧan jas pianist, kompozitor, «Daryn» memlekettık jastar syilyǧynyŋ eŋ jas laureaty, byltyr elımızde alǧaş ūiymdastyrylǧan «100 jaŋa esım» jobasynyŋ jeŋımpazy Rahat-Bi Äbdısaǧin Rim qalasyndaǧy Santa-Chechiliia akademiiasynyŋ doktoranturasymen qatar İtaliianyŋ Paduia qalasyndaǧy konservatoriiada oqyp jatyr. Daryndy kompozitordyŋ köp şyǧarmalarynyŋ premerasy älem sahnalarynda ötken. Atap aitsaq, Parijdegı IýNESKO ştab-päterınde, Londonda, Seulde, Ankarada, basqa da köptegen qalalarda oryndaldy. Al biyl Rahat-Bidıŋ «Zymyran zaman» atty alǧaşqy avtorlyq konsertı elorda törındegı «Astana Opera» teatrynda ūiymdastyryldy. Keler jyly jiyrmaǧa tolatyn daryndy jıgıttıŋ alar asuy mol.
Astanalyq közdı bailap suret salatyn suretşı Renat Elubaev şetelderde şeberlık sabaqtaryn, körmelerın ötkızıp jür. Biyl «Rossiia-1» telearnasyndaǧy «Ǧajaiyp adamdar» şouyna qatysyp, ormandai orys jūrtyn taŋǧaldyrdy. Renat osyndai şyǧarmaşylyq jeŋıstermen qazaq beineleu önerınıŋ bolaşaǧy jarqyn ekenın däleldep keledı.
Bız biyl öner salasynda älemdık deŋgeide körınıp, özımızdı täntı etken daryndy jastardy ǧana atap öttık. Negızı, elımızde talantty jastar öte köp. Aldaǧy «Jastar jyly» olardy qoldau tiıstı därejede bolsa, jaŋa esımderdı estitınımız kümänsız. Laiym solai bolsyn!
