Turizmnıŋ barlyq salasyn damytuǧa mümkındıgı bar elımızde Arqa tösındegı aru qala Nūr-Sūltannyŋ turizm şaruaşylyǧyn jandandyrudaǧy yqpaly mol. Sebebı toǧyz joldyŋ torabyna ornalasqan jaŋa astananyŋ jūrt nazaryn audaratyn jerlerı az emes. Onyŋ üstıne Europadaǧy qauıpsızdık jäne yntymaqtastyq ūiymynyŋ sammitı, EHRO körmesı siiaqty halyqaralyq maŋyzy zor şaralardyŋ ötkızıluı bas qalanyŋ bedelın biıktete tüsken.
Sondai-aq düniejüzılık turistık ūiymnyŋ jahandyq sammitı biyl qazan aiynda Nūr-Sūltan qalasynda ötedı. Segızınşı märte ötkızılgelı otyrǧan būl forum Ortalyq Aziiada tūŋǧyş ret
ūiymdastyrylatyndyǧyn eskersek, Nūr-Sūltannyŋ turizm salasyndaǧy äleuetı tıpten arta tüskelı tūr.
Nūr-Sūltan qalasynyŋ investisiialar jäne käsıpkerlıktı damytu basqarmasynyŋ sanaǧyna qaraǧanda, 2019 jyldyŋ bırınşı toqsanynda elordadaǧy turistık oryndarǧa 186 myŋ turist kelgen. Onyŋ 30 paiyzyn şeteldık turister qūrasa, el ışınde de elordaǧa saiahattai keletınderdıŋ sany ötken jylǧy osy mezgılderımen salystyrǧanda arta tüskenı baiqalady. Ärine, alty ai qys bolatyn astanamyzda qaŋtardan nauryzǧa deiın aua raiynyŋ qolaisyz ekenın eskersek, 3 ai ışınde 200 myŋǧa juyq turistıŋ keluı – quanarlyq jaǧdai.
Jalpy Qazaqstan jönınen alǧanda, turizm – endı jandanyp kele jatqan sala. Ükımet osydan on şaqty jyl būryn turizmdı damytu josparyn jasaǧanymen, onyŋ önımı oidaǧydai bolǧan joq. Tek soŋǧy jyldary būl tüiınge basa nazar audarylyp, el turizmın elordadan bastap ekpın aldyru kün tärtıbıne qoiylǧaly bıraz jūmystar ısteldı. Mūnyŋ jandy mysaly retınde ükımettıŋ osydan bırneşe jyl būryn elordada turizmdı damytudyŋ 2020 jylǧa deiıngı jol kartasy jobasyn jasaǧanyn atauǧa bolady. Osy josparda Nūr-Sūltanda medisinalyq turizmdı damytu qajettılıgı de qarastyrylǧan edı. Sebebı Qazaqstan 2016 jyly medisinalyq turizm boiynşa TMD elderı arasynda Resei men Ukrainadan keiın üzdık üştıktıŋ qatarynan körındı. Onyŋ üstıne, bas şaharda zamanaui medisinalyq ortalyqtar köbeiıp ǧana qoimai, kardio, onko jäne neirohirurgiialyq kömek körsetu ısı qarqyndy damyp keledı.
