Äkım YSQAQ, QR Parlamentı Mäjılısınıŋ
1-şaqyrylymynyŋ deputaty, qoǧam qairatkerı
Aqmolaǧa alǧaş kelgen sätımız älı künge esımde, bärı tura keşegıdei siiaqty. Ūly köşke erıp, 1997 jyly jeltoqsannyŋ 8-ı künı poiyzben Almatydan şyqtyq, 9-y osynda vokzaldan tüstık. Şynyn aitu kerek, bızdı mamyrajai mezgıl kütıp tūrmaǧanyn bılsek te, mūndai boran, qatty aiaz bar dep oilamasaq kerek. Bızdı bolaşaq astanamyz öte suyq qarsy aldy. Sol jyldary Aqmola oblysynyŋ äkımı bolyp tūrǧan Jänıbek Kärıbjanov şaǧyn mitingı ötkızdı de, jyldamdatyp avtobustarǧa otyruymyzdy ötındı. Sodan bızdı «Turist» qonaq üiıne äkeldı. Bas qaladaǧy bastapqy baspanamyz osy jer boldy. Bıraq künnıŋ suyǧynan beter adamdarynyŋ suyqtyǧy bızdı odan saiyn şoşytqanyn da jasyra almaimyn. Suyqtyǧy tuǧan tılınde emes, orys tılınde şüldırleuımen sezılgen bır qyz bızdı qonaqüige ornalastyrdy. Ol qalalyq Jastar komitetınen eken. Ärine, onyŋ būlai basqa tılde söileuı bärımızge ūnaǧan joq. Qasymda Aqtöbeden sailanǧan Mäjılıs deputaty Tölegen Quanyş bar edı, ol da jaqtyra qoimasa kerek liftıge mıngen kezde: «Qaryndas, atyŋyz kım bolady?», degen edı, «Eto ne obiazatelno» dep tars etken jauap aldy. Sosyn men de qarap qalmadym: «Ainalaiyn, qaryndasym, qazaqşa bılesıŋ be özıŋ? Kelgelı berı orysşa söilep jatyrsyŋ» dep edım, ündemei tömen qarady. «Teper eto obiazatelno!» dep qosyp qoidym. Sosyn kelesı künı taŋerteŋ astyna tüsıp, düŋgırşekten gazet alaiyn dep kelsem, bırde-bır qazaqşa gazet joq. Işımnen «Qūdai aqyryn bersın!» dep özımdı tynyştandyrdym. Tıptı satpaq tügılı osy elde şyǧatyn qazaq tılındegı gazetterdı bılmeidı, nege būlai ekenın sūrasaŋ, qazaq gazetterın eşkım almaidy, kerek emes dep şorşyp tüstı. Eŋ bolmasa «Egemen Qazaqstan», «Ana tılı», «Jas Alaş», «Qazaq Ädebietı», «Qazaq elı» siiaqty respublikalyq gazetterdıŋ eşqaisysyn bılmeidı. Öŋkei «Spid-infodan» bastalǧan Reseidıŋ gazetterın toltyryp qoiǧan. Bükıl qala boiynşa solai. Kölıkke otyryp, onşaqty düŋgırşekterdı araladym, bärınde de osy bır körınıs! Söitıp ony keiın özım qolǧa aldym, tiıstı jerlerge habarlasyp, qaita-qaita talap etıp jürıp, qazaq gazetterın qala düŋgırşekterıne aldyrttym. Sonyŋ özınde taŋerteŋ erte baryp, kezekke tūryp almasaŋ, gazet jetpei qalatyn. Öitkenı deputtardan artylmaityn.
10-jeltoqsanda taŋerteŋ Elbasy özınıŋ rezidensiiasyna bärımızdı jinap, bırlesken mälımdeme jasady. Ol mälımdemede Prezident, Ükımet, Parlament bırıgıp, Aqmola qalasyn QR-nyŋ astanasy dep jariialady. Älı künge deiın esımde, bır ülken papka berıp, soǧan bärımız qol qoiǧanbyz. Ärine, bärımız de boiymyzda, jüregımızde patriottyq sezımı bar azamattarmyz, bıraq sondai suyq jerge kelgenımız janymyzǧa batatyn. Tıptı arasynda tübı qaitadan Almatyǧa köşetın şyǧarmyz degen de oilar keletın. Sebebı mynadai aiazdy jerde tūru oŋai emes şyǧar dep oilaitynbyz. Parlamentte jöndeu jūmystary köpke deiın bıtpei jatty. Bıraz uaqyt ötkesın kabinetterdı böldı. Jiı-jiı ıs saparǧa şyǧyp tūrdyq, sol kezde Aqmoladan tezırek ketuge bärımız de asyǧatynbyz. Tütek boran kezınde keide tıptı özımız tūratyn «Turizm» qonaq üiınen parlamentke jetu üşın kölık şaqyratynbyz. Qūlaǧymyz ben betımız üsıgen kezder de boldy. Bıraq keiın bärı qalypqa keldı, suyǧyna da üirendık. Kün de jylyndy. Astana – naǧyz Qazaqstan Respublikasynyŋ astanasy degen atqa laiyqty bolyp özgerdı, östı, damydy. Qazır men elordany öte jaqsy körem, ony jaqsy körmeu mümkın emes. Mūnda balalarym ösıp jetıldı. Olar osynda otbasyly bolyp, nemerelerım düniege keldı. Sondyqtan men üşın qazır älemdegı eŋ qymbat qala – Nūr-Sūltan.
Astananyŋ men üşın taǧy öte qymbat bolatyny arada üş kün ötken soŋ bır jyl boiy talqyǧa tüsken, Ükımetpen «şaiqasa» jürıp daiyndaǧan jäne özıne balama ūsynǧan, tūŋǧyş qazaq tılınde jazylǧan «Halyqtyŋ köşı-qony turaly» zaŋ jobama Elbasymyz Nūrsūltan Äbışūly Nazarbaev 13 jeltoqsan 1997 jyly osy elordada qol qoiyp, öz Jarlyǧymen Qazaqstan Respublikasynyŋ zaŋy dep jariialady. Bükıl teledidar, baspasöz börkın aspanǧa laqtyryp, süiınşı sūraǧan, şetten kelgen aǧaiyndardan, ziialy qauym ökılderınen, şet elderdegı qazaqtardan jüzdegen qūttyqtaular alǧanym esımde! Būl tek Parlamenttıŋ ǧana emes, Astana tarihyndaǧy alǧaşqy aituly oqiǧa bolǧany sözsız. Ärı būl men üşın zor maqtanyş edı, sol künı elorda qanşa suyq bolsa da, maǧan ystyq bolyp körındı.
Al Aqmolany astana etudıŋ maŋyzyna kelsek, ärine mūnyŋ astarynda osy jaqty qazaqilandyru, täuelsızdıktı nyǧaitu ideialary tūrdy. Sebebı osynda alǧaş kelgen kezde kün de suyq, ärı osyndaǧy qazaqtar da suyq qaraityn. Qazaqşa sūrasaq, orysşa jauap beretın, keide müldem jauap bermeitın. Onyŋ üstıne soltüstık jaq jaqyn. Kezınde soltüstık öŋırlerdı bötenge beru turaly äŋgıme de bolǧany ras. Mıne, osy saiasi mäsele elordany oŋtüstıkten soltüsttıkke köşıruge negız boldy dep oilaimyn. Sodan berı elorda köp qazaqilandy. Būryn bır ǧana qazaq mektebı bolsa, qazır täuba, qūdaiǧa şükır, bärı de oŋynan oraldy.
