Ärine, mamandyqtyŋ bärı jaqsy. Onyŋ ışınde airyqşa mamandyqtar bar. Adam ömırıne araşa bolatyn därıger bolu ekınıŋ bırınıŋ qolynan kele bermeidı. Äsırese jergılıktı tūrǧylyqty jerı boiynşa emhanalarǧa elordalyqtar jiı baryp, densaulyq jaǧdaiyn tekseredı, qajettı em-domdy alady. Sondai tūrǧyndary köp emhananyŋ bırı – №4 qalalyq emhana. Zeinepkül Dosjanova – köp jyldyq täjıribesı bar bılıktı därıger, 1-otbasylyq densaulyq ortalyǧynyŋ meŋgeruşısı, ūjymda ülken abyroiǧa ie aq halatty abzal jannyŋ bırı.
Erekşe bastalǧan eŋbek joly
Zeinepkül Dosjanova Qaraǧandydaǧy medisina universitetın tämamdaǧan. Būl oqu orny – densaulyq saqtau jüiesı üşın bılıktı kadrlardy daiarlauǧa arnalǧan Qazaqstannyŋ jetekşı medisina universitetı, bılım beru, ǧylym, emdeu-diagnostika qyzmetın körsetude joǧary bedelge ie. Universitet tülekterı Qazaqstanda, jaqyn jäne alys şetelde tabysty jūmys ısteidı.
– Alma-materım – menıŋ universitetım maǧan öte köp bılım men qyzyqty estelıkterdı tartu ettı, ūstazdaryma alǧysym şeksız. Ūlaǧatty ūstazdarym men siiaqty qanşama studentke qanat bıtırıp, bılıktı därıger ettı, būl olardyŋ halqynyŋ saulyǧy üşın, bolaşaǧy üşın qosqan erekşe eŋbegı dep bılemın. Eŋbek jolyn terapevt bolyp Jezqazǧan qalasynda bastadym. 2007 jyly Astanaǧa köşıp kelgen soŋ, №4 qalalyq emhanaǧa telım därıgerı bolyp jūmysqa tūrdym. Qalanyŋ qyzu tırşılıgıne qauyrt jūmyspen aralasyp kettık, – deidı Zeinepkül Meldıbekqyzy bızben äŋgımesınde.
Zeinepkül Dosjanova Qaraǧandydaǧy medisina universitetın tämamdaǧan. Būl oqu orny – densaulyq saqtau jüiesı üşın bılıktı kadrlardy daiarlauǧa arnalǧan Qazaqstannyŋ jetekşı medisina universitetı, bılım beru, ǧylym, emdeu-diagnostika qyzmetın körsetude joǧary bedelge ie. Universitet tülekterı Qazaqstanda, jaqyn jäne alys şetelde tabysty jūmys ısteidı
Jūmystaǧy oqys oqiǧalar
– Därıger bolyp ıstegen soŋ neşe türlı sätter bolady. Sonyŋ ışınde eŋ esımde qalǧany – kelgen bır nauqastyŋ dene qyzuy 37,5-37,9 aralyǧynda boldy, bır qyzyǧy basqa eşqandai şaǧymy joq, vizualdy özgerıster baiqamadym. Aurudyŋ eşqandai belgılerı joq, barlyǧy sau adamdykındei, sonymen nauqasty qosymşa tekseru, taldau ädısterıne jıberdım. Rentgennıŋ qorytyndysy boiynşa qarasaq, keudesı taza, ultradybystyq tekserulerı dūrys, bıraq qan saraptamasyna qarasaq, eritrositterdıŋ şögu jyldamdyǧy men leikositterı joǧary eken. Şaǧymdaryn sūrasam, dene qyzuynan basqa eşteŋe alaŋdatpaidy. Bıraq qarsy aldymda otyrǧan nauqastyŋ özın yŋǧaisyz sezınıp otyrǧanyn baiqap qaldym da, odan nege alaŋdap otyrǧanyn sūradym. Söitsem, ol būlşyq etıne ukol alyp, sodan tüiın ısınıp, qyzaryp ketken eken. Diagnoz anyqtaldy, soǧan qatty quanǧanym bar, – deidı Z.Dosjanova.
