Astanada 11-13 qyrküiek künderı Qazaq handyǧynyŋ 550 jyldyǧyna arnalǧan saltanatty şaralar ötedı.
Būl turaly Ortalyq kommunikasiialar qyzmetındegı brifingte QR Mädeniet jäne sport ministrlıgı mädeniet jäne öner ısterı departamentınıŋ direktory Aqtoty Raiymqūlova mälım öttı.
Biylǧy memlekettık mereitoilardyŋ ışınde ūlttyq tarihymyzdy, şyqqan tamyrymyzdy tüptep tanuǧa, eldıgımızdı baǧalap, erlıgımızdı därıpteuge jeteleitın – Qazaq handyǧynyŋ 550 jyldyq toiynyŋ salmaǧy airyqşa desek bolady. Sondyqtan da, aituly mereke ekı kezeŋde ötpek. Alǧaşqysy – Astanadan bastau alsa, ekınşısı – 9 qazanda Qazaq handyǧynyŋ tuy tıgılgen talaiǧy Taraz jerınde jalǧaspaq.
Aqtoty Raiymqūlovanyŋ aituynşa, 11 qyrküiek künı Täuelsızdık saraiynda Qazaq handyǧynyŋ 550 jyldyǧyna arnalǧan saltanatty jiyn ötedı. Al, tüsten keiın Nazarbaev universitetınde «Mäŋgılık el» taqyrybynda halyqaralyq ǧylymi-täjıribelık konferensiia ūiymdastyrylmaq. Sondai-aq, keşqūrym «Barys» mūz saraiynda teatrlandyrylǧan mazmūndy qoiylym körsetıledı.
Osyǧan orai, Astana qalalyq mädeniet basqarmasynyŋ basşysy Bolat Majaǧūlov: – Ülken mereke aiasynda «Qazaq elı» monumentı alaŋy üş künge elorda tūrǧyndary men qala qonaqtary tamaşalai alatyn ülken etno-auylǧa ainalady. Alaŋda elu kiız üi tıgılıp, ekı ülken sahna, altybaqandar, sporttyq alaŋdar, taiqazandar jäne basqa da nysandar ornatylady, – dedı.
Bas qalada ötetın mereitoidy bastap beru mındetı halqymyzdyŋ ardaqty ūly Asanälı Äşımovke jüktelıptı. Ataqty tūlǧa aituly mereke jaiynda da öz pıkırın bıldırıp:
– Halqymyz üşın Qazaq handyǧynyŋ 550 jyldyq merekesınıŋ orny bölek. Bügıngı öskeleŋ ūrpaq jastaiynan elınıŋ tarihyn, dästürın bılıp ösuı kerek. Juyrda men Oraldaǧy Bökei, Jäŋgır handar ömır sürgen «Orda» degen tarihi elde boldym. Ol jerde de kölemdı şaralar öttı. Endı elorda törınde aituly mereke toilanbaq. Osy airyqşa uaqiǧany bastap beru mındetı maǧan tapsyrylǧanyna erekşe baqyttymyn. Sondai-aq, men qyzmet ısteitın M.Äuezov teatrynyŋ ärtısterı de osy şaraǧa atsalysady, – dedı.
Aitpaqşy, merzımdı baspasözde de, äleumettık jelıde de Qazaq handyǧynyŋ torqaly toiyna orai qolǧa alynǧan film jaiynda türlı pıkırlerdıŋ aitylyp jürgenı mälım. Sondyqtan, Aqtoty Raiymqūlova jaŋa tuyndyǧa qatysty:
– Kino öndırısı öte kürdelı sala bolyp esepteledı. Ony daiyndau, akterlardy ırıkteu, tüsıru merzımderı bolady. Bügıngı taŋda Qazaq handyǧy turaly film daiyndyq merzımınen ötıp, tüsırılım jūmystaryna kırıstı. Jeltoqsanǧa qarai alǧaşqy seriialardy köremız degen ümıttemız, – dedı.
Azamat ESENJOL
