Erge bergısız eŋbegı

Elorda ömırıne jauapty orynda, atap aitqanda, «Astana bas jospar» ǧylymi zertteu-jobalau institutynda Gülnär Qūsaiynova sekıldı jalpy eŋbek ötılı 36 jyldy qūraityn ǧalamat jan jūmys ısteidı.

Köktemmen ılese kelgen Halyqaralyq äielder künı qarsaŋynda Gülnär Qabdenqyzy turaly tolǧanyp körmekpız. Osy qalada tuyp, osy öŋırde ösken ol avtojol tehnikumyn tämamdap, Selinograd auyl şaruaşylyǧy institutynda ekonomist mamandyǧyn alyp şyǧady. Oqyǧan adamǧa jūmys joldama arqyly ­tietın. Sondyqtan qūryştai qyz Qorǧaljyn audanyndaǧy Aryqty ūjymşarynda eŋbek jolyn bastaǧan. Odan soŋ aspiranturaǧa tüsıp, ony oidaǧydai bıtırıp alady. Keiın özı oqyǧan auylşaruaşylyq institutynda bıraz jyl ekonomika fakultetınde därıs beredı. Eŋbekpen eseiıp, elmen etene aralasqan Gülnär Qabden­qyzy memlekettık qyzmetke oiysady. Aqmola oblystyq Auyl şaruaşylyǧy basqarmasyna ornalasyp, zeinetaqy töleu ortalyǧynyŋ, bırazdan keiın oblystyq ekonomika basqarmasyn ūtymdy basqarady. Talaby men qūştarlyǧynyŋ arqasynda Qostanai oblysy äkımınıŋ orynbasary retınde özın jaqsy qyrynan tanytqan. Jūmys babymen auyl-audandardy aralap, ondaǧy halyqtyŋ tynysymen tanysty.

2006 jyldan bastap Arqanyŋ qyzy «Astana bas jospar» ǦZJİ direktorynyŋ orynbasary bolyp eŋbek etedı. 15 jyl boiy osy salaǧa ömırın arnaǧan jan ötken jyldan berı direktordyŋ keŋesşısı qyzmetıne auysty.

– Elde ömır sürıp, eŋbek etu – ülken baqyt. Ärbır adamǧa, sonyŋ ışınde näzık jandarǧa ösu men örkendeudıŋ türlı joly bar. Menıŋ ömırım men taǧdyrym osy sözge däiektı dälel bola alady. Qatar qūrbylarymdy, äpke-sıŋlılerımdı, qanattas­tarymdy köktemnıŋ şuaqty merekesımen şyn jürekten qūttyqtaimyn! Oşaqtyŋ iesı – būl sız ben bız. Sol üşın onyŋ jyluyn, otbasy tatulyǧyn, Otannyŋ jyluyn saqtaŋyzdar. Uaqyt uysymyzda bolmasa da, köp dünie bızdıŋ qolda. Köktem nūrly, är künı ändı, ärbır sätı sändı bolsyn. Bastysy basymyz aman, bauyrymyz bütın, töŋıregımız tügel bolsyn, – degen tılek aitady Gülnär Qabdenqyzy.

Bız de osy sättı paidalana otyryp, erlermen teŋ eŋbek etıp, elordaǧa eŋbegı sıŋgen aiauly adamdy meiırlı merekemen qūttyqtaǧymyz keledı. Önegelı ömırı jastarǧa ülgı bola bersın demekpız. 

Baian ASYLBEKOVA