Elordada su tasqynyna qarsy jūmystar jürgızılude
Kün jylynyp, qar erıgelı berı qaladaǧy kommunaldyq şaruaşylyq mamandary köktemgı qarbalas jūmystarǧa qyzu kırısıp te kettı. Bügıngı taŋda elordadaǧy üş audanda da su tasqynyna qarsy jūmystardyŋ jospary pysyqtalyp, su aǧatyn aryqtar men joldar şūǧyl türde qardan tazartyluda.
Osyǧan orai, biyl nauryz aiynan bastap Almaty audany boiynşa su tasqynyna qatysty tüsken ötınışter men aryzdardy qabyldaityn arnaiy bıregei anyqtamalyq telefon jelısı qyzmet atqaruda. Oǧan kün saiyn 48-43-37 nömırı arqyly habarlasqan tūrǧyndar, äsırese, jeke sektorlardaǧy qardy şyǧaru jönınde ötınış bıldırude.
Biylǧy jyldyŋ basynda «Astana Tazalyq» JŞS-men audan basşylary arasynda bekıtılgen kestege säikes, mamandar osy maŋdaǧy kärızder men su jüretın arnalardy qardan jäne mūzdan tazartuda. Būl rette Astana qalasy Tötenşe jaǧdailar departamentınıŋ qyzmetkerlerı jaqynda audan tūrǧyndaryna köktemgı su tasqyny men ört qauıpsızdıgı taqyrybynda jadynamalar taratyp, tötenşe jaǧdai kezındegı äreketter turaly tüsındıru jūmystaryn jürgızdı.
Köktemgı su tasqynǧa qarsy jūmystardyŋ barlyǧyn Almaty audany äkımı apparatyndaǧy audan aumaǧynan köktemgı su tasqynyn ötkızıp jıberu jönındegı arnaiy ştab baqylap, qadaǧalap otyr. Astana qalasy äkımınıŋ tapsyrmasy boiynşa su tasqynynyŋ aldyn aluǧa jauapty basqarmalarmen, kommunaldyq qyzmettermen, käsıporyndar jäne merdıger ūiymdarmen tolyqtyrylǧan osy ştab qūramyndaǧylardyŋ basty maqsaty – apatty jaǧdailardyŋ aldyn alu.
Bügınge deiın audan aumaǧyndaǧy 100-den asa äleumettık nysannyŋ, sonyŋ ışınde 36 balabaqşa, 38 mektep, 27 densaulyq saqtau nysanynyŋ maŋaiy audannyŋ merdıger ūiymdarynyŋ kömegımen qardan tazartylyp, osy uaqytqa deiın jalpy kölemı 13 946 metr bolatyn 32 köşedegı kärız qūdyqtary qardan jäne qatqan mūzdan aryldy. Jalpy, su tasqynyna qarsy ıs-şaralarǧa audan boiynşa 3 jer qazu qūrylǧysy bar maşina jäne 1 buldozer, 65 arnaiy daiyndalǧan tehnika, 2 susorǧyş maşina, 14 mamandandyrylǧan tehnika saqadai sai.
Gülbarşyn Ökeşqyzy
Materialdy «Astana aqşamy» gazetınıŋ astana-akshamy.kz resmi saityna sılteme jasaǧanda ǧana paidalanuǧa rūqsat etıledı.