QR Ūlttyq muzeiınde «Ertıs – Baianauyl öŋırınıŋ tarihy men mädenietı» atty Pavlodar oblysy mūrajailarynyŋ körmesı aşyldy. Atalmyş körme Astana äkımı Äset İsekeşevtıŋ bastamasymen elordanyŋ 20 jyldyǧyna arnalǧan «Ruhani jaŋǧyru» baǧdarlamasy aiasynda jüzege asyrylyp otyrǧan «Ötkendı eske alu – bolaşaqqa jol» atty elordadaǧy öŋırler mūrajailarynyŋ köşpelı körmelerı jobasy aiasynda ötıp otyr.
Joba öŋırlerdıŋ tarihyn jäne mädenietın zertteu, Qazaqstannyŋ tarihi tūlǧalarynyŋ ömırı men şyǧarmaşylyǧymen tanysu, Qazaqstan qoǧamyn ruhani damytu maqsatynda ūiymdastyryldy.
Pavlodar oblystyq körkemsuret muzeiı Būqar jyrau atyndaǧy, G.Potanin atyndaǧy mūrajailarmen bırge akademik Q.Sätbaevtyŋ Baianauyl memorialdyq muzeiı ekspozisiialaryn ūsyndy. Onda mūrajai qorlaryndaǧy Abylai hannyŋ aqylşysy Būqar jyraudyŋ 350 jyldyǧyna, aqyn, etnograf, folklorşy Mäşhür Jüsıp Köpeiūlynyŋ 160 jyldyǧyna, halyq kompozitory Estai Berkımbaiūlynyŋ 150 jyldyǧyna, aqyn, aǧartuşy Sūltanmahmūt Toraiǧyrovtyŋ 125 jyldyǧyna jäne t.b. asa körnektı tūlǧalardyŋ mereitoilaryna arnalǧan materialdar tanystyryldy.
Jalpy, «Ötkendı eske alu – bolaşaqqa jol» jobasyna Soltüstık Qazaqstan, Aqmola, Qaraǧandy, Pavlodar, Almaty, Şyǧys Qazaqstan oblystarynyŋ 30-dan astam mūrajailary qatysuda. Pavlodar oblysynan keiın körmenı Almaty jäne Şyǧys Qazaqstan oblystarynyŋ muzeilerı jalǧastyrady.
Amanǧali QALJANOV
