Nūr-Sūltan qalasynyŋ äkımı Altai Kölgınov Memleket basşysynyŋ Jarlyǧyna säikes Arys qalasyn qalpyna keltıru jūmystaryna qatysqan densaulyq saqtau, bılım, kölık, qūrylys salasyndaǧy azamattardy, qoǧamdyq ūiymdar men astanalyqtardy memlekettık nagradalarmen marapattady.
Altai Kölgınov jiynǧa qatysuşylardy Täuelsızdık künımen qūttyqtap, elımızdıŋ, qalamyzdyŋ igılıgı jolynda atqaryp jürgen ärı jauapty, ärı ızgı eŋbekterıne alǧysyn bıldırdı. «Bızdıŋ elordamyz – täuelsızdıgımızdıŋ simvoly. Elbasymyz Nūrsūltan Äbışūly Nazarbaevtyŋ sarabdal saiasatynyŋ arqasynda elordamyz memleketımızdıŋ äleumettık-ekonomikalyq jäne saiasi jetıstıkterın aişyqtaityn jarqyn qalaǧa ainaldy. QR Prezidentı Qasym-Jomart Kemelūly Toqaev täuelsızdık jolyn jetıstıktermen jalǧastyryp, jūmys atqaruymyz kerektıgın atap öttı. Qalamyzdyŋ, elımızdıŋ damuyna ärbır azamat üles qosyp otyr. Elordamyz künı-tünı tynbai qar tazalap, eŋbek etetın kommunaldyq qyzmetterdıŋ, ärbır üige jylu jetuı üşın eŋbek etetın JEO qyzmetkerlerınıŋ, adam ömırı üşın är sät saiyn küresetın därıgerlerdıŋ arqasynda ösıp-örkendep, damu üstınde. Ūstazdar qauymy, qūrylysşylar, elektrik, santehnikter, jürgızuşıler, ärbırıŋızdıŋ eren eŋbegıŋız jatyr. Bız sızderdıŋ eŋbekterıŋızdı baǧalaimyz, qūrmetteimız» dedı elorda äkımı.
«Qūrmet» ordenımen joǧary sanatty därıger Quatbek Ǧabdullin, eŋbek ardagerı Mūrat İrgibaev, himiia ǧylymdarynyŋ doktory Rauşan Sarmurzina marapattaldy. Sumen jabdyqtau qyzmetınıŋ slesary Robert Ramazanov III därejelı «Eŋbek Daŋqy» ordenın aldy.
Arys qalasyn elektrmen jabdyqtauda qalpyna keltıru, jöndeu jūmystaryna qatysqan marqūm Ermek Tiutiubekovke «Erlıgı üşın» medalı berıldı. Ermek Tiutiubekov 2019 jyly 8 tamyzda Arys-Şymkent trassasynda bolǧan jol-kölık apaty saldarynan qaitys bolǧan edı.
Biyl nauryz aiynda qalada bolǧan ırı jol-kölık oqiǧasy kezınde zardap şekkenderge kömek körsetken 24 jasar Älıbek Baqdäulet Qūrmet gramotasymen marapattaldy. Özı de qoǧamdyq kölıkte jürgızuşı bolyp jūmys ısteitın Älıbek sol künı jolauşylar sapynda bolǧan edı. «İgılıktı ıs jasau üşın joǧary qyzmette otyru mındet emes, «ärbır adam – qoǧam üşın paidaly bola alady» deidı ol.
Sondai-aq bırqatar astanalyqtar «Parasat» ordenımen, «Eren eŋbegı üşın», «Şapaǧat» tösbelgılerımen, alǧys hattarmen marapattaldy. Marapattaudyŋ soŋynan elorda tūrǧyndary men qonaqtary üşın Täuelsızdık künıne orai merekelık konsert ūiymdastyryldy.
