Elımızdegı eleulı merekelerdıŋ bırı – Eŋbek künı. Naǧyz eŋbekqor jandardy ūlyqtauǧa arnalǧan maŋyzdy merekede ǧūmyryn elge qyzmet etetın salaǧa sarp etken maŋdaiter ielerın tılge tiek etemız. Adal eŋbegımen ainalasyna ülgı körseter naǧyz mamandar ärdaiym abyroi biıgınde tūrady. Qarapaiym qyzmetkerden bastap jyldarmen bedeldı esımge qadam basu üşın – adaldyq pen azamattyq teŋ tūruy tiıs şyǧar… Temırjol salasyna jastyǧy men jüregın bergen, bügınde temırjol salasynyŋ ardagerı Jaqypbek Şaimerdenūly bügın mereilı 75 jasqa keldı.
Jaqypbek Şaimerdenūly 1948 jyly 28 qyrküiekte ömırge keldı. Äskerden oralǧan balaŋ jıgıt ömırlık jary Talaspen qol ūstasyp, taǧdyryn Aqmola qalasymen bailanystyrady. Temırjol salasynda kölık jürgızuşısı bolyp qyzmetın bastaǧan. Üş ūl tärbielep ösırgen asqar tau äkenıŋ jūmystaǧy ädıldıgı men şynşyldyǧyn otbasy müşelerı önege retınde balalaryna amanat qylyp aitady. Bügınde ülken äuletke ainalyp ülgergen jūptyŋ biyl altyn toiy. Būrynǧy Aqmola qalasynyŋ, bügıngı Elordanyŋ 50 jyldan asa eŋbek etıp kele jatqan tūrǧyndary körıktı Astanamyzdyŋ är qabyrǧasynyŋ qalanǧanyn körgen kuägerler. Olar – eŋbekterımen Elordanyŋ körkeiuıne üles qosqan tamyrly tūrǧyndar. Jūmysyna janymen adal bolǧan Jaqypbek Şäimerdenūlynyŋ bügıngı ūrpaqqa aitary köp. Temırjol salasyna sansyz jyldaryn arnaǧan ardager būl qyzmettıŋ büge-şügesıne deiın bıledı. Otbasynyŋ ūiytqysy bolǧan Talas ana üş kelının üş qyzyndai bır şaŋyraq astynda tärbielegen. El Astanasymen bırge ösken otbasy qazaqy tärbienıŋ qainar közı. Äulet äjesı nemerelerın ol uaqytta bıren-saran kezdesetın qazaq mektebıne berıp, ūlttyq qūndylyqtardy boilaryna sıŋırgen. Törınen qonaq üzılmeitın berekelı şaŋyraqtyŋ siqyry – bauyrmaldyqta. Sebebı üi ielerı alystan oquǧa kelgen barşa jaqyndaryn qanatynyŋ astyna alǧan. Tarydai üige taudai köŋılın syidyrǧan otbasy meiırım şuaǧyn şaşqan qazynalaryn erekşe yqylaspen qūrmetteidı. Bügınde üş ūly är salanyŋ bedeldı qyzmetkerı retınde el müddesı üşın eŋbek etıp keledı. «Ūiaŋda ne körseŋ, ūşqanda sony ılesıŋ» deidı dana halqymyz. Adal eŋbektı amanattaǧan ardagerlerımız aman bolsyn!
Aisäule Jaŋabergen,
Astana qalasynyŋ tūrǧyny
