Qazaqstan Respublikasynyŋ Prezidentı Nūrsūltan Nazarbaev qazaqstandyqtardy Oraza ait merekesımen qūttyqtady, dep habarlaidy Aqordanyŋ baspasöz qyzmetı.
Qūrmettı otandastar!
Barşaŋyzdy mūsylmandardyŋ qasiettı Oraza ait merekesımen qūttyqtaimyn!
Ramazan – adamzat balasyn ruhani tazaru arqyly meiırımdılık pen sabyrlylyqqa jeteleitın ūlyq ta qasiettı ailardyŋ bırı.
Oraza aittyŋ şuaqty künderınde mūsylmandar bır-bırıne aittap, jyly lebızderı men ızgı tılekterın bıldıredı.
Mūqtaj jandarǧa qol ūşyn sozyp, quanyşqa keneltu de – qasiettı merekenıŋ jarqyn körınısterınıŋ bırı.
Oraza ait – bır şaŋyraqtyŋ astynda auyzbırşılık pen kelısımde ömır sürıp jatqan barşa qazaqstandyqtardy bırıktıre tüsetın yntymaq meiramy.
Osy myzǧymas qūndylyqtarymyzdyŋ arqasynda bız Täuelsızdık alǧannan bergı 25 jylda qarqyndy türde damyp kelemız.
Qasterlı Qazaqstan jerınde ötetın älemdık jäne dästürlı dınder liderlerınıŋ sezı örkenietter ündestıgıne sübelı üles bolyp qosyluda.
Oraza ait merekesındegı igı ıster islamnyŋ qaiyrymdylyq pen meiırımdılıktıŋ, özara kömek pen janaşyrlyqtyŋ dını ekenın aişyqtai tüsedı.
Qasiettı meiram künderı ärbır şaŋyraqqa şattyq pen densaulyq, igılık pen baq-bereke tıleimın.
Elımızde bırlık pen kelısım saltanat qūra bersın!
Oraza ait merekesı qūtty bolsyn!