Aurudyŋ aldyn alu maŋyzdy
«Emhanaǧa köp nauqas keledı, auruyn ötkızıp, asqyndyryp alǧandarǧa qandai keŋes beresız?» degen saualymyzǧa joǧary sanatty bılıktı därıger bylai dep jauap berdı:
– Emhanaǧa jas baladan jasy ūlǧaiǧan qariiaǧa deiın köp keledı. Köbı – immunitetı tüsken, bırqatary auruyn özı asqyndyryp alǧandar. Sebebı uaqytynda qaralmaǧan olar öz saulyǧy öz qolynda ekenın ūmytyp ketedı. Erte tūrmau, uaqytyly sapaly tamaqtanbau, salauatty ömır saltyn qadaǧalamau, mıne, osyndai faktorlardyŋ barlyǧy da auruǧa äkelıp soǧady. Sol üşın jyl saiyn skrining ötkızıp tūramyz, ol aurudyŋ aldyn aludyŋ bırden-bır joly dep bılemın.
Oryndalǧan arman. Otbasym – tıregım
Qauyrt tırlıgınen bosaǧan uaqytyn Zeinepkül Meldıbekqyzy otbasy, jary, ekı balasyna arnaidy. Olarǧa köbırek köŋıl bölıp, dämdı tamaǧyn jasap berıp, demalysta otbasymen bırge bolǧandy ūnatady:
– Özımnıŋ bala kezdegı armanymnyŋ oryndalyp, süigen mamandyǧymmen jūmys ıstep, köpşılıkke kömegımdı tigızıp jürgenıme öte rizamyn, özımdı baqytty sezınemın. Jūmys qanşalyqty auyr bolsa da emdelıp, riza bolyp ketken nauqastarymdy körıp, barlyq auyrtpaşylyqty ūmytyp ketemın. Şarşaǧanda, quanǧanda, qaiǧyrǧanda otbasym ünemı qasymnan tabylady. Otbasym menıŋ är bastamamdy qoldap, ärqaşan maǧan jıger berıp, demep jüredı. Bız otbasymyzben bır komandamyz, sebebı barlyǧymyz da medisina salasynda jūmys ısteimız. Maqsatymyz da ortaq, armanymyz da bırge. Ūlt saulyǧy üşın ūly mūrat jolyndamyz, osyǧan quanamyn.
Astanam – asqaq ordam!
– Astana – Euraziia jüregındegı qala, ardaq tūtar asqaq mekenım! Mūnda 2007 jyldan berı tūramyn, qala jyl saiyn ösıp, körkeiude, şynyn aitu kerek, maǧan Astananyŋ barlyq jerı qatty ūnaidy, alys ketsem, ünemı saǧynamyn, öitkenı Otanym, otbasym mekendegen elorda men üşın qadırlı, qasiettı. Elordada därıgerlerge öte jaqsy jaǧdai jasalyp otyr. Jyl saiyn memleketımız aq halatty abzal jandarǧa neşe türlı mümkındık berude. Elımızde medisina salasyn qarjylandyru soŋǧy ondaǧan jyldarda bırneşe eseden artyq ūlǧaidy. Elordamyz körkeiıp, elımız aman, jūrtymyz tynyş, jastarymyz sanaly, joǧary maman iesı boluyn tıleimın, – deidı Z.Dosjanova bızben äŋgımesınde.
P.S: Densaulyq saqtau salasyn qarjylandyrudyŋ jyldan-jylǧa artuy, materialdyq-tehnikalyq bazanyŋ nyǧaiuy, bılıktı, täjıribelı därıgerlerdı qoldau, ärine, sapalyq özgerısterge äkeledı, eŋ aldymen, halyq densaulyǧynan körınıs tabatyny sözsız.
