Biyl Ūly Otan soǧysynda jeŋıske jetkenımızge 72 jyl tolyp otyr. Otan üşın jan qiǧan aǧa buyn erlıgın eşkım de eşqaşan ūmytpaq emes. Būl künı beibıt ömır syilaǧan batyrlardyŋ örlıgı men erlıgın jyrlap, maidanda qaza tapqan qaharmandardyŋ ruhyna bas iıp, taǧzym etu dästürge ainalǧan.mereke künı Memleket basşysy Nūrsūltan Nazarbaev ūrys dalasynda qaza tapqan sarbazdardyŋ ruhyna taǧzym etıp, «Otan qorǧauşylar» monumentıne gül şoǧyn qoidy.
Saltanatty räsım soǧysta qaza bolǧan batyrlarymyzdy bır minuttyq ünsızdıkpen eske alu şarasymen jalǧasty. Sondai-aq, «Otan qorǧauşylar» monumentı alaŋynda qūrmettı qarauyldyŋ saltanatty şeruı oryndaldy. Resmi şaradan soŋ Prezident ardagerlermen tıldesıp, olardy bügıngı merekemen qūttyqtady.
Nūrsūltan Nazarbaev soǧys ardagerlerıne alǧys aityp, qūttyqtau söz söiledı.
– Qūrmettı qazaqstandyqtar, otandastar! Är jyl saiyn mamyrajai, künşuaqty mamyr künınde bız Ūly Jeŋıs merekesın atap ötemız. Būl jeŋıstıŋ maǧynasy öte ülken. Adamzattyŋ tarixynda mūndai sūrapyl soǧys bolǧan emes. Ondaǧan million xalyqtyŋ ömırın alyp ketken, qanşa qalany küiretken faşizmge qarsy soǧysta bızdıŋ babalarymyz ülken jeŋıske jettı. Osy jeŋıstıŋ arqasynda mynadai aşyq aspan astynda, beibıtşılıkte ömır sürıp, balalarymyzdy, ūrpaǧymyzdy ösırıp, memleketımızdı nyǧaityp jatyrmyz. Osy uaqytta 25 jyl būryn täuelsızdıgın jariialaǧan Qazaqstan örkendep, ösıp-önuın bır toqtatqan joq, – dedı Qazaqstan basşysy.
Memleket basşysy Ekınşı düniejüzılık soǧys adamzat tarihynda milliondaǧan adamdardyŋ ömırı qiylǧan eŋ qanqūily soǧys bolǧanyn aitty.
– «Otan qorǧauşylar» alaŋynda gülşoǧyn qoiu arqyly qaza tapqan babalarymyzǧa taǧzym etıp, tırı jürgenderge rizaşylyǧymyzdy bıldıremız. Qazaqstan ol kezde 6 million xalqy bar memleket edı. Onyŋ 1,8 milliony soǧysqa qatysyp, teŋ jartysy maidannan qaitqan joq. Elımız maidanda da, tylda da özıne jüktelgen mındettı barynşa atqardy. Sondyqtan elımızdıŋ bükıl ardagerlerın, xalqyn Ūly Jeŋıs merekesımen qūttyqtap, elımız aman, jūrtymyz tynyş bolsyn, aspanymyz är uaqytta aşyq bolsyn deimız! – dep Elbasy barşa qazaqstandyqtardy taǧy bır märte Jeŋıs künımen qūttyqtady.
Güldana TALǦATQYZY
