10 mausym künı «EKSPO-2017» halyqaralyq mamandandyrylǧan körmesı barşa älemge esıgın aiqara aşady. Körme Astanada ötedı degen künnen bastap nysandardyŋ qūrylys jūmystary 6 jylǧa eseptelgen bolatyn. Prezidenttıŋ jan-jaqty kömegı men qoldauy arqasynda qūrylys 21 aida aiaqtalyp, qonaqtardy qarsy aluǧa daiyn tūr. Düiım jūrt köz tıkken ǧimarattardyŋ körmeden keiıngı taǧdyry köpşılıktı qyzyqtyratyny anyq. «Astana EKSPO-2017» ūlttyq kompaniiasynyŋ basqarma töraǧasy Ahmetjan Esımov EKSPO nysandary ozyq jobalardyŋ jalǧasyna ainalady deidı.
EKSPO nysandaryn şaradan keiın paidalanu boiynşa qazırdıŋ özınde jiyrmadan astam ūsynys tüstı. Kompaniia basşysy Ahmetjan Esımovtıŋ aituynşa, nysan ornynda älemge äigılı Job World bılım beru ortalyqtary aşyluy mümkın. Qazırgı taŋda mamandar koreilık ärıptestermen kelıssöz jürgızıp, täjıribesın zerttep jatyr.
– 2015 jyly EKSPO körmesı Milanda ötkenın bılesızder. Körmeden keiın pavilondardyŋ barlyǧy būzylyp, alynyp tastalǧan edı. Al bız äu bastan körmenı ūzaq merzımdı investisiialyq joba retınde qarastyrdyq. Sondyqtan basty nysan – sfera «Nūr älem» dep atalyp, bolaşaq mūrajaiǧa ainalady. Sebebı onda ǧaryş, kün, su, jer, kinetika energiiasyna qatysty aluan türlı jobalar ūsynylǧan. Tarihta «Nūr älem» körmeden qalǧan mūra bolyp qalmaq, – dedı basqarma töraǧasy Ahmetjan Esımov.
Körme aiaqtalǧannan keiın şeteldık meimandar men delegattar halyqaralyq pavilondardy bosatady. EKSPO ūiymdastyruşylary olardy paidaly jobalarǧa tapsyrudy josparlap otyr. Mäselen, pavilondardyŋ ornyna Bırıkken Ūlttar Ūiymynyŋ «jasyl» ekonomika ortalyǧy men «Astana» halyqaralyq qarjy ortalyǧy qūrylady. IT tehnologiia salasyndaǧy bastamalarǧa da osy jerde oryn berıledı.
Jaqyn arada naqty jüzege asatyn joba – halyqaralyq bılım beru ortalyǧyna qaita oralaiyq. Ortalyq mektepke deiıngı büldırşınderge, oquşylarǧa jäne 24-ke deiıngı jastarǧa arnalǧan. Onda balalar ärtürlı mamandyqtarmen jaqynyraq tanysyp, zerttep-zerdelep, bolaşaqta süiıktı jūmysyn özderı taŋdaidy. Barlyq damyǧan memleketterde osyndai Job World ortalyqtary bar. «Bızdıŋ balalar da janyna jaqyn käsıptı qyzyǧuşylyǧyna qarai taŋdauy kerek. Jastar ört söndıruşı, därıger, qūrylysşy, aspazşy siiaqty türlı-türlı mamandyqtyŋ erekşelıgımen tanyssa, özıne keregın taŋdap alady. Al qazır köbınese balalardyŋ äke-şeşesı joǧary jalaqy tölenetın mamandyqqa baruǧa itermeleidı. Bıraq oqu bıtırgennen keiın jastardyŋ käsıbıne köŋılı tolmai jatady. Mūny bızdıŋ pavilondardyŋ negızınde jasauǧa bolady» dedı A.Esımov.
Ortalyq memleket qaramaǧynda bolady, būl köptegen demeuşılerdı tartuǧa mümkındık tuǧyzady. Al demeuşıler 20-24 jastaǧy jastar arasynan daiyn mamandy ırıktep alady.
«Elu jylda – el jaŋa» dep qazaq beker aitpaidy. Bügın ülken sūranysqa ie mamandyqtar erteŋgı künı müldem kereksız bolyp qaluy mümkın. Bälkım, «bolaşaq energiiasyn» zertteitın adam sol balalardyŋ qatarynda bolar?!
Kompaniia töraǧasy «körmege deiın ülgermeidı» dep halyqty dürlıktırıp jatqandarǧa jauap berdı.
– Qatysuşy memleketterge pavilondardy qaraşanyŋ bırınen bastap tapsyrdyq. Alaida bırqatar memleket qūrylys jūmystaryn keş bastady. Degenmen şaranyŋ saltanatty aşylu räsımıne deiın bärın ülgeruımız kerek. Milandaǧy körmede halyqaralyq pavilondar der kezınde aiaqtalmai, aşylu saltanatynan keiın de qūrylys jürıp jatty. Bız būl qatelıkterdı qaitalamaimyz, – dep taqyrypqa nükte qoidy kompaniia basşysy.
Kompaniia töraǧasy Ahmetjan Esımov osydan ekı jyl būrynǧy estelıktermen bölıstı. Onyŋ aituynşa, ötken jyly körmege qatysuǧa niet bıldırgen eldıŋ sany bar-joǧy 30 bolǧan. Al bügıngı taŋda onyŋ sany 115 elge jettı. EKSPO taqyrybyna älem elderı de, Otanymyzdyŋ qarapaiym azamattary da qyzyǧuşylyq tanytyp otyr. Basqarma töraǧasy ötken jyly otandyq önertapqyştar arasynda baiqau ötkenın aitty. Bır aidyŋ ışınde 200-den astam jūmys kelıp tüstı. Basym bölıgınıŋ patentı bar.
– Prezidenttıŋ körmege «Bolaşaq energiiasy» taqyrybyn taŋdaǧany beker emes. Bügınde mūnaily memleketter şikızattyŋ baǧasyna täueldı bolyp otyrǧanyn körıp otyrmyz. Elbasy qazba bailyqtan basqa da energiianyŋ balamaly közderın ızdestırudı bırneşe ret aitqan edı. Şynymen de, mūnai men şikızat közderınıŋ baǧasy tüskende, elımızge ony eksporttau tiımsız bolady. Menıŋ oiymşa, körmenıŋ elordamyzda ötuı būl salaǧa serpın bererı anyq, – dep sözın tüiındedı A.Esımov.
Güldana TALǦATQYZY