Halyqaralyq Medical Tourism Index qoǧamdyq ūiymy jäne halyqaralyq medisinalyq turizm qauymdastyǧynyŋ ökılderı 2025 jylǧa qarai medisinalyq turizmnıŋ ainalymy üş trillion dollar bolady degen boljam jasady. Qazaqstannyŋ da būl saladan öz ülesın aluyna qajettı mümkındıkterı bar ekenın eskergen elımızdıŋ qūzyrly oryndary eŋ äuelı astanamyzdaǧy densaulyq saqtau salasynyŋ artyqşylyqtaryn anyqtap, otandyq jäne şeteldık pasientterge ūsynylatyn medisinalyq qyzmetterdıŋ sapasyn saralaǧan bolatyn. Medisinalyq ortalyqtarda körsetıletın qyzmet türlerın meilınşe sapalylandyrudyŋ tetıkterı de tekseruden ötkızgen edı. Nätijesınde 2018 jyly elımızdegı 25 klinikalyq ortalyqta Özbekstan,
Qyrǧyzstan, Täjıkstan, Resei siiaqty körşı elderden kelgen 2500-ge juyq şeteldık emdelgen. Mūnyŋ basym köp sandysy Nūr-Sūltan qalasynda em alǧanyn eskersek, bas qalanyŋ medisinalyq turizmdı damytudaǧy mümkındıgı barǧan saiyn joǧarylap bara jatqany baiqalady. Jaqynda Memleket basşysy Qasym-Jomart Toqaev ta bas qaladaǧy medisinalyq turizm ortalyǧy boluyna barlyq mümkındıgı baryn, özge öŋırlerden kelıp, elordada em qabyldaityndardyŋ qatary da molaiyp kele jatqanyn airyqşa atap, bas qalada medisinanyŋ sapasyn arttyryp, onyŋ qoljetımdı boluyn qamtamasyz etu jönınde qala äkımıne tapsyrma berdı. Demek, endıgı jerde elorda turizmı künnen-künge jandana tüspese, toqyramaityny anyq.
Qaladaǧy turistık ūiymdardyŋ deregıne süiensek, Nūr-Sūltan qalasyna kelgen turister nebärı bır jarym kün ǧana aialdaidy eken. Oǧan qaladaǧy turisterdı bauraityn maŋyzdy turistık oryndardyŋ azdyǧy sebep bolyp otyrǧan körınedı. «Nūr-Sūltan qalasyna saiahattai kelgısı keletın turister köp. Alaida alystan at terletıp jetkende bır künge jetpei elordanyŋ barlyq jerın aralap bolady. Bäiterekke şyǧyp, EHRO körmesın aralaidy. Han şatyrǧa, Äzıret sūltan meşıtıne barady. Odan özgeşe eşteŋemız joq. Qazaq ūltynyŋ tūrmysyna, ädet-ǧūrpyna qatysty tamaşalaityn oryn da az. Kerek deseŋız, qala ışınde qymyz ışıp, demalyp qaitatyn kiız üi de joq. Qala künınde tıgıletın kiız üilerdıŋ qalǧan kezde qaida ketetının bılmeisıŋ» deidı «Altyn köpır» halyqaralyq saiahat serıktestıgınıŋ direktory Amantai Tūrsynūly. Nūr-Sūltan qalasynyŋ investisiialar jäne käsıpkerlıktı damytu basqarmasynyŋ bastyǧy Erlan Orynbasarūly qazırgı taŋda turisterdıŋ qalada aialdau uaqytyn 3 künge ūzartudyŋ täsılderı qarastyrylyp jatqanyn aitady. Äzırşe bas qalamyz būl jönınde qandai ädıs qoldanatyny belıgısız. Bıraq meilı, qalai bolsa da, Nūr-Sūltanda özındık erekşelıkke ie, basqa qalalardyŋ turizmıne ūqsamaityn jaŋa joba kerek. Bır rettık şaramen nemese merekelık keştermen tūraqty türde turist tartu qiyn. Onyŋ üstıne qysy aqtütek boran bolatyn astanamyz mausymdyq turizmnıŋ yqpalynan älı de aryla almai tūr. Onyŋ da jalǧyz joly – Nūr-Sūltan qalasynyŋ qysqy turizmın damytu. Ökınışke qarai, bas qalada jaz boiy ötetın mädeni şaralar arqadan qūs qaita sap tyiylady. Sosyn da qytymyr qystyŋ qūşaǧynda tynyş jatqan qalaǧa turister de at basyn būra qoimaidy.
