Memleket basşysy Astana qalasyn damytu mäselelerı jönınde keŋes ötkızdı. Qazaqstan Prezidentıne būǧan deiıngı berılgen tapsyrmalardyŋ oryndalu barysy jäne elorda qūrylysynyŋ perspektivalyq jospary jönınde baiandaldy.
Keŋeske Prezident Äkımşılıgınıŋ Basşysy Ä.Jaqsybekov, Astana qalasynyŋ äkımı Ä.İsekeşev, Astana qalasy äkımınıŋ bırınşı orynbasary S.Horoşun jäne Astana qalasynyŋ säulet, qala qūrylysy jäne jer qatynastary basqarmasynyŋ basşysy B.Taitaliev qatysty.
Elbasy qala qūrylysyn jürgızu barysynda qazırgı infraqūrylym men kommunikasiialardyŋ mümkındıkterın eskeru maŋyzdy ekenın aitty.
Äset İsekeşev Nūrsūltan Nazarbaevqa elorda qūrylysynyŋ besjyldyq jospary men jaŋa nysandar salu perspektivalary jönınde mälımdedı.
– Jospar aiasynda 5 qūrylys aimaǧy qarastyrylǧan. 2023 jylǧa deiın 9,5 million şarşy metr tūrǧyn üi salynyp, 500 myŋ adamǧa arnalǧan 156 myŋ päter berıledı. 2027 jylǧa deiın 800 myŋ adamǧa arnalǧan 16 million şarşy metr tūrǧyn üi salynady. Osylaişa, Sızdıŋ tapsyrmaŋyzǧa säikes, qalamyzda 2 million adamnyŋ tūruyna jaǧdai jasalatyn bolady, – dedı Astana qalasynyŋ äkımı.
Keŋes qorytyndysy boiynşa Qazaqstan Prezidentı Astana qalasyn odan ärı damytu jönınde bırqatar naqty tapsyrma berdı.
